1 “Aalumentu ne, aamwameme nootate, pulakeneni, sho tandi ipopile koshipala sheni.” 2 Ano sho yu uvu te ya popitha mOshihebeli, oya mwena thilu. Nena Paulus okwa tsikile ihe okupopya ta ti:
3 “Ngame Omujuda, nda valelwa muTarsus shomuKilikia nonda putudhilwa muka muJerusalem. Omulongi gwandje oGamaliel. Ngame onda longwa nawa okutseya ompango yookuku nonda li omulaadhi mokulongela Kalunga pamukalo naanaa ngoka mu li ngashingeyi. 4 Nokuli ngame onda hepekele nonda dhipaga aantu mboka haa landula ondjila yuukriste. Onda li nda kwata aalumentu naakiintu nonde ya edhilile mondholongo. 5 Omuyambimukuluntu niilyo ayihe yoshigongi shaatokoli otaa vulu okukoleka kutya ote popi oshili. Oyo naanaa mboka ya li ya pe ndje oontumwafo dha nyolelwa Aajuda ooyakwetu yomuDamaskus, opo ndi ye ko, ndi ke ya kwate nondi ya ete kuJerusalem ya mangwa nomalyenge, ya wape okugeelwa.”
Paulus ta hokolola eitedhululo lye
(Iil. 9:1-19Iil. 26:12-18)6 “Ano mokweenda kwandje, manga nda li mondjila pokati komutenya tandi ihilile kuDamaskus, ohaluka yowala onda adhiminwa kuuyelele uunene wa zi megulu nowa kondeke ndje. 7 Nena ondi ihata pevi nondu uvu ewi tali popitha ndje tali ti: ‘Saulus, Saulus, omolwashike to tidhagana ndje?’ 8 Ongame onda pula ihe nda ti: ‘Ongoye lye ano, Omuwa?’ Oye okwa yamukula ndje a ti: ‘Ongame Jesus Omunasareti, oongoka to mu tidhagana.’ 9 Aalumentu mboka ya li pamwe nangame, oya mono uuyelele, ihe ewi ndyoka lya popitha ndje, inaye li uva. 10 Nena onde mu pula nda ti: ‘Omuwa, ondi na okuninga shike?’ Oye okwa lombwele ndje ihe ta ti: ‘Thikama, inda kuDamaskus. Oko hoka to ka lombwelwa ashihe shoka Kalunga a hala, u ninge.’ 11 Uuyelele mbuka owa tsikitha omeho gandje, onkee aalumentu mboka ya li pamwe nangame, oya kwata ndje keti e taa fala ndje kuDamaskus.
12 “Okwa li ku na omulumentu gumwe, edhina lye Ananias, ha simaneke Kalunga nonakuvulika kompango, ngoka a li a simanekwa kAajuda ayehe yomuDamaskus. 13 Oye okwe ya kungame, a hedha ponto yandje nokwa lombwele ndje e ta ti: ‘Mumwameme Saulus, mona ko ishewe!’ Pethimbo olyo tuu ndyoka onda mono ko nonde mu tala. 14 Opo ihe okwa lombwele ndje e ta ti: ‘Kalunga ngoka ootate ya kala haye mu longele, okwe ku hogolola, opo u tseye ehalo lye, ngoye u mone Omuntu gwe omuyuuki nou uve ewi lye, sho te ku popitha. 15 Oshoka ongoye oto ka ninga onzapo ye okuhokololela aantu ayehe shoka we shi mono nowe shi uvu. 16 Nokuli ngashingeyi oto tegelele we shike? Thikama, u ithane edhina lye ngoye u shashwe, noondjo dhoye dhi dhimwe po.’ ”
Paulus ti ithanwa, a ka uvithile aapagani
17 “Nena onda shuna kuJerusalem, nomanga nda li te galikana motempeli, onda mono emoniko, 18 ndi wete Omuwa ta lombwele ndje ta ti: ‘Endelela, u ze mo muJerusalem, oshoka aantu yaamuka itaa ka itaala nando shoka to ya lombwele, sho to hokolola ndje.’ 19 Ngame onde mu yamukula nda ti: ‘Omuwa, oyo oye shi shi kutya onda li handi yi moosinagoga okukwata nokudhenga aantu ayehe mboka ye ku itaala. 20 Nokuli nomumati omuhokololi gwoye Stefanus sho a dhipagwa, nangame wo opo nda li. Onda li nda panda okudhipagwa kwe nonda li tandi tonatele oonguwo dhaadhipagi ye.’ 21 Ihe Omuwa okwa lombwele ndje ta ti: ‘Inda ko, oshoka otandi ke ku tuma kokule kaapagani.’ ”
22 Sigo oompoka aantu oya pulakene Paulus, opo ihe oya tameke okwiigidha mokule ya ti: “Na ze po! Na dhipagwe! Oye ina gwana we okukala e na omwenyo!” 23 Oyo oya li taa igidha yo taa dhungadhunga oonguwo dhawo e taa fundu evi. 24 Nena omuwiliki omukuluntu gwaakwiita Aaroma okwa lombwele aamati ye, ya fale Paulus meni lyepopilongulu. Oye okwe ya lombwele, ye mu pule noku mu dhenga, opo yu uve kutya omolwashike Aajuda taye mu kugilile ngeyi. 25 Ihe sho ye mu manga, ya vule oku mu dhenga noongola, Paulus okwa pula omukuluntu gwaakwiita, ngoka a li a thikama puyo e ta ti: “Osha pitikwa tuu pampango okudhenga Omuroma, manga ina pangulwa, a monike ondjo?”
26 Omukuluntu nguno sho e shi uvu, okwa yi komuwiliki omukuluntu gwaakwiita e te mu pula ta ti: “Oto ningi ngiini ngawo? Omulumentu nguka Omuroma.”
27 Nena omuwiliki omukuluntu gwaakwiita okwa yi kuPaulus nokwe mu pula a ti: “Lombwela ndje, ngoye ngele Omuroma?”
Paulus okwe mu yamukula a ti: “Eeno, osho.”
28 Omuwiliki gwaakwiita okwa ti: “Ngame onda mono uukwashigwana mbuka wAaroma, sho nda futu epangelo iimaliwa oyindji.”
Paulus okwe mu yamukula a ti: “Ihe ngame Omuromalela kevalo.”
29 Mbalambala aalumentu mboka ya li ye na okupula Paulus, oye mu etha. Nokuli omuwiliki gwaakwiita okwa li a tila, sho a dhimbulula kutya nani Paulus ngoka e mu mangitha nomalyenge, oye Omuroma.
Paulus moshigongi shaatokoli
30 Omuwiliki omukuluntu gwaakwiita okwa li a hala okutseya kutya oshike naanaa Aajuda taa tamanekele Paulus. Onkee esiku lya landula okwa lombwele aamati ye, ya mangulule mo Paulus momalyenge. Nena oye okwa hiya ihe aayambi aakuluntu naakuluntu ayehe yAajuda, ye ye koshigongi shawo nokwe eta mo Paulus e te mu thikameke komeho gawo.
© Oshindonga Bible © Bible Society of Namibia, 2008.
