Inamu nonoma oosa
1 “One aantu yOmuwa Kalunga keni. Ngele tamu lili oosa, inamu ishata oonsha nenge mu ikulule omapalu momitse, ngaashi aantu yalwe haa ningi. 2 One oshigwana oshiyapuki, aantu yOmuwa Kalunga keni; okwe mu hogolola mu ninge ye mwene mokati kiigwana ayihe kombanda yevi.”
Iinamwenyo iiyelele noyiidhila
(Lev. 11:1-47)3 “Inamu lya sha shiihuna. 4 Iimuna mbyoka tamu vulu okulya, oyo mbika: ongombe, onzi, oshikombo, 5 ohumba, omenye, ompengu, etungu, oholongo, osino, okapundja. 6 Otamu vulu okulya iinamwenyo ayihe mbyoka yi na omakondo ga shandjuka nohayi ekeshele. 7 Ihe iinamwenyo yaa na omakondo ga shandjuka noihayi ekeshele, inayi liwa. Inamu lya oongamelo, uulimba nenge uundjele. Nayi talwe oyo iinamwenyo yoshipwe; ohayi ekeshele, ihe kayi na omakondo ga shandjuka. 8 Inamu lya iingulu. Nayi talwe oyi na oshipwe; oyi na omakondo ga shandjuka, ihe ihayi ekeshele. Inamu lya iinamwenyo ya tya ngaaka nenge mu gume omituntu dhayo.
9 “Otamu vulu okulya oohi adhihe ndhoka dhi na omilenge niipeta, 10 ihe ayihe mbyoka yi li momeya yaa na omilenge niipeta inamu yi lya; nayi talwe oyi na oshipwe.
11 “Otamu vulu okulya oondhila adhihe oondjelele. 12 Ihe moondhila inamu lya ndhika: ekodhi eluudhe, ekwatandimba, onkwalukwa, 13 embiimbili, oondhila oonkwakodhi, 14 omaludhi gomakola, 15 ompo, lumbamba, kakwaya, ookakodhi, 16 oshukutula, ehwiyu, kakulu, 17 onyundu, ontsa, ontyololola, 18 kandoko, omaludhi gomayamakalwa, dhepupu nelimalima.”
19 “Iipethipethi ayihe yomawawa oyi na oshidhila; inamu yi lya.” 20 Otamu vulu okulya iipethipethi ayihe ya yela.
21 “Inamu lya oshinamwenyo shi isila. Otamu vulu oku shi pa omukwiilongo ngoka a kala mokati keni, a lye, nenge otamu shi landitha po komuyeni. Ihe one oshigwana sha yapulilwa Omuwa Kalunga keni.
“Onyama yokanzona nenge yokakombwena inamu yi teleka momahini gayina.”
Ompango yiitimulongo
22 “Yoolola tuu oshitimulongo shaambyoka tayi zi momapya goye omumvo kehe. 23 Inda kehala ndyoka Omuwa Kalunga koye te li hogolola omo a longelelwe; omo moka koshipala she to lile oshitimulongo shiilya, shomaviinu noshomagadhi gooholivi dhoye nosheeli shongombe noshonzi yoye. Shi ninga, opo u nongele okusimaneka Omuwa Kalunga koye aluhe. 24 Ehala lyelongelokalunga ngele oli ku li kokule, opo u fale ko wa humbata oshitimulongo shaambyoka Omuwa e ku yambeke nayo, nena ninga ngeyi. 25 Landitha po iinima, ngoye u fale iimaliwa kehala lyelongelokalunga. 26 Yi landa po shoka wa hala — oongombe, oonzi, omaviinu nenge iikunwa yilwe — opo ihe oto ke yi lila mpeyaka koshipala shOmuwa Kalunga keni one noyaandjeni e tamu nyanyukwa.
27 “Ino ngunguninina Aalevi ya kala miilando yeni, oshoka kaye na oshitendelwa shevi lyawo yene. 28 Pehulilo lyomumvo omutitatu kehe eta oshitimulongo shiilya yoye ayihe e to yi pungula moshilando sheni. 29 Iilya mbika otayi ningi yAalevi, mboka kaaye na oshitendelwa shasha, yaakwiilongo, oothigwa naaselekadhi mboka ye li miilando yeni. Naye ye, ya hawale oompumbwe dhawo. Shi ninga, opo Omuwa Kalunga koye e ku yambeke mwaayihe to longo.”
© Oshindonga Bible © Bible Society of Namibia, 2008.
