1 Ngoye omunandjelo mokati kaakiintu,
omuholike gwoye oku uka ano peni?
Omuholike gwoye okwa yi nondjila yini,
opo tu ke mu konge pamwe nangoye?
Omufuko:
2 Omuholike gwandje okwa yi koshikunino she,
okiimpungu yiimeno hayi zi eka lya nika nawa.
Okwa ka litha miikunino nokutona oongala.
3 Omuholike gwandje ogwandje mwene,
nangame ogwe,
ogwaangoka ta litha mokati koongala dhokelundu.
Ondjimbo ontintano
Mbushiki:
4 Kanuunyalona kandje,
ngoye owo opala wa fa Tirza,
ou na oshuuluko wa fa Jerusalem
nowa tilikilila wa fa omatanga gaakwiita.
5 Pilamenitha ndje omeho goye,
oshoka otaga gwililile ndje po.
Omafufu goye oga fa oshigunda shiikombo tayi kuluka kondundu Gilead.
6 Omayego goye oga fa oshigunda shoonzi oonyali,
opo tadhi zi mendipo.
Adhihe odha vala oonkwanambwiyu,
nomokati kadho kamu na nando oyimwe yaa na okanzona.
7 Oombandu dhoye meni lyewiiwili lyoye
odha fa oombinga dhondunga yomugranati.
8 Naku kale aanyekadhi omilongo hamano
naakiintu yopooha omilongo hetatu
naadhike yaa shi kuyalulwa,
9 onguti yandje namuyelele gwandje oku ilile.
Oye epona lyayina, omuningilwa kombunda komupulumuthi gwe.
Aakadhona oye mu tala
noye mu tanga omunelago,
aanyekadhi naakiintu yopooha oye mu simaneke.
10 Olye ngoka ta holoka mpeya ongeluwa tali tende,
omwaanawalela a fa omwedhi gwa toka,
omushekesheke a fa etango
nomuyeluki ongOmulalawili.
11 Onda yi koshikunino shominkete,
ndi ka tale omwiidhi omutalala nondi koneke,
ngele omiviinu odha tsapuka
nomugranati gwa sheneka oongala.
12 Ohaluka yowala ondjuulukwe yandje
oya kuutumbike ndje momatemba gaanamadhina yoshigwana shandje.
Ookuume:
13 Galukila huka, galukila huka,
omukadhona Omushulami;
galukila huka, galukila huka
opo tu ku tongolole nawa.
Mbushiki:
Omolwashike mwa hala okutongolola Omushulami
ngaashi muudhano kuMahanaim?
© Oshindonga Bible © Bible Society of Namibia, 2008.
