Josia, omukwaniilwa gwaJuda
(2 Aak. 22:1-2)1 Josia okwa li e na omimvo hetatu, sho a ningi omukwaniilwa gwaJuda, nokwa lele muJerusalem omimvo omilongo ndatu nagumwe. 2 Josia okwa longo shoka sho opalela Omuwa; okwa landula oshinkoti shahekulu, omukwaniilwa David, nokwa vulika lela kiipango ayihe yaKalunga.
Josia ta kondjitha uupagani
3 Momumvo omutihetatu guukwaniilwa we, manga omugundjuka, Josia okwa tameke okusimaneka Kalunga kahekulu David. Konima sho pwa piti omimvo ne, okwa tameke okuhanagula po omahala giinonoma yuupagani, iiyelekela yoshikalungakiintu Asheera niimenka yilwe wo. 4 Mewiliko lye aantu ye oya kumagula po iiyambelo mpoka hapu simanekelwa Baal e taa kumuna po iiyambelo yiitsinino. Oya tatagula po iiyelekela yaAsheera niimenka yilwe e taa halakanitha po uutandu koombila dhaantu mboka ya li ye yi yambele. 5 Okwa lungunithile omasipa gaayambi aapagani kiiyambelo nkoka ya yambelele. Sho a ningi ngeyi, okwa yapula Juda naJerusalem, yi yogoke. 6 Shika okwe shi ningi wo miilando yaManasse, Efraim naSimeon, sigo okuumbangalantu kuNaftali. 7 Moshilongo ashihe shokuumbangalantu okwa kumagula po iiyambelo niiyelekela yoshikalungakiintu Asheera, iimenka okwe yi tatagula po, nomatsininoyambelo okwe ga tatula uutandu. Nokwa galukile kuJerusalem.
Embompango tali itsuwa
(2 Aak. 22:3-20)8 Momumvo omutimulongo nahetatu gwepangelo lye, sho a adhika a yogola oshilongo nosho wo otempeli nokuhulitha po esimaneko lyiimenka, omukwaniilwa Josia okwa tumu aantu yatatu, ya opaleke otempeli yOmuwa Kalunga. Oyo Shafan yaAzalia, Maaseia, omupangeli gwaJerusalem, naJoa yaJoahas, amushangandjayi. 9 Iimaliwa mbyoka ya gongelwa kaatonateli Aalevi motempeli, oya pewa omuyambimukuluntu Hilkia. (Oyu umbwa ongalo kAaefraim nAamanasse nokoshihupe shOshilongo shokuumbangalantu nokAajuda, Aabenjamin nAajerusalem.) 10 Iimaliwa mbika oya pewa aantu yatatu mboka taa tonatele iilonga yotempeli, noye yi gandja 11 kaanashihongelo naatungi, opo ya lande omamanya niipilangi tayi longithwa meopaleko lyomatungo ngoka aakwaniilwa yaJuda ye etha ga yonuke. 12 Aantu mboka ya li taa longo iilonga mbika, oya li aayuuki. Oya tonatelwa kAalevi yane: Jahat naObadia gwomoludhi lwaMerari naSakaria naMeshullam gwomoludhi lwaKohat. (Aalevi oya li aayimbi oonkulungu.) 13 Aalevi ooyakwawo oya li taa tonatele eenditho lyiinima e taa wilike aaniilonga miilonga yi ili noyi ili, yamwe oya li aadhiginini yomambo nayamwe aakeeleli yopiiyelo.
14 Iimaliwa sho ya li tayi kuthwa mompungulilo, Hilkia okwa mono embo lyompango yOmuwa, ndjoka Omuwa a gandjele kuMoses. 15 Okwa ti kuShafan: “Ondi itsu embompango motempeli.” Okwa gandja embo kuShafan, 16 naShafan okwe li fala komukwaniilwa. Okwa hokolola a ti: “Otwa gwanitha shoka wa ti. 17 Otwa kutha iimaliwa mbyoka ya li ya pungulwa motempeli e tatu yi gandja kaaniilonga naawiliki yawo.” 18 Oye nokwa gwedha ko a ti: “Ondi na po embo mpaka ndyoka Hilkia a pe ndje.” Oye nokwe li leshele omukwaniilwa muule.
