2 ONDJALULO 33 - Oshindonga Bible (ONDB)

Manasse, omukwaniilwa gwaJuda

1 Manasse okwa li e na omimvo omulongo nambali, sho a ningi omukwaniilwa gwaJuda, nokwa lele omimvo omilongo ntano nantano muJerusalem. 2 Manasse okwa yono kOmuwa. Okwa landula iilonga iinyanyalithi yiigwana mbyoka Omuwa e yi tidha mo mevi, opo aantu ye ya kale mo. 3 Okwa tungulula omahala giinonoma yuupagani ngoka he Hiskia a li a kumuna po. Okwa tungu iiyambelo yokusimanekela Baal, okwa ningitha iiyelekela yoshikalungakiintu Asheera, nokwa simaneke oonyothi. 4 Okwa tungitha iiyambelo yuupagani motempeli, moka Omuwa a tile, oku na okusimanekelwa mo aluhe. 5 Momahale agehe gaali gotempeli okwa tungile mo iiyambelo yokusimanekela oonyothi. 6 Okwa yamba oyanamati omafikilondjambo mesilu lyaBen Hinnom, ya ninge omalungunithondjambo. Okwa anekelitha nokupulitha oonganga noompulile. Okwa yono nayi kOmuwa e ta tukulutha ondjahi ye. 7 Okwa tula oshiyelekela motempeli, mehale moka Omuwa a lombwele David nomwana Salomo ta ti: “Muka muJerusalem, motempeli ndjika, omo mu na ehala ndyoka nde li hogolola mokati komazimo omulongo nagaali gaIsrael, li ninge ehala moka tandi simanekelwa. 8 Ngele Aaisraeli otaa vulika kiipango yandje ayihe e taa dhiginine ompango ayihe ndjoka ya pewa komuntu gwandje Moses, nena itandi ka pitika nando, ya tidhwe mo mevi ndyoka nde li pe oohekulu.” 9 Manasse okwa fala Aajuda mepogolo enene li vule ndyoka lya pogolwa kiigwana mbyoka Omuwa e yi tidha mo moshilongo, opo aantu ye ya kale mo.

Manasse ti itedhulula

10 Omuwa nando okwa londodhele Manasse naantu ye, oya tindi oku mu pulakena. 11 Nena Omuwa okwe etha, oondjayi dhetangakwiita lyaAssur dhi homone Juda. Odha kwata Manasse, odhe mu tsu oongona, tadhi mu tula momalyenge noku mu fala kuBabilon. 12 Muuwehame we Manasse okwi ifupipike e ta galukile kOmuwa, Kalunga ke, e te mu indile ekwatho. 13 Kalunga okwa taamba egalikano lyaManasse e te li yamukula, sho e mu galulithile kuJerusalem, e ta lele ishewe. Shika osha tompo Manasse, a tseye kutya nani Omuwa oye Kalunga.

14 Konima yaambika Manasse okwa lelepeke omutumbo gwedhingililokuma lyokondje kombinga yokuuzilo woshilando shaDavid, okuza popepi noluthithiya lwaGihon molusilu sigo okOsheelo shoohi nokukondeka ngeyi ehala lyoshilando lya lukwa Ofel. Okwa langeke wo ondjayi yiita moshilandohote kehe muJuda. 15 Okwa kutha iikalunga ayihe iikwiilongo motempeli noshiyelekela shoka a tulile mo, niiyambelo yuupagani mbyoka ya li kondundu hoka kwa tungilwa otempeli nopomahala galwe muJerusalem; okwa fala iinima mbika ayihe pondje yaJerusalem e te yi ekelehi. 16 Okwo opalekulula wo oshiyambelo shoka hashi simanekelwa Omuwa e ta yamba omakwatathanondjambo nomapandulondjambo. Okwa lombwele Aajuda ayehe, ya simaneke Omuwa, Kalunga kaIsrael. 17 Nando aantu oya yamba oontselelandjambo pomahala ga li giinonoma, oye ga gandjele ashike Omuwa.

Eso lyaManasse

(2 Aak. 21:17-18)

18 Ashihe shilwe shoka Manasse a ningi, egalikano lye kuKalunga ke, nomalaka gaahunganeki mboka ya popi naye medhina lyOmuwa, Kalunga kaIsrael, oya nyolelwa membo lyondjokonona yaakwaniilwa yaIsrael. 19 Egalikano lyomukwaniilwa neyamukulo lyaKalunga, nehokololo lyokuyona kwe, manga ini itedhulula — uuwinayi mboka e u ningi, omahala giinonoma yuupagani niiyelekela yoshikalungakiintu Asheera mbyoka e yi hambulitha, niimenka mbyoka e yi longele — oya nyolelwa ayihe membo lyondjokonona yaahunganeki. 20 Manasse okwa si nokwa fumvikwa muuwa we, nomwana Ammon okwe mu landula muukwaniilwa.

Ammon, omukwaniilwa gwaJuda

(2 Aak. 21:19-26)

21 Ammon okwa li e na omimvo omilongo mbali nambali, sho a ningi omukwaniilwa gwaJuda, nokwa lele muJerusalem omimvo mbali. 22 Okwa yono kOmuwa a fa he Manasse, nokwa simaneke iimenka mbyoka he a li a simaneke. 23 Ihe ini ifupipika koshipala shOmuwa, ngaashi he a ningile; okwa li omulunde omunene e vule he.

24 Omalenga ge oge mu tsile ondumbo e tage mu dhipagele muuwa we miineya. 25 Aajuda oya dhipaga ayehe mboka ya kotokele Ammon e taa kwaniileke omwana Josia.