JEREMIA 32 - Oshindonga Bible (ONDB)

Jeremia ta landa epya

1 Omuwa okwa lombwele ndje momumvo omutimulongo Sedekia sho a li omukwaniilwa gwaJuda, ngoka gwa li wo omutimulongo nomutihetatu gwaNebukadnezzar, omukwaniilwa gwaBabilon. 2 Pethimbo ndyoka etangakwiita lyomukwaniilwa gwaBabilonia olya li tali ponokele Jerusalem, ngame nonda li nde edhililwa mongulu yomalangelo yomuuwa. 3 Omukwaniilwa Sedekia okwa li a tula ndje mondjedhililo nokwa alula ndje ta ti: “Omolwashike to hunganeke to ti, Omuwa ota ti: ‘Oshilando shika otandi ke shi gandja miikaha yomukwaniilwa gwaBabilon, oye note ke shi kwata po, 4 nomukwaniilwa Sedekia ita ka hunuka mo. Ota ka gandjwa miikaha yomukwaniilwa gwaBabilon; otaa ka monathana oshipala noshipala notaa ka popya kokana nokana. 5 Sedekia ota ka falwa kuBabilon, oko ta ka kala sigo tandi mu adha. Nando a kondjithe Aababilonia, ita ka tompola sha. Ongame, Omuwa, nda popi.’ ”

6 Omuwa okwa lombwele ndje 7 kutya omuna gwatategona Hanamel yaShallum ote ya kungame, a landithe po epya lye kuAnatot moshikandjo shaBenjamin, oshoka ongame omunezimo lyawo gwomekota nondi na uuthemba woku li ilandela. 8 Ngaashi naanaa Omuwa a lombwele ndje, Hanamel okwe ya kungame mongulu yomalangelo okulanditha epya. Onda li ndi shi shi nale kutya Omuwa okwe shi lombwela ndje shili. 9 Onda landa epya kuHanamel nonde mu pe iimaliwa yiisiliveli omulongo niiheyali. 10 Onda nyola onzapo yelando noku yi shaina montaneho yoombangi nonda yalula iimaliwa noku yi yeleka koshiviha. 11 Onda kutha iifeka ayihe iyali yonzapo yelando — shimwe shoka sha patwa noshihako nosha nyolelwa mo euvathano nomautho noshikwawo shopuuyelele — 12 nonde yi pe Baruk yaNerija yaMakseja montaneho yomuna gwatategona Hanamel, yoombangi ndhoka dha shaina onzapo yelando noyAajuda ayehe mboka ya li mongulu yomalangelo. 13 Onda lombwele Baruk montaneho yawo nda ti: 14 “Omuwa Omunankondoawike, Kalunga kaIsrael, okwe ku lombwele, u taambe oonzapo ndhika, yimwe ndjoka ya patwa noshihako naandjoka yopuuyelele, u dhi tule moshiyuma sheloya, opo dhi pungulwe sigo omimvo dhokomeho. 15 Omuwa Omunankondoawike, Kalunga kaIsrael, okwa ti, omagumbo, omapya niitsambe yomiviinu otayi ka landwa ishewe mevi ndika.”

Egalikano lyaJeremia

16 Sho nda gandja onzapo yelando kuBaruk, onda galikana nda ti: 17 “Omuwa Omupangeliawike, ongoye wa shiti egulu nevi koonkondo nokomatha goye; kape na shoka tashi ku nyenge. 18 Oho hololele aantu omayuvi esilohenda, ihe oho geelele wo aantu uulunde woohekulu. Ongoye Kalunga omunene nomunankondo; ongoye Omuwa Omunankondoawike. 19 Oondunge dhoye odhindji, niilonga yoye oyoonkondo. Omeho goye oga tonatela oondjila dhaantu ayehe, oto futu shaa ngoka shi thike paihumbato lye nongaashi i ilongela. 20 Nalenale owa gwanitha iilongandhindhiliko niilongankumwe muEgipiti nowa tsikile oku yi ninga muIsrael nomiigwana yilwe sigo onena, opo u tseyike apehepehe. 21 Owa tembudha aantu yoye muEgipiti nokulonga iilongandhindhiliko niilongankumwe, onoshikaha shoye shoonkondo nokwooko kwoye kwa taganana, shoka sha tilitha unene aatondi yoye. 22 Owe ya pe evi ndika lya tondoka omahini nomagadhi goonyushi, ngaashi we li uvanekele oohekulu. 23 Ihe sho ye ya mevi muka e taye li lala, inaa vulika we kiipango yoye nenge ya kale, ngaashi we ya longo; inaa ninga nando shoka we ya lombwele ye shi ninge. Onkee owe ya umbile omupya gu thike mpaka.

