Eimbilo lyoshitsambe shomiviinu
1 Pulakeneni, manga tandi imbi eimbilo ndika,
eimbilo lyomuholike gwandje noshitsambe she shomiviinu:
Omuholike gwandje okwa li e na oshitsambe shomiviinu
koshikulundundu mevi lyo ondoka.
2 Okwe shi papula e ta fulu mo omamanya;
okwa tsike mo omiviinu dha hogololwa.
Okwe shi tungile oshungo yetonatelelo
nokwa hoko etemba lyokukolela oomviinu.
Okwa tegelele, shi ime omandjembele omatoye,
ihe oshi imi omalulu.
3 Ngashingeyi, ne Aajerusalem naalumentu Aajuda, tokoleni pokati ketu noshitsambe shandje shomiviinu. 4 Oshitsambe shandje ondi na oku shi ningila shike natango? Omolwashike ano shi imi omandjembele omalulu, manga nda tegelela omatoye?
5 Ano shika osho tandi ka ningila oshitsambe shandje shomiviinu: enkolo lyasho otandi li gumbulula, ote kutha po eshigo lyasho notandi etha iiyamakuti yi shi lye po, noshi lyatagulwe po. 6 Otandi shi ningi eputu. Omiviinu dhamo itandi ke dhi thona nenge ndi dhi helele. Otandi shi etha shi mene oondjoho nomano. Otandi ka keelela iikogo yaahe shi lokele we omvula.
7 Oshitsambe shomiviinu shOmuwa Omunankondoawike osho oshigwana shaIsrael, aalumentu yaJuda oyo oshilonda shenyanyu lye. Okwe ya tegelele ya longe uuwanawa, ihe peha lyawo oya tilehi ombinzi. Okwe ya tegelele yu uthe pauyuuki, ihe opwe ya elilagano lyopombanda.
Iipwe ya ningwa kaantu
8 Yaye mboka taa gwedha egumbo kegumbo ekwawo notaa tula kumwe omapya, sigo ayihe ya ningi yawo, sigo kape na we eha lyokukala kuyalwe, noyo ayeke taa kala moshilongo. 9 Ondu uvu Omuwa Omunankondoawike ta popi ta ti: Omagumbo geni agehe otaga ka kala ga mbugala, oongoka omanene noga tungika kage na we aantu. 10 Oshitsambe tashi pululwa niipululo omulongo mesiku limwe, otashi gandja ondjupa yimwe yomaviinu; niilya ya kunwa oontungwa omulongo, otayi zi ontungwa yimwe.
11 Yaye mboka haa meneka ongula onene ya tameke okunwa nohaa hungile taa nu iikolitha. 12 Miituthi yawo yomatelekela omu na iiketala, uuharpa, oontunda noohiya pamwe nomaviinu. Ihe ihaa ndhindhilike nando iilonga yOmuwa yo kayu uvite ko shoka ta ningi. 13 Omolwashoka aantu yandje kaaye na oondunge, otaa ka falwa muupongekwa. Aambala yawo otaa ka sa po kondjala, naashamba otaa ka sa po kenota. 14 Uusi otau ke ya sa ondjala notau ekameke okana kawo ka mbwalangandja. Otau nina po aanamadhina yaJerusalem noongundu dhaamboka haa yogelele momanyanyu gawo.
15 Shaa ngoka ota ka tyololoka, naayehe mboka hayi inomo, otaa ka fupipikwa. 16 Ihe Omuwa Omunankondoawike ota holola uunene we mokulonga shoka shu uka, nota holola uuyapuki we mokutokola aantu ye. 17 Momakulukuma giilando oonzigona otadhi ka napa omwiidhi, nuukombwena otau ka mona oshinapelo.
18 Yaye mboka taa ihilile egeelo, itaa vulu okumanguluka kondjambi yuulunde. 19 Otamu ti: “Omuwa ne endelele a gwanithe shoka a popi, opo tu shi mone. Kalunga kaIsrael omuyapuki na tsakanithe omadhiladhilo ge; ne tu talithe shoka a dhiladhila.”
20 Yaye mboka haa ti, uuwinayi owo uuwanawa, nuuwanawa owo uuwinayi, oomboka haa pilike omilema dhi ninge uuyelele, nuuyelele u ninge omilema! Shoka oshilulu ohaa shi ningi oshitoye, naashoka oshitoye ohaa shi ningi oshilulu.
21 Yaye mboka haa itala oyo aanawino nohaa itangele oondunge dhawo!
22 Yaye mboka haa inomene okunwa omaviinu e taa vuka mokuhanga oondungila, 23 mboka haa mangulula omunandjo omolwoombumbo nohaa keelele uuyuuki womukeenandjo! 24 Omolwaashoka, ongashika iiyagaya nomwiidhi omukukutu tagu igonyo nokulunguna momulilo, osho omidhi dhawo tadhi ka ola, neopalo lyawo tali pepuka po lya fa ontsi, oshoka oye ekelehi shoka Omuwa Omunankondoawike, Kalunga kaIsrael omuyapuki, e tu longo. 25 Omuwa okwa geele oshigwana she nokwa ganeke oshikaha she e shi dhenge. Oondundu otadhi ka kakama, nomidhimba dhaamboka taa ka sa, otadhi ka kala momapandaanda dha fa uuhoho. Naampaka ondjahi yOmuwa inayi lota, ihe oshikaha she otashi kala natango sha taganana.
26 Omuwa ota gandja endhindhiliko lyokwiithana oshigwana shokokule. Ote ya hikile ohiya, ya ze kooha dhuuyuni. Oko taa zi taa endelele nokukwinyola. 27 Mongundu yawo kamu na nando ogumwe a loloka, kape na nando ogumwe ta tantala. Ihaa kumuka noihaa kotha. Kape na epaya tali tokoka nenge olukaku talu dhituka. 28 Iikuti yawo oya honga, nomatati gawo oga lukilikika. Omakondo guukambe wawo ogo omakukutu ngemanya, nomagulu gomatembakwiita gawo otaga iteluka ga fa okambiya. 29 Aakwiita yawo otaa ndunduma ngoonime, ongaashi oonime oongundjuka tadhi pumbu notadhi gono, sho tadhi kwata oshihakanwa e tadhi shi kookolola po, nokape na omukwathi.
30 Uuna esiku ndyoka nali ya, otaa ka ndundumina Israel, ngaashi efuta hali ndunduma. Taleni utale oshilongo shika! Oku na ashike omilema nehaluko! Uuyelele owa ninwa po komilema.
© Oshindonga Bible © Bible Society of Namibia, 2008.
