Usia, omukwaniilwa gwaJuda
(2 Ondjal. 26:1-23)1 Momumvo omutimilongombali naheyali gwepangelo lyomukwaniilwa gwaIsrael Jeroboam yaJehoas, Usia waAmazia okwa ningi omukwaniilwa gwaJuda 2 mepipi lyomimvo omulongo nahamano, nokwa lele muJerusalem omimvo omilongo ntano nambali. Yina oJekolia gwomuJerusalem. 3 Okwa landula oshinkoti shahe, okwa longo shoka sha hokiwa kOmuwa. 4 Ihe omahala giinonoma yuupagani inaga yonagulwa po, naantu oya tsikile okuyambela ko oontselelandjambo niitsininondjambo. 5 Omuwa okwa dhenge Usia nokwe mu umbu oshilundu, shoka she mu hepeke sigo okeso lye. Okwa kala megumbo lyi ikalekelwa lye mwene a manguluka kuupyakadhi auhe, manga omwana Jotam ta pangele oshilongo.
6 Ashihe shilwe shoka Usia a ningi, osha nyolelwa membo lyondjokonona yaakwaniilwa yaJuda. 7 Usia okwa si nokwa fumvikwa moombila dhaakwaniilwa moshilando shaDavid, nomwana Jotam okwe mu landula muukwaniilwa.
Sakaria, omukwaniilwa gwaIsrael
8 Momumvo omutimilongondatu nahetatu gwepangelo lyomukwaniilwa gwaJuda Usia, Sakaria yaJeroboam okwa ningi omukwaniilwa gwaIsrael nokwa lele muSamaria oomwedhi hamano. 9 Okwa li a fa aatetekeli ye, e ta yono kOmuwa. Okwa landula uulunde woshiholelwa shomukwaniilwa Jeroboam yaNebat, ngoka a yonitha Israel. 10 Shallum yaJabesh okwa kotokele omukwaniilwa Sakaria. Okwe mu dhipagele puJibleam e te mu landula muukwaniilwa.
11 Ashihe shilwe shoka Sakaria a ningi, osha nyolelwa membo lyondjokonona yaakwaniilwa yaIsrael. 12 Osho ngaaka euvaneko lya tsakanithwa ndyoka Omuwa a popi omukwaniilwa Jehu ta ti: “Ondhikwa yoye otayi hulile moluvalo olutine, sho talu kala muukwaniilwa waIsrael.”
Shallum, omukwaniilwa gwaIsrael
13 Momumvo omutimilongondatu nomugoyi gwepangelo lyomukwaniilwa gwaJuda Usia, Shallum yaJabesh okwa ningi omukwaniilwa gwaIsrael nokwa lele muSamaria omwedhi gumwe. 14 Menahem yaGadi okwa zi kuTirza u uka kuSamaria e ta dhipaga Shallum e te mu landula muukwaniilwa. 15 Ashihe shilwe shoka Shallum a ningi, mwa kwatelelwa mo omakoto ge, osha nyolelwa membo lyondjokonona yaakwaniilwa yaIsrael. 16 Menahem manga a li mondjila ye ta zi kuTirza, okwa hanagula po thiluthilu oshilando Tifsak, aakali musho nomikunda dhomomudhingoloko gwasho, oshoka oshilando inashi igandja kuye. Okwa vutula omapunda gaakulukadhi aasimba.
Menahem, omukwaniilwa gwaIsrael
17 Momumvo omutimilongondatu nomugoyi gwepangelo lyomukwaniilwa gwaJuda Usia, Menahem yaGadi okwa ningi omukwaniilwa gwaIsrael e ta lele muSamaria omimvo omulongo. 18 Okwa yono kOmuwa a landula oshinkoti oshiwinayi shomukwaniilwa Jeroboam yaNebat, ngoka a fala Israel muulunde, sigo okeso lye. 19 Tiglat Pileser, omupanguli gwaAssur, okwa matukile Israel, ihe Menahem te mu pe iisiliveli yiitalenti eyuvi limwe, opo Tiglat Pileser e mu kwathe mokukoleka uukwaniilwa we. 20 Menahem okwa kutha iimaliwa kaayamba muIsrael moku ya thiminika. Shaa ngoka a gandja iimaliwa yiisiliveli omilongo ntano, onkee Tiglat Pileser a shuna koshilongo she. 21 Ashihe shilwe shoka Menahem a ningi, osha nyolelwa membo lyondjokonona yaakwaniilwa yaIsrael. 22 Okwa si nokwa fumvikwa, nomwana Pekahia okwe mu landula muukwaniilwa.
