Paulus ti indile, a ka pangulwe komupangeli Omuroma
1 Konima yomasiku gatatu Festus sho a ningi omuleli gwoshitopolwa shoka, okwa zi mo muKesarea a ta yi kuJerusalem. 2 Nena aayambi aakuluntu naawiliki yAajuda oye ya kuFestus noya tameke oku mu hokololela uusama waPaulus mpoka u li. Oyo oyi indile ihe Festus, 3 e ya kwathe, a tume ko Paulus kuKesarea, e ye kuJerusalem, oshoka oya adhika ya pangela ompangela, ye mu dhipagele mondjila. 4 Ihe Festus okwe ya yamukula nokwa ti: “Paulus oku li muKesarea a kwatwa, nangame mwene otandi ka shuna mbala hwiyaka. 5 Aawiliki yeni naa ye kuKesarea pamwe nangame, ye ke mu tamanekele hwiyaka, ngele oku na shoka a yona.”
6 Festus okwa menekele natango puyo uule womasiku gahetatu nenge omulongo nokwa shuna kuKesarea. Esiku lya landula okwa kuutumba koshipundi shepangulo nokwa lombwele aakwiita, ye ete mo Paulus. 7 Ano Paulus sho e ya mo, Aajuda mboka ya zi kuJerusalem, oye mu kundukidha noya tameke oku mu pa oondjo odhindji noondhigu, ihe oya nyengwa oku dhi monena omatompelo. 8 Oshoka Paulus okwi ipopile a ti: “Ongame inandi ninga nando osha sha tsa ondumbo nompango yAajuda nenge notempeli nenge nomupangeli Omuroma.”
9 Ihe Festus okwa li a hala okwoopalela Aajuda, onkee okwa pula Paulus ta ti: “Owa hala, tu ye kuJerusalem, ndi ka pulakene oohapu dhoye hwiyaka?”
10 Paulus okwe mu yamukula a ti: “Ngame onda thikama mompangu yomupangeli Omuroma nopo mpaka nda hala, ndi uthilwe oohapu dhandje. KAajuda inandi pogola ko nando osha, ngashika nangoye mwene u shi shi nawa. 11 Mpaka itandi indile ando, ndaa dhipagwe, ngele nani onda yona ompango nonda ninga sha, shoka sha gwana okugeelitha ndje neso. Ihe ngele iinima mbyoka taa tamanekele ndje, kaayi shi yoshili, nena kape na nando omuntu ta vulu okugandja ndje miikaha yawo. Ngame otandi igameke komupangeli Omuroma.”
12 Festus sho a kundathana nomalenga ge, okwa lombwele Paulus a ti: “Ngoye sho wi igameke komupangeli Omuroma, onkee ano okuye u na okuya.”
Paulus koshipala shaAgrippa naBernike
13 Omasiku gamwe sho ga piti po, omukwaniilwa Agrippa naBernike oye ya kuKesarea okutalela po noku kunda Festus. 14 Ano sho ya ningi mo omasiku gamwe, Festus okwa hokololele omukwaniilwa okukala kwaPaulus a ti: “Muka omu na omulumentu onkwatwa a thigwa mo kuFeliks. 15 Ngame sho nda yile kuJerusalem, aayambi aakuluntu naakuluntu yAajuda oyi ile kungame e taa hokololele ndje shoka taye mu tamanekele noyi indile ndje, ndi mu pangule. 16 Ihe ngame onde ya lombwele nda ti: Aaroma ihaa gandja omutamanekwa, manga inaa tulwa pamwe naatamaneki ye, opo a mone ompito yokwiipopila mwaashoka ta tamanekelwa. 17 Ano sho ye ya huka, ngame mbalambala mesiku lya landula onda kuutumba koshipundi shepangulo nonda lombwele aamati, ye ete mo omutamanekwa. 18 Nena aatamaneki ye oya thikama e taye mu tamaneke, ihe nani itaye mu tamanekele eyono enene, ngaashi nda li nda dhiladhila. 19 Nani otaye mu tamanekele ashike iinima yimwe yi na sha nelongelokalunga lyawo nosho wo kombinga yanakusa gumwe, edhina lye Jesus, ngoka Paulus ta ti kutya oku na omwenyo. 20 Ngame sho nda li mokwaashisha, oshinima sha tya ngeyi nkene shi na okukonakonwa, onda pula Paulus, ngele okwa hala okuya kuJerusalem, opo ndi ka pulakene oohapu dhe hwiyaka. 21 Ihe Paulus okwi igameke komupangeli Omuroma nokwi indile, a kale mondholongo, sigo omupangeli Omuroma ta ka tokola oohapu dhe. Onkee ano onda gandja elombwelo kutya na kale manga mondholongo sigo okesiku ndyoka tandi ka mona ompito oku mu tuma, a ye komupangeli Omuroma.”
22 Nena Agrippa okwa lombwele Festus a ti: “Nangame wo onda hala okupulakena oohapu dhomulumentu ngoka.”
Festus okwe mu yamukula a ti: “Oto ke dhi pulakena ngula.”
23 Esiku lya landula Agrippa naBernike oya thindikilwa nesimaneko enene koshinyanga shiihokolola kaakuluntu yaakwiita nokaanenentu yomoshilando. Nena Festus okwa gandja elombwelo, Paulus e etwe mo. 24 Opo ihe Festus okwa lombwele Agrippa ta ti: “Omukwaniilwa Agrippa naasimanekwa amuhe mboka mu li mpaka pamwe natse! Omulumentu nguka mu wete, oye ngoka Aajuda ayehe yaamuka muKesarea nokuJerusalem haye mu tamaneke koshipala shandje. Oyo ohaa igidha mokule taa ti kutya na dhipagwe. 25 Ihe ngame kandi wete nando kutya okwa ninga sha, shoka sha gwana oku mu dhipagitha. Onkee ano ye mwene sho i igameke komupangeli Omuroma, onda hala oku mu tuma kuye. 26 Ihe kandi na naanaa sha, shoka nda gwana oku shi lombwela omupangeli Omuroma, ngele tandi mu nyolele. Onkee onde mu eta mpaka koshipala sheni, unene koshipala shoye, omukwaniilwa Agrippa. Opo ihe ngele wa konakona oshinima she, pamwe tandi mono po wo tuu sha sha gwana okunyolwa. 27 Oshoka osha nika uugoya kungame okutuma onkwatwa pwaa na etseyithilo lya yela lyaashoka ta tamanekelwa.”
© Oshindonga Bible © Bible Society of Namibia, 2008.