19 Omukwaniilwa sho u uvu embo tali leshwa, okwa tuula oonguwo dhe moluhodhi 20 e ta lombwele Hilkia, Ahikam yaShafan, Abdon yaMikaia, amushangampangu Shefan nomukalele gwomukwaniilwa Asaja ta ti: 21 “Indeni, mu ke tu pulile Omuwa tse naantu ya hupile muIsrael naJuda. Monii mo shoka sha popiwa membo ndika. Omuwa okwe tu geele, oshoka ootatekulu inaa vulika koohapu dhOmuwa yo inaa ninga shoka embo ndika tali ti nashi ningwe.”
22 Palombwelo lyomukwaniilwa, Hilkia nayalwe oya yi, ya ka pule komukulukadhi edhina lye Hulda, omuhunganeki ngoka a kala moshitopolwa oshipe muJerusalem. (Omulume Shallum yaTikva, omutekulu gwaHarhas okwa li omutonateli gwoonguwo dhomotempeli.) Oya hokololele Hulda shoka sha ningwa po. 23 Hulda okwe ya lombwele, ya shune komukwaniilwa, yo ye mu faalele 24 elaka lya zi kOmuwa tali ti: “Otandi ka geela Jerusalem naantu yasho ayehe nethingano ndyoka lya nyolelwa membo nolya leshelwa omukwaniilwa. 25 Oye ekelehi ndje e taa yambele iikalunga omafikilondjambo. Osho ngaaka oya tukulutha ondjahi yandje niilonga yawo. Ondjahi yandje oya tukuluthwa, yi geele Jerusalem noitayi ka lotela we. 26 Ihe tyeni komukwaniilwa gwaJuda, shika osho shono ngame, Omuwa, Kalunga kaIsrael, tandi ti: ‘Owa pulakene shoka sha nyolelwa membompango, 27 nowi itedhulula e to ifupipike koshipala shandje, nokutuula oonguwo dhoye e to lili, sho wa uvu kutya tandi ka geela Jerusalem naantu yasho. Ondu uvu egalikano lyoye, 28 negeelo ndyoka tandi etele Jerusalem, itali ya we, manga inoo sa. Oto ka sa nombili.’ ”
Aantu oya fala elaka ndika komukwaniilwa Josia.
Josia ta hangana nOmuwa
(2 Aak. 23:1-20)29 Omukwaniilwa Josia okwa hiya aawiliki yaJuda noyaJerusalem. 30 Oyo ayehe oya gongala noya yi kotempeli ya thindikilwa kaayambi, Aalevi nokoshihupe ashihe shoshigwana, aayamba noohepele. Montaneho yawo omukwaniilwa okwa lesha embo lyehangano alihe mokule, ndyoka lyi itsuwa motempeli. 31 Okwa thikama pongundhi yaakwaniilwa e ta hangana nOmuwa. Oshigwana ashihe osha li shi na okuuvaneka, shi vulike kOmuwa sho shi dhiginine iipango ye ayihe nomautho ge agehe nomutima aguhe noonkondo adhihe. Ashihe shoka shu uthwa membo lya monika, oshi na okudhigininwa. 32 Okwa hanganithitha Aabenjamin naayehe mboka ya li po muJerusalem, ya uvaneke okudhiginina ehangano. Osho ngaaka Aajerusalem ya vulika, ya ende pahangano ye li hangana naKalunga koohekulu. 33 Omukwaniilwa Josia okwa hanagula po iimenka ayihe yi nyanyalitha miitopolwa ayihe yaIsrael. Manga a li e na omwenyo, aantu oya simaneke Omuwa, Kalunga koohekulu.
© Oshindonga Bible © Bible Society of Namibia, 2008.