24 “Aababilonia oya tungile oshilando omutuni gwekondekela, opo ye shi ponokele. Iita, ondjala nelega otayi ka tulitha oshilando shika miikaha yawo. Oto vulu okumona kutya ayihe mbyoka wa popile, oya tsu ngashingeyi. 25 Onkene tuu ngoye, Omuwa Omupangeliawike, owa lombwele ndje, ndi ilandele epya montaneho yoombangi, nando oshilando otashi kwatwa po kAababilonia.”

26 Omuwa okwa lombwele ndje a ti: 27 “Ongame Omuwa, Kalunga kaantu ayehe. Kaku na shoka tashi nyenge ndje. 28 Otandi ka gandja oshilando shika miikaha yomukwaniilwa gwaBabilonia Nebukadnezzar netangakwiita lye; otaye shi kwata po 29 e taye shi tomeke. Otaye shi fike po pamwe nomagumbo moka mwa li aantu ya geyitha ndje, sho ya fikile Baal oondjambo kombanda yoondundu nokusaagelela iikalunga omaviinu. 30 Okuza kontsapo yondjokonona yawo Aaisraeli nAajuda oya hindi ndje e taa geyitha ndje niilonga yawo. 31 Okuza kesiku ndyoka oshilando shika sha tungwa sigo ongashingeyi aantu yasho oya tukulutha ondjahi nongeyo yandje. Onda tokola oku shi hanagula po 32 omoluuwinayi auhe mboka Aajuda nAajerusalem ya ningi pamwe naakwaniilwa naawiliki yawo nopamwe naayambi naahunganeki yawo. 33 Oya pilamene ndje peha lyokugalukila kungame; nando onda dhiginine oku ya pukulula, inaa pulakena sha. 34 Oya tula iimenka yawo iinyanyalithi motempeli ya tungilwa okusimaneka ndje. Osho ngeyi ya nyateke otempeli yandje. 35 Oya tungile Baal iiyambelo mesilu Ben Hinnom noya yambele oshikalunga Molek oyana aamati naakadhona. Inandi ya lombwela nando, ye shi ninge; inashi ya mo nando okuli momadhiladhilo gandje, ya longe iihuna ya tya ngaaka nokuyonitha Aajuda.”

Euvaneko lyetegameno

36 Omuwa, Kalunga kaIsrael, okwa lombwele ndje a ti: “Jeremia, aantu otaa ti, iita, ondjala nelega otayi ka tulitha oshilando shika miikaha yomukwaniilwa gwaBabilon. Pulakena shoka tandi ti. 37 Otandi ka gongela aantu yomiilongo ayihe moka nde ya halakanithila mo mondjahi nomongeyo yandje onene, notandi ke ya galulila kehala ndika noku ya kalitha mo nombili. 38 Oyo notaa ka ninga aantu yandje, ongame notandi ningi Kalunga kawo. 39 Otandi ya pe omwenyo gumwe nelalakano limwe, ya simaneke ndje omasiku agehe, omoluuwanawa wawo yene nomoluuwanawa woluvalo lwawo. 40 Otandi ka hangana nayo ehangano lyaaluhe. Itandi ka loloka oku ya ninga nawa, notandi ke ya longa okutila ndje nomwenyo aguhe, opo yaa pilamene ndje we. 41 Otandi ka nyanyukilwa oku ya ninga nawa, notandi ke ya tsika mevi ndika.

42 “Naanaa ngashika ndu undulile aantu mbaka oshiponga shika oshinene, otandi ke ya ninga nawa, ngaashi ndu uvaneke. 43 Aantu otaa ti, evi ndika otali ka kala lya fa ombuga yaa na aantu nenge iinamwenyo, notali ka gandjwa miikaha yAababilonia. Ihe omapya otaga ka landwa ishewe mevi ndika. 44 Aantu otaa ke ga landa, oonzapo dhomalanditho otadhi ka shainwa, otadhi hakwa notadhi kolekwa koombangi. Osho tashi ka ningwa moshikandjo shaBenjamin, momikunda dha kunkula Jerusalem, miilando yaJuda, momikunda dhomoshilongo shokoondundu, poonyonga dhoondundu, nokuumbugantu waJuda. Otandi ka galulila aantu kevi lyawo. Ongame, Omuwa, nda popi.”