Joas, omukwaniilwa gwaJuda
(2 Aak. 12:1-16)1 Joas okwa ningi omukwaniilwa gwaJuda mepipi lyomimvo heyali nokwa lele muJerusalem omimvo omilongo ne. Yina oZibia gwokuBeersheba. 2 Okwa longo shoka sho opalela Omuwa, omuyambi Jehoiada sho a li e na omwenyo. 3 Jehoiada okwa kongele omukwaniilwa Joas aanyekadhi yaali, oyo noye mu valele aamati naakadhona.
4 Konima yethimbo sho a ningi omukwaniilwa, Joas okwa tokola, a opalekithe otempeli. 5 Okwa lombwele aayambi nAalevi, ya ye kiilando yaJuda okugongela iimaliwa yokomumvo maantu ayehe yokwoopalekululitha otempeli. Okwe ya lombwele ya longe neulumo, ihe Aalevi oya kakadhala. 6 Nena omukwaniilwa i ithana omuyambimukuluntu Jehoiada e te mu pula ta ti: “Omolwashike ano inoo tonatela Aalevi, ya gongele muJuda naJerusalem oompale ndhoka Moses, omumati gwOmuwa, u uthile koshigwana okufuta ekoleko lyetsalihangano?”
7 (Aalanduli yaAtalia, omukiintu ngoka omukeenakalunga, oya li ya nyateke otempeli e taa longitha iilongitho yayo iiyapuki mokusimaneka Baal.)
8 Omukwaniilwa okwa lombwele Aalevi, ya pangele oshiketha shomakwathelo yo ye shi tule posheelo shotempeli. 9 Oyi igidha muJerusalem naJuda kutya shaa omuntu ne etele Omuwa oompale ndhoka Moses, omumati gwaKalunga, u uthile mombuga. 10 Shika osha li sho opalela aantu naawiliki yawo, oyo noye eta oompale dhawo dhiimaliwa e taa udhitha oshiketha. 11 Shaa siku Aalevi ohaa fala oshiketha kelenga ekuluntu ndyoka hali shi tonatele. Sho shu udha, amushanga guuwa nomukalelipo gwomuyambimukuluntu ohaa kutha mo iimaliwa e taa shuna oshiketha peha lyasho. Oyo noya gongele iimaliwa oyindjiyindji.
12 Omukwaniilwa naJehoiada oya gandja iimaliwa kaatonateli yeopaleko lyotempeli, mboka ya futu aahongi yomamanya, aanashihongelo naahambudhi ya pumbiwa meopaleko. 13 Aaniilonga ayehe oya longo nuudhiginini e taa galulile otempeli konkalo yayo yonale noye yi opaleke e tayi fe ompe. 14 Omaopaleko sho ga pu, oshingoli noshisiliveli shoka sha hupu ko, osha pewa omukwaniilwa naJehoiada, mboka ye shi longitha okuhambula iiyaha niikwaniipangitho yilwe yomotempeli.
Omukalo gwaJehoiada tagu lundululwa
Jehoiada manga a li e na omwenyo, oondjambo odha li hadhi yambwa nuudhiginini motempeli. 15 Ihe muukokele womimvo ethele nomilongo ndatu Jehoiada okwa si. 16 Molwokusimaneka iilonga mbyoka a ningile Aaisraeli, Kalunga notempeli, okwa fumvikwa moombila dhaakwaniilwa moshilando shaDavid.
17 Konima yeso lyaJehoiada aawiliki yAajuda oya heke omukwaniilwa Joas e ya pulakene. 18 Oshigwana osha hulitha okuninga omambo motempeli yOmuwa, Kalunga koohekulu, e taa tameke okusimaneka iimenka niiyelekela yoshikalungakiintu Asheera. Oya kwata oshidhila, nuulunde mbuka owa hilile Juda naJerusalem ondjahi yOmuwa. 19 Omuwa okwa tumu aahunganeki oku ya londodha, ya galukile kuye, ihe aantu oya tindi okupulakena. 20 Nena ombepo yaKalunga oye ya muSakaria, omuna gwomuyambi Jehoiada. Okwa thikama montaneho yaantu ayehe e ti igidha ta ti: “Omuwa Kalunga ota pula ta ti: ‘Oshike inaamu vulika kiipango yandje notamu iyetele omupya! Omwa ekelehi ndje, onkee onde mu ekelehi wo!’ ” 21 Omukwaniilwa Joas okwe mu kondjitha, nopalombwelo lye oya dhipaga Sakaria nomamanya mehale lyotempeli. 22 Omukwaniilwa okwa dhimbwa eyakulo lyuudhiginini ndyoka Jehoiada, he yaSakaria, e mu hupithile nalyo e ta dhipaga Sakaria. Sakaria sho a li pokusa, okwa igidha a ti: “Omuwa ne mu tale ye e mu geele!”
Ehulilo lyepangelo lyaJoas
23 Poshikufuthinge shomumvo ngoka Aasiria oya matukile Juda naJerusalem, ya dhipaga aawiliki ayehe e taa fala eliko enene kuDamaskus. 24 Etangakwiita lyAasiria olya li eshona, ihe Omuwa okwe li dhengitha etangakwiita lyaJuda enene, oshoka aantu oye ekelehi Omuwa, Kalunga koohekulu. Osho ngeyi omukwaniilwa Joas a geelwa. 25 Okwa li e ehamekwa unene, naatondi sho ya shuna, aambala ye yaali oye mu tsile ondumbo e taye mu dhipagele montala ye, opo ye mu galulile edhipago lyomuna gwomuyambi Jehoiada. Okwa fumvikwa moshilando shaDavid, ihe hamoombila dhaakwaniilwa. 26 (Mboka ye mu tsile ondumbo, oyo Sabad, omuna gwomukulukadhi Omuammoni, edhina lye Shimehat, naJehosabad, omuna gwomukulukadhi Omumoabi, edhina lye Shimrit.) 27 Efatululo lyembo lyaakwaniilwa oli na omahokololo gaana yaJoas, omahunganeko ngoka ge mu popi tage mu tamaneke, nehokololo lyetungululo lyotempeli. Omwana Amazia okwe mu landula muukwaniilwa.
© Oshindonga Bible © Bible Society of Namibia, 2008.
