David ta hupitha ishewe omwenyo gwaSaul
1 Aantu yamwe oya zi muSif ye ya kuSaul muGibea noye mu lombwele kutya David okwa holama mondundu Hakila koongamba dhombuga yaJudea. 2 Saul okwa yi kombuga yaSif e na aakwiita Aaisraeli ya dheuka omayuvi gatatu, a ka konge David. 3 Okwa yungu ontanda pondjila yu uka kondundu Hakila. David okwa li natango mombuga. Sho a kundana kutya Saul okwe ya oku mu konga, 4 okwa tumu oondaadhi nodha koneke kutya Saul oko e li. 5 Nena David okwa yi ko wo nokwa koneke ehala mpoka Saul naAbner yaNer, ondjayi yiita yaSaul, ya kothela. Saul okwa lala meni lyontanda, naantu ye oye mu kunduka.
6 Nena David okwa pula Omuheti Ahimelek naAbisai, mumwayina gwaJoab (yina yawo oZeruia) ta ti: “Oguni gwomune yaali te ya, tu ye naye kontanda yaSaul?”
Abisai okwa ti: “Ongame.”
7 Uusiku mboka David naAbisai oya yi montanda yaSaul noya adha Saul a kotha pokati kontanda negonga lye lya ndjikwa mevi popepi nomutse gwe. Abner pamwe naakwiita oya kotha ye mu kunduka. 8 Abisai okwa ti kuDavid: “Kalunga okwa gandja omutondi gwoye miikaha yoye uusiku mbuka. Ngashingeyi nandi mu tse egonga, li tunukile mevi polumwe aluke — ite pumbwa oku mu umpila lwaali!”
9 Ihe David okwa ti: “Ino mu dhipaga, oshoka kape na ngoka ta gumitha oshikaha omukwaniilwa omugwayekwa kOmuwa ndee ta kala inaa geelwa.” 10 David okwa tsikile e ta ti: “Ondi shi shi kutya Omuwa oku na omwenyo, oye mwene ta ka dhipaga Saul, shampa tuu uuna ethimbo lye lya thiki okusa eso lyomwenyo ngu gwomomayulu, nenge ta ka sila miita. 11 Omuwa na keelele ndje, ndaa kambadhale okudhipaga omuntu ngoka a hogololwa kOmuwa, a ninge omukwaniilwa! Natu kuthe po egonga lye nombago ye, tu ye.” 12 Osho ngaaka David a kutha po egonga nombago ontega nomutse gwaSaul, noya yi yo naAbisai. Nokapwa li ngoka e shi mono nenge e shi tseya shoka sha ningwa po, nenge ando a penduke. Ayehe oya li taa kotha, oshoka Omuwa okwe ya umbu oomposi oondhigu.
13 Nena David okwa taagulukile handiyaka yolusilu e ta londo kondungu yondundu, nopokati kawo opwa li elala lya gwana nawa, pwaa ye oshiponga shasha. 14 Nena David okwi igidha aakwiita yaSaul naAbner ta ti: “Abner! Ou uvite ndje?”
Abner okwa pula a ti: “Olye ano ti igidha ta kudhile omukwaniilwa?”
15 David okwa yamukula: “Abner, ndishi ongoye ngaa sha muIsrael? Oshike ano inoo gamena mwene gwoye, omukwaniilwa? Oshoka montanda omwi ile omuntu, a dhipage mwene gwoye. 16 Wa ponyo miilonga yoye, Abner! Otandi gana kOmuwa omunamwenyo kutya ne amuhe omwi ilongela okusa, oshoka inamu gamena mwene gweni, ngoka a hogololwa kOmuwa. Taleni! Egonga lyomukwaniilwa oli li peni? Ombago ye oyi li peni, ndjoka ya li ontega nomutse gwe?”
17 Saul okwa dhimbulula ewi lyaDavid e ta pula: “Ongoye ngaa David, omumwandje?”
David okwa yamukula a ti: “Eeno, Nkeyama.” 18 Okwa tsikile ta ti: “Ano oshike, tatekulu, to tidhagana ndje ngaa, omuntu gwoye? Onda ningi shike? Oshinima nda yona, oshishike ano? 19 Nkeyama, pulakena shoka te ti. Ngele Omuwa oye te ku tidhitha ndje, nena mu yambela omagano, opo a lundulule omadhiladhilo ge, ihe ngele aantu nena Omuwa ne ya tule omutima. Oshoka oya tidha ndje moshilongo shevi lyOmuwa, ndi ye kevi nkoka te vulu okulongela ashike iikalunga iikwiilongo. 20 Ino dhipagithila ndje mevi lyuundjendi, kokule nOmuwa. Omolwashike omukwaniilwa gwaIsrael te ya okudhipaga ndje ona ngaa yowala? Omolwashike ta kongo ndje nda fa ondhila yomokuti?”
21 Saul okwa yamukula: “Onda puka. Galuka, mumwandje David. Itandi ku dhipaga we, oshoka owa hupitha omwenyo gwandje uusiku mbuka. Onda ningi uugoya. Onda longo iihuna.”
22 David okwa yi mo: “Egonga lyoye olyo ndika, Nkeyama. Tuma gumwe gwomaantu yoye, e li ile ko. 23 Omuwa ota futu aayinekelwa naayuuki. Nena okwe ku gandja miikaha yandje, ihe inandi ku dhipaga, ngoye ngoka wa hogololwa kOmuwa, u ninge omukwaniilwa. 24 Ngaashi nda hupitha omwenyo gwoye, Omuwa osho na hupithe ndje e ta mangulula ndje muudhigu auhe.”
25 Saul okwa ti kuDavid: “Kalunga ne ku yambeke, mumwandje! Oto ka tompola ayihe mbyoka to longo.”
Opo ihe David okwa tsikile nondjila ye, manga Saul a shuna kaandjawo.
© Oshindonga Bible © Bible Society of Namibia, 2008.
