MATEUS 23 - Oshindonga Bible (ONDB)

Jesus ta kumagidha aantu, ya angale uufudhime

(Mrk. 12:8-39Luk. 11:43Luk. 46Luk. 20:5-46)

1 Nena Jesus okwa lombwele oongundu dhaantu nosho wo aalongwa ye e ta ti: 2 “Aalongimpango naafarisayi oye li koshipundi shaMoses. 3 Onkee ano shaa shoka taye mu lombwele, shi ningeni, ne mu shi dhiginine. Ihe inamu holela iilonga yawo, oshoka shoka taya popi, ihaye shi longo. 4 Oyo ohaa manga omitenge omidhigu dhokuhumbatwa e taye dhi tsike komapepe gaantu, ihe yo yene inaa hala oku dhi guma nando onomunwe gumwe. 5 Iilonga yawo ayihe ohaye yi longo, opo ya monike kaantu. Iipakolwa yomatumbulo gomoohapu dhaKalunga, miipala yawo nokomaako, ohaye yi tende iinene, noonyemba dhoonguwo dhawo ohaye dhi ningi oondeendeka. 6 Oyo oye hole pomahala gaakuluntu miituthi nokiipundi ya simana moosinagoga. 7 Oye hole okukundilwa pokuma hapu gongala aantu nokwiithanwa kaantu ‘omuhongi’. 8 Ne inamu zimina, mu ithanwe omuhongi, oshoka one amuhe aamwayinathana nomu na Omuhongi gumwe awike. 9 Inamu ithana nando olye gwokombanda yevi ‘ho’, oshoka one mu na Ho gumwe awike, oonguka gwomegulu. 10 Inamu pitika, mu ithanwe ‘omuwiliki’, oshoka omuwiliki gweni gumwe awike oKristus. 11 Omunene gwomokati keni na ninge omuyakuli gweni. 12 Oshoka ngoka ti inenepeke, ota shonopekwa, naangoka ti ishonopeke, ota nenepekwa.”

Jesus ti igidhile aafudhime yayee

(Mrk. 12:40Luk. 11:39-42Luk. 44-52Luk. 20:47)

13 “Yayee, one aalongimpango naafarisayi, one aafudhime! One tuu mboka tamu edhile po osheelo shOshilongo shegulu. Oshoka one yene itamu yi mo notamu keelele mboka ya hala okuya mo.

14 [“Yayee, one aalongimpango naafarisayi! One aafudhime, sho hamu li omagumbo gaaselekadhi nohamu galikana omagalikano omaleeleka gokumonika kwowala. One otamu ka mona epangulo edhigu.]

15 “Yayee, one aalongimpango naafarisayi! One aafudhime, sho hamu tuulagana omafuta nomavi, mu likole omulongwa gumwe; nongele sha ningwa, otamu mu ningi omuna gwoheli e mu vule ne yene lwaali.”

16 “Yayee, one aakwatiketi aaposi! One ohamu ti: ‘Ngele ku na ngoka ta gana kotempeli, egano lye kali na oshilonga; ihe ngoka ta gana koshingoli shotempeli, oku na okudhiginina egano lye.’ 17 One aagoya naaposi! Oshinipo shi vule oshikwawo, oshingoli nenge otempeli ndjoka tayi ningi oshingoli oshiyapuki? 18 One ohamu ti: ‘Ngele ku na ngoka ta gana koshiyambelo, egano lye kali na oshilonga; ihe ngoka ta gana komagano ge li koshiyambelo, oku na okudhiginina egano lye.’ 19 Aaposi ne! Oshinipo shi vule oshikwawo, omagano nenge oshiyambelo, shoka tashi ningi omagano omayapuki? 20 Onkee ano oongoka ta gana koshiyambelo, oye ta gana kusho nokukehe shoka shi li ko. 21 Naangoka ta gana kotempeli, oye ta gana kuyo nokuKalunga, nguka a kala muyo. 22 Naangoka ta gana kegulu, oye ta gana koshipangelapundi shaKalunga nokungoka a kuutumba ko.”

23 “Yayee, one aalongimpango naafarisayi! One aafudhime, sho hamu gandja kuKalunga oshitimulongo shiigwanga yaa na oshilonga oshinene; ominti, odili nokumina, ihe ohamu etha iinenenima yomompango; uuyuuki, esilohenda nokwiinekelwa. Mbika oyi na okugwanithwa, ihe naambiyaka kayi shi kweethiwa. 24 One aakwatiketi aaposi! Omwe otamu yi dhindi mo, ihe ongamelo otamu yi nina.”

25 “Yayee, one aalongimpango naafarisayi! One aafudhime, sho hamu yogo oshitenga netemba kombanda, ihe meni omu udha eyugo nuukwaaneidhiliko. 26 Omufarisayi ngoye, yoga tango oshitenga meni, opo shi yele nokombanda wo.”

27 “Yayee, one aalongimpango naafarisayi! One aafudhime, sho mwa fa oombila dha kolongwa nodho opala okutalwa kombanda, ihe meni lyadho odhu udha omasipa gaasi nonyata ayihe. 28 Osho nane wo kombanda paantu omu na eholoko lyuuyuuki, ihe meni omu udha uufudhime nuulunde.”

Epangulo lyaafudhime

(Luk. 11:47-51)

29 “Yayee, one aalongimpango naafarisayi! One aafudhime, sho hamu tungu oombila dhaahunganeki nohamu opaleke oompampa dhaayuuki 30 nohamu ti: ‘Ando twa li ko pomasiku gookuku, ando otse inatu ninga, ngaashi ya ningi, sho ya dhipaga aahunganeki.’ 31 Ano otamu iholola kutya one aana yaadhipagi yaahunganeki. 32 Tsikilii ko ano kushoka oohokulu ya adhika ye shi tameke. 33 Oluvalo lwomayoka ne! Otamu wapa ngiini okuya ontuku okupangulilwa moheli? 34 Onkee ano otandi mu tumine aahunganeki, aalumentu aanandunge naalongi yoohapu dhaKalunga. Yamwe yomwaamboka otamu ya dhipaga e tamu ya alele komushigakano, yamwe otamu ya dhenge noongola moosinagoga dheni e tamu ya tidhagana moshilando noshilando oshikwawo. 35 Onkee egeelo otali ya kombanda yeni omolwokudhipaga aantu yaa na oondjo, okuza kedhipago lyaAbel, ngoka a li, kee na oondjo, sigo okedhipago lyaSakaria, omuna gwaBerekia, mwe mu dhipagela pokati kotempeli noshiyambelo. 36 Ongame tandi mu lombwele: Ayihe mbika otayi ya kombanda yaantu yopethimbo ndika.”

Okwaayitedhulula kwaJerusalem

(Luk. 13:34-35)

37 “Jerusalem, Jerusalem! Ongoye ho dhipaga aahunganeki noho dhipaga nomamanya aatumwa yaKalunga. Olungapi nda li nda hala okugongela aamwoye, ngaashi ondjuhwa hayi gongele uuyuhwena wayo meni lyomawawa gayo, ihe inamu hala. 38 Ngashingeyi egumbo lyeni otali thigwa ombuga yowala. 39 Ongame tandi mu lombwele. Okuza mpaka itamu mono ndje we, sigo tamu ka tya: ‘Na lalekwe nuuyamba, oonguka te ya medhina lyOmuwa!’ ”