ESRA 9 - Oshindonga Bible (ONDB)

Esra ta kundana omahokanathano naapagani

1 Ayihe mbika sho ya pu, aawiliki yamwe yAaisraeli oye ya e taa lombwele ndje kutya oshigwana, aayambi nAalevi inaa kala yi iyoolola miigwana yomuushiinda: Aakaanana, Aaheti, Aaperesi, Aayebusi, Aayammoni, Aamoabi, Aayegipiti nAayamori. Ohaa longo iihuna ngaashi aapagani. 2 Aajuda oya hokana aakulukadhi aakwiilongo, nosho ngaaka aantu aayapuki yaKalunga yi inyateke. Aawiliki nomalenga oya li aakwatelikomeho moshinima shika shokwiiteka Kalunga. 3 Sho nde shi kundana, onda tuula oonguwo dhandje meiyekelelo, ndi itudha omafufu noombenzi dhandje nonda kuutumba nda kunkwa. 4 Onda kala nda kuutumba nda kunkwa, sigo omayambo gongulohi taga yambwa, naantu oya gongalele ndje — ayehe mboka ya li ya haluka kushoka Kalunga kaIsrael a popile kuulunde waamboka ya galuka muupika.

5 Ethimbo lyeyambo lyongulohi sho lya thiki, onda penduka po mpoka nda li moluhodhi nda zala natango oonguwo dhandje dha tuuka, onda tsu oongolo ndi galikane nonda ganeke omaako gandje kOmuwa, Kalunga kandje, 6 nonda ti: “Kalunga, onda sa ohoni unene, ndi yeluthe oshipala shandje koshipala shoye. Omayono getu oga ndumbala ga lundu omitse dhetu, nuulunde wetu owa adha muule megulu. 7 Okuza muuyuni wootatekulu sigo ongashingeyi, tse aantu yoye otwa yono unene. Moluulunde wetu tse naakwaniilwa yetu naayambi yetu otwa gwile momake gaakwaniilwa yokiilongo, notwa dhipagwa, twa yugwa, twa yiwa natse ngaashi oonkwatwa. Otwa sithwa ohoni sigo onena. 8 Ngashingeyi okathimbo okafupi. Omuwa, Kalunga ketu, ongoye we tu sile ohenda nowa mangulula yamwe yomutse muupika noku tu tula megameno mehala ndika lyoye eyapuki. Owe tu pe omwenyo omupe, tu fudhe po uupika wetu. 9 Otwa li aapika, ihe ino tu ethela muupika wetu. Owe tu silitha ohenda omupangeli gwaPersia, e tu pitike tu kale tu na omwenyo, tu ka tungulule otempeli yoye, ndjoka ya li omakulukuma, notu kale nawa muJuda naJerusalem.

10 “Ihe nena Kalunga, otatu ti we shike kumbyoka ya ningwa po? Tse otwe ekelahi iipango yoye 11 mbyoka we tu pele maamati yoye aahunganeki. Oye tu lombwele kutya evi ndyoka tatu ka ya mulyo tu li lale, olyo evi lyoshidhila, molwaashoka aantu mboka ya ka kala mo, oye li udhitha niilonga ya nyata noyi tonditha. 12 Oye tu lombwele, twaa hokanathane naantu mboka, tse twaaye ya kwathe nando olumwe, ya mone elago nolupolo, ngele otwa hala okukala nokunyanyukilwa evi ndika noku li gandja komaluvalo getu sigo aluhe. 13 Shoka she tu adha, sho we tu geele molwiilonga yetu iiwinayi nuulunde wetu, osho oshishona shi vulithe pushoka twi ilongele, Kalunga ketu, nowa hupitha mutse ongundu yi thike mpa. 14 Nena otatu vulu ngiini okuyona kiipango yoye, tu hokanathane naantu mboka aakolokoshi? Ngele tatu shi ningi, oto ka geya e to tu hanagula po thiluthilu noito hupitha ko nando ogumwe. 15 Omuwa, Kalunga kaIsrael, ngoye omuyuuki, ihe owe tu hupitha ko. Otatu hempulula uusama wetu kungoye; katu vulu okuholoka koshipala shoye.”