Josia ta dhana Opaasa
(2 Aak. 23:21-23)1 Omukwaniilwa Josia okwa dhana Opaasa muJerusalem, a simaneke Omuwa; mesiku etimulongo netine lyomwedhi gwotango oya dhipaga onzigona yOpaasa. 2 Okwa gandja kaayambi iilonga ya longe motempeli nokwe ya tsu omukumo mokulongela Omuwa. 3 Okwa kumagidha Aalevi, aanongeki yaIsrael, mboka ya li ya yapulilwa Omuwa ta ti: “Tuleni oshikethahangano motempeli ndjoka ya tungwa komukwaniilwa Salomo, omuna gwaDavid. Itamu shi humbata we, mu shi fale pehala nehala, ndele otamu longele Omuwa, Kalunga keni, naantu ye Aaisraeli. 4 Ilongekidheni pamaludhi geni okutsakanitha iimpwiyu mbyoka mwe yi pewa komukwaniilwa David nomwana Salomo, 5 opo motempeli mu kale oongundu dhAalevi tadhi kwatha omagumbo gAaisraeli yowala, ongundu kehe okegumbo limwe. 6 Omu na okudhipaga oonzigona dhOpaasa. Iyapuleni ano, mu longekidhile Aaisraeli aakweni onzigona yOpaasa pamalombwelo ngoka Omuwa e ga pele Moses.”
7 Omukwaniilwa Josia okwa kutha miimuna ye mwene oonzi, oonzigona noonkombwena omayuvi omilongo ndatu noontsezi omayuvi gatatu e te yi pe aathigona omayambo gOpaasa. 8 Omalenga ge oga pe wo oshigwana, aayambi nAalevi omayambo gOpaasa. Aakuluntu yomotempeli — Hilkia, omuyambimukuluntu, Sakaria naJehiel — oya pe aayambi oonzigona noonkombwena omayuvi gaali nomathele gahamano noontsezi omathele gatatu, ye dhi yambe pethimbo lyoshituthi. 9 Aawiliki yAalevi — Konania, Shemaia nomumwayina Netanel, Hashabia, Jeiel naJosabad — oye eta oonzigona noonkombwena omayuvi gatano noontsezi omathele gatano dha pewa Aalevi, ya yambe oontselelandjambo.
10 Oshituthi shOpaasa osha longekidhwa. Aayambi nAalevi oya ka thikama pomahala gawo, ngaashi ya lombwelwa komukwaniilwa. 11 Oonzigona dhOpaasa odha dhipagwa, Aalevi oye dhi yuyu, naayambi oya shashamine ombinzi koshiyambelo. 12 Aalevi oya tula omafikilondjambo poluha, opo ye ga pe oongundu dhomagumbo, ga yambelwe Omuwa pamalombwelo gompango yaMoses. Osho ya ningi wo noongombe. 13 Oya yotha omayambo gOpaasa momulilo, ngaashi shu uthwa, noya teleke omayambo omayapuki moombiga, miiketitha nomiipana noye etele mbala aantu onyama. 14 Shika sho sha ningwa, Aalevi oya teleke onyama yawo noyaayambi yomoluvalo lwaAaron, oshoka aayambi oya longo sigo uusiku taa lungunitha omafikilondjambo noofu. 15 Aayambi Aalevi yoludhi lwaAsaf oya li pomahala ngoka ye ga uthilwa komukwaniilwa David, Asaf, Heman naJedutun, omuhunganeki gwomukwaniilwa. 16 Esiku ndyoka iinima ayihe oya ningilwa esimaneko lyOmuwa, okudhana Opaasa, nokuyamba omafikilondjambo koshiyambelo, ngaashi omukwaniilwa Josia a li u utha. 17 Omasiku gaheyali Aaisraeli ayehe mboka ya li ko, oya dhana Opaasa nOshituthi shiikwiila yaa na fulika. 18 Okuza muuyuni womuhunganeki Samuel kaku dhanenwe we Opaasa ya fa ndjika. Kaku na ngoka gwomaakwaniilwa yaIsrael a dhanene Opaasa ya fa ndjika ya dhanenwe komukwaniilwa Josia, aayambi, Aalevi nAajuda, Aaisraeli nAajerusalem 19 momumvo omutimulongo nahetatu gwomepangelo lyaJosia.
Ehulilo lyepangelo lyaJosia
(2 Aak. 23:28-30)20 Omukwaniilwa Josia sho a ningile otempeli iinima mbika ayihe, omukwaniilwa gwaEgipiti Neko okwa yi netangakwiita lye, a ka kondjithe Karkemish pomulonga Eufrat. Josia okwa kambadhala oku mu keelela, 21 ihe Neko okwa tumine Josia elaka tali ti: “Iita mbika tandi hingi kayi na sha nangoye, omukwaniilwa gwaJuda. Inandi ya ndi ku kondjithe, ihe okukondjitha aatondi yandje, naKalunga okwa lombwele ndje, ndi endelele. Kalunga okwa gama kungame, ino kondjitha ndje, ota ningi e ku yone po.” 22 Josia ine mu pulakena nando. Okwa tindi okupulakena shoka Kalunga a popi momukwaniilwa Neko. Okwi idhimbike e ta yi molugodhi molushandja lwaMegiddo.
23 Molugodhi iikuti yAayegipiti oya yaha omukwaniilwa Josia. Okwa lombwele aapiya ye a ti: “Kuthii ndje po, oshoka onda yahwa nayi!” 24 Oyo noye mu kutha mo metembakwiita lye e taye mu tula metembakwiita etiyali ndyoka lya li po, e taye mu fala kuJerusalem. Okwa si nokwa fumvikwa moombila dhaakwaniilwa. Aajuda ayehe nAajerusalem oye mu lili oosa.
25 Omuhunganeki Jeremia okwa totele eso lyomukwaniilwa Josia ontakumandjimbo. Osha ningi omukalo gwaayimbi ayehe muIsrael okwiimba ontakumandjimbo ndjika, sho taye mu lili oosa. Ondjimbo ndjika oyi li membo lyoontakumandjimbo.
26 Ashihe shoka Josia a ningi — eigandjo lye kOmuwa, evuliko lye kompango, 27 nondjokonona ye okuza ketameko sigo okehulilo — ayihe oya nyolelwa membo lyondjokonona yaakwaniilwa yaIsrael naJuda.
© Oshindonga Bible © Bible Society of Namibia, 2008.
