Etalelopo lyomukwaniilwa omukiintu gwaSheba
(1 Aak. 10:1-13)1 Omukwaniilwa omukiintu gwaSheba okwa kundana esimano lyaSalomo nokwa yi kuJerusalem e te mu pula omapulo gokanaku. Okwe ya pamwe nongundu onene yaakalele noongamelo dha humbata omilongelo dhiizimba, uuwe noshingoli oshindjishindji. Sho ya tsakanene naSalomo, okwe mu pula omapulo agehe kwa li e ga dhiladhila. 2 Salomo okwe ga yamukula agehe; kapwa li sha oshidhigu unene kuye okufatulula. 3 Omukwaniilwa omukiintu gwaSheba okwa uvu uunongo waSalomo e ta tala ombala ndjoka a tungu. 4 Okwa mono iikulya mbyoka tayi tentekwa koshitaafula, aambala ye mpoka ya kala nonkene ya yakula niizala ya zala, aayakuli yopiililo miituthi, iinuwa ye nomafikilondjambo ngoka ha yamba motempeli. Mbika ayihe oye mu mana oohapu e ta kumwa.
5 Okwa ti komukwaniilwa Salomo: “Shoka nde ku kundana moshilongo shandje, ngoye mwene nuunongo woye, oshoshili! 6 Ihe kanda li te vulu oku shi itaala, sigo nde ya nonde shi mono ngame mwene. Nani netatatata olyo ngaa inaandi uva kombinga yuunongo woye. Uunongo woye uunene u vule aantu sho taa ti. 7 Aantu mboka taye ku yakula, aanelago ngiini, mboka taa kala aluhe koshipala shoye noye na elago okuuva, sho to popi uunongo woye! 8 Hambelela Omuwa, Kalunga koye! Okwa holola kutya okwe ku hokwa, sho e ku ningi omukwaniilwa gwaIsrael, u lele medhina lye. Oshoka oku hole aantu ye Aaisraeli nokwa hala oku ya gamena sigo aluhe, okwe ku ningi omukwaniilwa gwawo, opo u popile ompango nelandulathano.”
9 Okwa pe omukwaniilwa Salomo omulongelo ngoka e gu eta: oshingoli shookilograma dhi vule omayuvi gane, niizimba oyindjiyindji nuuwe. Inaku etwa nale iizimba yilwe iiwanawa ngambyoka omukwaniilwa omukiintu gwaSheba e yi pele omukwaniilwa Salomo.
10 (Aantu yomukwaniilwa Hiram noyomukwaniilwa Salomo mboka ye eta oshingoli sha za kuOfir, oye etelele wo omiti dhomisandeli nuuwe. 11 Salomo okwa hongitha muyo iikolo yomotempeli noyomuuwa we, osho wo iiketala nuuharpa waayimbi. Iinima ya tya ngeyi inayi monika nale mevi lyaJuda.)
12 Omukwaniilwa Salomo okwa gandja komukwaniilwa omukiintu gwaSheba ashihe shoka a li e mu pula. Okwa gwedha ko ishewe omulongelo. Omukwaniilwa omukiintu naantu ye oya shuna ihe kevi lyawo kuSheba.
Uuyamba waSalomo
(1 Aak. 10:14-25)13 Salomo okwa taamba omumvo kehe oshingoli shookilograma konyala omayuvi omilongo mbali nagatatu. 14 Okwa taamba wo oompale dha futwa kaalandithi naahalithi. Aakwaniilwa Aayarabia naaleli yiikandjo yomuIsrael oye mu etele oshisiliveli noshingoli. 15 Salomo okwi ihambulithile iikandekitho iinene omathele gaali nokwa kolongitha kehe shimwe noshingoli sha ngolongwa shookilograma konyala heyali, 16 niikandekitho iishona omathele gatatu ya kolongithwa oshingoli shookilograma konyala ndatu kehe shimwe. Okwe yi pungula ayihe moshinyanga shomiti dhokuLibanon.
17 Omukwaniilwa okwa pangelitha wo oshipangelapundi oshinene. Ombinga yimwe oya li yomayego goondjamba, nonkwawo oyoshingolilela. 18 Oshipangelapundi osha li shi na iilyatelelo ihamano, nokalyatelelo koompadhi koshingoli. Osha li shi na iiyegameneno koombinga adhihe mbali nopooha dhosheegameno kehe shokwaako okwa li efano lyonime. 19 Piilyatelelo opwa li pu na omafano goonime omulongo nambali, yimwe koluha kehe lwoshilyatelelo kehe. Miilongo ayihe kamwa li oshipangelapundi sha fa shika.
20 Iitenga yaSalomo ayihe oya li yoshingoli, niiyuma ayihe moshinyanga shomiti dhokuLibanon oya li yoshingolilela. Oshisiliveli osha li kaashi na mwago muuyuni waSalomo. 21 Okwa li e na oosikepa mefuta dhe ende pamwe noosikepa dhaHiram. Momumvo omutitatu kehe odha galuka dhe etelele oshingoli, oshisiliveli, omayego goondjamba, oondjima noondhila dhoonankwe.
22 Omukwaniilwa Salomo okwa li omuyambalela nomunandunge e vule aakwaniilwa ayehe muuyuni. 23 Ayehe oye ya okupula omayele kuye, yu uve uunongo mboka Kalunga e u mu pa. 24 Shaa ngoka okwe mu etele oombalagelo — iisiliveli, oshingoli, oonguwo, omatati, iizimba, uukambe nomamulutiya. Shika osha ningwa omumvo nomumvo.
25 Omukwaniilwa Salomo okwa li e na omatala omayuvi gane gomatembakwiita noguukambe, naakawilinkambe omayuvi omulongo nagaali. Ongundu yimwe yomuyo oya kala muJerusalem, manga ombinga onene ya kala miilando yilwe. 26 Okwa li a pangele aakwaniilwa ayehe muuyuni okuza komulonga Eufrat sigo oFilistia nokongamba yaEgipiti. 27 Muuyuni we oshisiliveli osha li oshindjishindji muJerusalem sha fa evi, nomisendeli odha li wo odhindji dha fa omikwiyu muShefela. 28 Salomo okwe eta mo uukambe wa zi kuMusri nokiilongo yilwe wo.
Epangelo lyaSalomo
(1 Aak. 11:41-43)29 Iinima yilwe mondjokonona yaSalomo okuza ketameko sigo okehulilo oya nyolelwa membo lyondjokonona lyomuhunganeki Natan, momahunganeko gaAhija gwomuShilo nomomamoniko gomuhunganeki Iddo a hunganekele Jeroboam yaNebat. 30 Salomo okwa lele Israel alihe muJerusalem omimvo omilongo ne. 31 Okwa si nokwa fumvikwa moshilando shaDavid, nomwana Rehoboam okwe mu landula muukwaniilwa.
© Oshindonga Bible © Bible Society of Namibia, 2008.