Pekahia, omukwaniilwa gwaIsrael
23 Momumvo omutimilongontano gwepangelo lyomukwaniilwa gwaJuda Usia, Pekahia yaMenahem okwa ningi omukwaniilwa gwaIsrael e ta lele muSamaria omimvo mbali. 24 Okwa yono kOmuwa a landula oshinkoti oshiwinayi shomukwaniilwa Jeroboam yaNebat, ngoka a fala Israel muulunde. 25 Elenga lyaPekahia ekuluntu, Peka yaRemalia, pamwe naalumentu omilongo ntano ya za kuGilead, oya tsu ondumbo noya dhipaga Pekaja ofuthi mepopilongulu lyomeni lyomuuwa muSamaria. Peka nokwe mu landula muukwaniilwa.
26 Ashihe shilwe shoka Pekahia a ningi, osha nyolelwa membo lyondjokonona yaakwaniilwa yaIsrael.
Peka, omukwaniilwa gwaIsrael
27 Momumvo omutimilongontano nambali gwepangelo lyomukwaniilwa gwaJuda Usia, Peka yaRemalia okwa ningi omukwaniilwa gwaIsrael nokwa lele omimvo omilongo mbali muSamaria. 28 Okwa yono kOmuwa a landula oshiholelwa shuulunde womukwaniilwa Jeroboam yaNebat, ngoka a fala Israel muulunde.
29 Manga Peka a li omukwaniilwa, Tiglat Pileser, omupangeli gwaAssur, okwa kwata po iilando Ijon, Abel Bet Maaka, Janoa, Kedesh naHazor niikandjo yaGilead, yaGalilea noyaNaftali, e ta fala aantu kuAssur oonkwatwa.
30 Momumvo omutimilongo mbali gwepangelo lyaJotam yaUsia, omukwaniilwa gwaJuda, Hosea yaEla okwa tsile omukwaniilwa Peka ondumbo e te mu dhipaga ofuthi nokwe mu landula muukwaniilwa. 31 Ashihe shilwe shoka Peka a ningi, osha nyolelwa membo lyondjokonona yaakwaniilwa yaIsrael.
Jotam, omukwaniilwa gwaJuda
(2 Ondjal. 27:1-9)32 Momumvo omutiyali gwepangelo lyaPeka yaRemalia, omukwaniilwa gwaIsrael, Jotam yaUsia okwa ningi omukwaniilwa gwaJuda 33 mepipi lyomimvo omilongo mbali nantano nokwa lele muJerusalem omimvo omulongo nahamano. Yina oJerusha yaSadok. 34 Jotam okwa landula oshinkoti shahe Usia, ta ningi shoka sho opalela Omuwa. 35 Ihe omahala giinonoma yuupagani inaga yonagulwa po, naantu oya tsikile okuyambela ko oontselelandjambo niitsininondjambo. Jotam oye tuu ngoka a tungu osheelo shokuumbangalantu shotempeli.
36 Ashihe shilwe shoka Jotam a ningi, osha nyolelwa membo lyondjokonona yaakwaniilwa yaJuda. 37 Manga ye a li omukwaniilwa, Omuwa okwa tumu tango omukwaniilwa gwaSiria Rezin nomukwaniilwa gwaIsrael Peka, ya homone Juda. 38 Jotam okwa si nokwa fumvikwa moombila dhaakwaniilwa moshilando shaDavid, nomwana Ahas okwe mu landula muukwaniilwa.
© Oshindonga Bible © Bible Society of Namibia, 2008.
