Omuwa ta nyenyetele Israel
1 Omuwa ota gandja uusama koshigwana shoka sha kala mevi ndika. Israel, pulakena shoka ta ti: “Kaku na omwiinekelwa nenge ohole moshilongo, naantu inaa tseya ndje kutya ongame Kalunga. 2 Otaa ningi omauvaneko e taye ga yono, otaa dhipaga, taa yaka e taa hondele. Oya vuka muudhudhu nomomadhipagathano. 3 Onkee evi otali si oluteni noshaashoka shi na omwenyo, otashi ka sa. Iithitukuti ayihe noondhila adhihe noohi wo otayi ka sa.”
Omuwa ta nyenyetele aayambi
4 Omuwa ota ti: “Inaku kala ngoka ta nyenyetele aantu nenge te ya pukulula — omagando ogu uka kaayambi. 5 One tamu tantagala uusiku nomutenya, naahunganeki ongashikwawo. Ngame otandi ka hanagula po nyoko Israel. 6 Aantu yandje oya pangulwa, oshoka inaa tseya ndje. Ne aayambi omwa tinda okutseya ndje nomwe ekelahi omalongo gandje. Onkee otandi ekelehi aana yeni.
7 “Ne aayambi sho mwa ningi oyendji, okuyona kweni okwa ningi wo okwindji. Esimano lyeni otandi ke li ukitha meshunduko. 8 Otamu yambapala molwomayono gaantu yandje notamu hala, ya yone nena nangula. 9 Otamu ka geelwa egeelo limwe noshigwana. Otandi mu geele e tandi mu galulile uuwinayi mbuka tamu longo. 10 Nando otamu li oontumba dhoondjambo, itamu ka kuta. Otamu simaneke iikalunga yokugandja oluvalo, ihe natango otamu ka kala mwaa na aanona, oshoka omwa pilamene ndje e tamu landula iikalunga.”
Omuwa ta geele esimaneko lyoshipagani
11 Omuwa ota ti: “Omaviinu omalulu nomatoye otaga kutha aantu yandje oondunge. 12 Otaa kongo omamoniko methindi lyomuti. Oshiti tashi ya lombwele shoka ya hala okutseya. Oye etha ndje. Oya fa omukiintu a ningi ohonda. Oyi igandja yo yene kiikalunga. 13 Otaa yamba oondjambo pomahala giimenka koondungu dhoondundu. Kiikulundundu otaa lungunithile etsininondjambo momiti ominene dha gumbakana, omolwomizile omiwanawa.
“Omolwaashoka aakadhona yeni otaa ningi oohonda niitenyakadhona yeni otaa hondele. 14 Ihe itandi ke ya geelela shika, one yene ohamu kala noohonda dhomootempeli notamu gandja pamwe nadho oondjambo dhopashipagani. Ngaashi eyeletumbulo tali ti: ‘Aantu aagoya otaa ka mbolokotela meolelo.’
15 “Nando ngoye oshigwana shaIsrael, ino inekela ndje, Juda na kale inee shi pelwa uusama. Inamu galikanena puGilgal nenge puBetaven nenge mu ningile po euvaneko medhina lyaKalunga omunamwenyo. 16 Oshigwana shaIsrael osha pwidhuka sha fa omamulutiya. Ote vulu oku ya napitha ngiini ngaashi oonzi komanapelo? 17 Oshigwana shaIsrael oshi li mehangano niimenka. Shi etheni, shi ye noondjila dhasho shene. 18 Ngele ya kolwa komaviinu, nena otaa hokwa muuholume wawo, taa hogolola esithahoni komeho gesimaneko. 19 Otaa ka pepwa po kombepo notaa ka sa ohoni yoondjambo dhawo dhoshipagani.
© Oshindonga Bible © Bible Society of Namibia, 2008.
