Debora naBarak
1 Ehud sho a si, oshigwana shaIsrael osha yono ishewe kOmuwa. 2 Osho Omuwa e ya gandja miikaha yaJabin, omukwaniilwa Omukaanani, ngoka a li ta pangele muHazor. Ondjayi yetangakwiita lye oSisera, ngoka a kala muHaroshet shaakwiilongo. 3 Jabin okwa li e na omatembakwiita omathele omugoyi nokwa tyakalekele Aaisraeli omimvo omilongo mbali. Oshigwana shaIsrael nosha pula ekwatho kOmuwa.
4 Nena Debora, mukadhaLappidot, okwa li omuhunganeki nokwa li ta wilike Aaisraeli pethimbo ndyoka. 5 Okwa li ha kuutumba momulunga gwontumba pokati kaRama naBetel mevi lyokoondundu dhaEfraim, nAaisraeli oya yi kuye, e ya tokolele oohapu. 6 Esiku limwe okwa tumu Barak, omuna gwaAbinoam a zi koshilando Kedesh muNaftali e ta ti kuye: “Omuwa Kalunga kaIsrael ota gandja elombwelo ndika: ‘Kutha aalumentu omayuvi omulongo momazimo gaNaftali nogaSebulon, u ya fale kondundu Tabor. 7 Otandi eta Sisera, ondjayi yetangakwiita lyaJabin, e ku kondjithe pomulonga Kishon. Ote ke ya nomatembakwiita giiyela naakwiita ye, ihe otandi mu gandja miikaha yoye.’ ”
8 Barak okwa yamukula a ti: “Otandi yi ashike, ngele to yi nangame, ihe ngele ito yi nangame, nangame wo itandi yi ko.”
9 Debora a yamukula: “Eeno, onawa, otandi yi nangoye, ihe esimano lyesindano itali ka ninga lyoye, oshoka Omuwa ota gandja Sisera miikaha yomukiintu.” Okuza mpoka Debora naBarak oya thikama e taa yi kuKedesh. 10 Barak okwi ithana ezimo lyaNaftali nolyaSebulon kuKedesh, naalumentu omayuvi omulongo oye mu landula. Debora okwa yi pamwe naye.
11 Pokati mpoka Heber Omukeni okwa dhike otenda ye puKedesh popepi nomwandi puZaanannim. Okwa li a tembuka pAakeni yalwe yomoluvalo lwaHobab, suwala yaMoses.
12 Sisera sho u uvu kutya Barak okwa londa kondundu Tabor, 13 okwi ithanene kuye omatembakwiita ge giiyela omathele omugoyi naalumentu ayehe nokwe ya tumu ya zi muHaroshet-shaakwiilongo, ya ye komulonga Kishon.
14 Nena Debora okwa ti kuBarak: “Unduka! Omuwa ote ku wilike! Nena ota gandja Sisera miikaha yoye.” Osho ngaaka Barak a kuluka ta zi kondundu Tabor pamwe netanga lye lyaalumentu omayuvi omulongo. 15 Barak sho e ya mbolokotele netanga lye, Omuwa okwa vundakanitha Sisera pamwe nomatembakwiita ge agehe naakwiita ye. Sisera a nuka metemba lye e ta yi ontuku. 16 Barak okwa tidhagana omatembakwiita netangakwiita, sigo oHaroshet-shaakwiilongo, netangakwiita lyaSisera alihe olya dhipagwa; inapu hupa nondhi.
17 Sisera okwa matukile motenda yaJael, mukadhaHeber Omukeni, oshoka omukwaniilwa gwaHazor Jabin okwa li e na ombili negumbo lyaHeber. 18 Jael okwa piti mo, a tsakaneke Sisera e ta ti kuye: “Ila mo, tatekulu, ila motenda yandje. Ino tila.” Osho ngaaka a yi mo, nomukulukadhi okwe mu holeke e mu gumbika omulapi. 19 Sisera okwa ti kuye: “Kwatha ndje omeya, onda kangala.” Jael okwa siikulula ombago yomahini e te mu pe, a nwe, nokwe mu siikile ishewe. 20 Nena Sisera okwe mu lombwele: “Ka thikame posheelo shotenda, nongele taku zi omuntu te ku pula ta ti, olye e li mo muno, tya aawe, kamu na muntu.”
21 Sisera okwa li a tatuka ontulo nokwa kwatwa koomposi. Nena Jael okwa kutha ohamala nomboha yotenda e ta nyootoka u uka kuye nokwe mu dhipaga nokumbambalela omboha pombandu ye e tayi mbathuka kombinga onkwawo e tayi yi mevi. 22 Barak sho e ya ta kongo Sisera, Jael okwe ke mu tsakaneka e ta ti kuye: “Ila, ndi ku ulukile omulumentu ngoka to kongo.” Osho a yi mo pamwe naJael nokwa adha Sisera a kangawala a sa nomboha ye mu ndjikwa momutse.
23 Esiku ndyoka Kalunga okwa pe Aaisraeli esindano, sho ya sindi Jabin, omukwaniilwa Omukaanani. 24 Oya li taye mu thininike nokuthininika, sigo ye mu thekula po.
© Oshindonga Bible © Bible Society of Namibia, 2008.
