Aadhipagi mboka inaa tseyika
1 “Pamwe otaku monika omuntu a dhipagelwa melundu mevi ndyoka Omuwa Kalunga koye te li ku pe, ngoye waa shi wo ngoka e mu dhipaga. 2 Aawiliki naatokolihapu yoye naa ye ko ya yeleke oshinano okuza mpoka pu na omudhimba sigo okiilando mbyoka yi li popepi. 3 Aawiliki yoshilando shoka shi li popepi naampoka pwa monika omudhimba, oyo naa hogolole ondema yongombe inaayi longithwa sha. 4 Naye yi fale kesilu hali tondoka omeya, ihe mooha dhalyo inamu pululwa mo inamu kunwa sha. Oko naye yi teyele othingo hoka. 5 Aayambi Aalevi oye na okuya ko wo, oshoka oyo ye na okutokola iinima ayihe yoontamanana noyomaponokelo. Omuwa Kalunga koye okwe ya hogolola ye mu longele noya tumbulile aantu omayambeko medhina lye. 6 Aawiliki ayehe ya za moshilando shi li popepi nehala ndyoka omuntu a dhipagelwa, naa yogele iikaha yawo kombanda yondema 7 e taa ti: ‘Tse inatu dhipaga omuntu nguka, tse katu shi ngoka e mu dhipaga. 8 Omuwa, dhimina po aantu yoye Aaisraeli, mboka we ya mangulula muEgipiti. Tu dhimina po ngoye ino tu tala tu na ondjo yedhipago lyomuntu nguka kee na ondjo.’ 9 Ano mokuninga shoka sho opalela Omuwa ito kala we u na ondjo yedhipago.”
Aakulukadhi ya kwatwa miita
10 “Uuna Omuwa Kalunga koye te ku pe esindano molugodhi e to kwata oonkwatwa, 11 mokati kawo oto vulu okumona mo esingi noto mu hokwa wa hala oku mu hokana. 12 Mu kutha u mu fale kaandjeni, nkoka ta kulula omutse gwe nokuteta oonyala dhe 13 e ta lundulula oonguwo dhe. Ota kala ihe maandjeni e ta lili he nayina uule womwedhi; konima yaambika oto vulu oku mu hokana. 14 Komeho ngele nani ino mu hala we, mu etha a ye. Ino mu landitha po ngoye ino mu pika, oshoka owa lala naye.”
Uuthiga waamati oosheeli
15 “Ngele oku na omulumentu e na aakiintu yaali naayehe taye mu valele aamati, ihe nani osheeli kashi shi omuna gwomuholike gwe, ogwaanguka kee holike unene, 16 omusamane mokutopolela oyana eliko lye, ina pa nando omuna gwomuholike gwe oshindji, a tondole osheeli koshitopolelwa she shuusheeli. 17 Osheeli ne shi pe lwaali, nando inashi valwa komuholike gwe. Omusamane oku na okutunda osheeli e te shi pe oshipewa she shi sheyelwa.”
Aanona aatangalali
18 “Ngele oku na omuntu e na omwanamati omutangalali nomulunduki, ngoka ihaa vulika kuhe nayina, nando naye mu geele, 19 he nayina naye mu fale koshipala shaawiliki yoshilando shaandjawo posheelo shoshilando. 20 Naa lombwele aawiliki yoshilando taa ti: ‘Omumwetu nguka omutangalali nomulunduki ta tindi okuvulika kutse; oye omuntu omuhanaguli nonkolwi.’ 21 Nena aantu yomoshilando naye mu dhipage nomamanya, nosho ngaaka to dhimi mo uuwinayi. Aantu ayehe muIsrael otaye ke shi kundana e taa tila.”
Oompango dhi ili nodhi ili
22 “Momuntu ngele omu na ombedhi onene yoku mu dhipagitha e ta tulwa kohake, 23 omudhimba gwe inagu endjelela komuti sigo ongulohi. Nagu fumvikwe esiku ndyoka, oshoka ngoka e endjelela momuti, okwa thingwa kuKalunga. Fumvika omudhimba, opo waa nyateke evi ndyoka Omuwa Kalunga koye te li ku pe.”
© Oshindonga Bible © Bible Society of Namibia, 2008.
