Oshipewa shaayambi
1 “Ezimo lyaLevi lyuuyambi itali taamba oshitopolwa shevi muIsrael; otali kala hali hupu koondjambo nomagano galwe ngoka ga yambelwa Omuwa. 2 Kaye na oshitendelwa shevi lyawo yene ngaashi omazimo omakwawo. Omuwa oye mwene oshipewa shawo, ngaashi u uvaneka.
3 “Shaa ngoka ta yamba ongombe nenge onzi, oku na okupa aayambi oshooko, oondjego nela. 4 Oye na okupewa oshipe shiilya, shomaviinu, shomagadhi gooholivi noshomafufu goonzi. 5 Momazimo geni agehe Omuwa okwa hogolola mo ezimo lyaLevi, li kale lyaayambi ye mu longele aluhe sigo aluhe.”
6 “Omulevi kehe ngoka a hala okuza moshilando kehe muIsrael ta yi kehala lyelongelokalunga, 7 ota vulu okuyakula nkoka Omuwa Kalunga ke miilonga yuuyambi, a fa Aalevi mboka taa yakula ko. 8 Oku na okupewa iipalutha yi thike pumbyoka yaayambi yalwe, nando na kale a thigulula sha meliko lyezimo lyahe.”
Elondodho kuupagani
9 “Nge to ka ya mevi ndyoka Omuwa Kalunga koye te li ku pe, ino landula omikalo dhi nyanyalitha dhiigwana mbyoka ya kala mo. 10 Ino yamba aamwoye omafikilondjambo kiiyambelo; ino pitika aantu yoye ya nonome nenge ya anekele, ya kale nuumpulile nenge ya lye omayuku, 11 ya tikile nenge ya pule iihehelela, oombepo dhuumpulile nenge aathithi. 12 Omuwa Kalunga koye oha tondo aantu mboka haa ningi iinima mbika iinyanyalithi, nomolwashoka te ku tidhitha mo iigwana mbyoka mevi. 13 Kala waa na ondjo yasha koshipala shOmuwa Kalunga koye.”
Omuhunganeki ta popiwa
14 Moses okwa ti: “Iigwana mbyoka to ka tidha mo, ohayi pulakene aayanekeli noompulile, ihe Omuwa Kalunga koye ite ku pitika, u ninge ngaaka. 15 Ote ku tumine omuhunganeki a fa ndje ta zi mokati kooyakweni; oye mu na oku mu pulakena.
16 “Mesiku ndiyaka wa li pondundu Sinai, owa galikana, waa uve Omuwa ta popi ishewe nenge u mu tale momulilo, oshoka wa li wa tila, opo waa se. 17 Omuwa okwa lombwele ndje a ti: ‘Oya popi dhu uka. 18 Otandi ke ya pa omuhunganeki e ku fa ta zi maantu yawo yene; otandi ka tula oohapu dhandje mokana ke, oye nota ka lombwela aantu ayihe mbyoka tandi ti. 19 Ota ka popya medhina lyandje, notandi ka geela shaa ngoka ta tindi okuvulika kuye. 20 Ngele oku na omuhunganeki ta fulu oohapu medhina lyandje ngame inaandi mu lombwela e shi ninge, otashi mu dhipagitha, osho wo omuhunganeki kehe ta popi medhina lyiikalunga.’
21 “Oto vulu okwiipopila momutima gwoye to ti: ‘Otatu tseya ngiini oohapu ndhoka Omuwa inee dhi popya?’ 22 Ndhindhilika uuna omuhunganeki ta popi medhina lyOmuwa, naashoka a ti ngele inashi gwanithwa, nena inashi za kOmuwa. Omuhunganeki ta popi paye mwene, ino mu tila.”
© Oshindonga Bible © Bible Society of Namibia, 2008.
