Oshigongi shomuJerusalem
1 Nena kuJudea okwa zi aalumentu yamwe e taye ya kuAntiokia. Oyo oya tameke okulonga aakwanegongalo taa ti: “Kalunga ita vulu oku mu hupitha, ngele inamu fukalekwa, ngashika shu uthwa mompango yaMoses.” 2 Nena Paulus naBarnabas oya li ye na oontamanana nomaludhi omanene naantu mboka. Onkee okwa tokolwa kutya Paulus naBarnabas nayamwe yomaakwanegongalo yomuAntiokia ya ye kuJerusalem, ya ka kundathane oshinima shika naayapostoli naakuluntu.
3 Oyo oya lalekwa ihe kegongalo, ya ye mondjila, nomokupitila muFoinikia nomuSamaria oya hokolola, nkene aapagani yi itedhulula noyi itaale Kalunga. Onkundana ndjika oye etele ooitaali ayehe enyanyu. 4 Ano sho ya thiki kuJerusalem, oya taambwa kegongalo, kaayapostoli nokaakuluntu yegongalo. Oyo noye ya hokololele ayihe mbyoka Kalunga e yi ya longitha, sho a kala pamwe nayo. 5 Ihe ooitaali yamwe yomongundu yaafarisayi oya popi noya ti: “Oyo oye na okufukalekwa, ya vulike kompango yaMoses.”
6 Nena aayapostoli naakuluntu yegongalo oya gongala, ya kundathane oshinima shika. 7 Ano sho ya kundathana ethimbo ele, Petrus okwa thikama e ta ti: “Aamwameme, omu shi shi nawa kutya pomasiku gopetameko Kalunga okwa hogolola ndje mokati keni okuuvithila aapagani elaka etoye, opo ye li uve noyi itaale. 8 Nokuli Kalunga ngoka a tseya omadhiladhilo gaantu ayehe, oku ulike kutya ota taamba naapagani wo, sho e ya pe Ombepo Ondjapuki, ngaashi naanaa e yi tu pe wo. 9 Kalunga oku ulike kutya kape na nando eyooloko lyasha pokati ketu nayo. Onkee okwa dhimi po oondjo dhawo, oshoka oyi itaala. 10 Omolwashike ano ngashingeyi mwa hala ishewe okuhinda Kalunga, sho tamu tsike ooitaali omutenge omudhigu komapepe? Omutenge tuu ngoka tse yene nootate twa nyengwa oku gu humbata. 11 Tse otwi itaala kutya otatu hupithwa kesilohenda lyOmuwa Jesus, osho nayo wo.”
12 Nena ongundu ayihe oya mwena thilu noya pulakene Barnabas naPaulus, sho taa hokolola iikumithalonga niilongankondo mbyoka Kalunga e yi ya longitha mokati kaapagani. 13 Ano sho ya mana okupopya, Jakob okwa ti: “Aamwameme, pulakenii ndje! 14 Simon opo a hulitha okupopya nokwa fatulula ngashingeyi, nkene Kalunga a tameke okwiilikolela egongalo lye mwene mokati kaapagani. 15 Oohapu dhomuhunganeki otadhi tsu kumwe thiluthilu noshinima shika. Ngaashi enyolo tali ti:
16 ‘Konima yaambika otandi ka galuka natango,
Omuwa osho ta ti.
Ngame notandi ka tungulula egumbo lyaDavid, ndyoka lya teka po.
Otandi ka fululula omikanka nomakulukuma galyo.
Otandi ke ga tungulula ishewe.
17 Nena aantu yalwe ayehe otaa ka konga Omuwa,
iigwana ayihe mbyoka nde yi ithana, yi ninge aantu yandje.
18 Omuwa ngoka a tseyithile nale aantu oshinima shika, osho ta ti.’ ”
19 Jakob okwa tsikile okupopya ta ti: “Omadhiladhilo gandje ogo ngaka: Inatu tsikeni aapagani uudhigu, ngele taa itedhulula notaye ya kuKalunga. 20 Ihe naa nyolelwe ashike ontumwafo, ya lombwelwe kutya naa idhilike iikulya ayihe mbyoka ya yambelwa iikalunga, oshoka oya nyata. Osho wo naa idhilike oluhondelo, onyama yoshinamwenyo sha pondwa, nombinzi. 21 Oshoka okuza koomvula dhonalenale ompango yaMoses oya kala hayi leshwa kehe Esabati moosinagoga adhihe dhAajuda, noohapu dhe ohadhi uvithwa miilando ayihe.”
Ontumwafo ya nyolelwa ooitaali mboka ya za maapagani
22 Nena aayapostoli, aakuluntu yegongalo negongalo alihe oya tokola okuhogolola mokati kawo aalumentu yamwe, ye ya tume kuAntiokia pamwe naPaulus naBarnabas. Oyo oya hogolola mo ihe Judas, ngoka hi ithanwa Barsabas, naSilas. Aalumentu mbaka yaali oya li ya simanekwa kaakwanegongalo ayehe. 23 Aayapostoli naakuluntu oya nyolele ihe aakwanegongalo yokuAntiokia ontumwafo noye yi pe Judas naSilas, ye yi fale ko. Ontumwafo oya li ya nyolwa ngeyi: “Otse aayapostoli naakuluntu yegongalo, ooitaali pamwe nane, otatu kundu ooitaali ooyakwetu ayehe yomuAntiokia, muSiria nomuKilikia, mboka ya za muupagani. 24 Otse otu uvu kutya aalumentu yamwe yomutse, nando inatu ya tuma, oye mu pukitha noku mu piyaganeka noohapu dhawo. 25 Onkee ano sho twa gongala notwa kundathana, otwa tokola okuhogolola mo aalumentu yamwe yomutse, tu ya tume kune. Oyo otaye ya pamwe nookuume ketu aaholike Barnabas naPaulus, 26 mboka ya hupula oomwenyo dhawo omolwoshilonga shOmuwa gwetu Jesus Kristus. 27 Ano otatu mu tumine Judas naSilas, opo ye mu lombwele kokana iinima mbyoka tatu yi mu nyolele montumwafo. 28 Tse otwa tokola mewiliko lyOmbepo Ondjapuki, twaa mu tsike we nando omutenge gulwe. Omalombwelo getu ge na oshilonga ogo ngaka: 29 Inamu lya iikulya mbyoka ya yambelwa iikalunga, ombinzi nonyama yoshinamwenyo shoka sha pondwa ne mu idhilike oluhondelo. Otamu opaleke, ngele tamu idhilike iinima mbika. Kalii po nawa!”
30 Aatumwa oya lalekwa e taa yi kuAntiokia. Ano sho ya thiki ko, oya hiya egongalo alihe noye li pe ontumwafo. 31 Oohapu ndhika odha tsu aantu omukumo noye dhi nyanyukilwa noonkondo. 32 Judas naSilas, ayehe yaali oya li aahunganeki. Oyo oya kumagidha ooitaali olule noye ya tsu omukumo. 33 Ano sho ya kala ko iiwike yimwe, ooitaali oye ya laleke nombili, ya shune kumboka ye ya tumine. 34 Ihe Silas okwa tokola okukala puyo.
35 Paulus naBarnabas oya menekele muAntiokia. Oyo oya longo e taa uvitha oohapu dhOmuwa pamwe nooyakwawo yalwe.
Paulus naBarnabas taa topoka: Ondjenda ontiyali
36 Ano sho pwa piti omasiku gamwe, Paulus okwa lombwele Barnabas ta ti: “Tu ye, tu ka talele po ooitaali ooyakwetu yomiilando ayihe moka tu uvithile oohapu dhOmuwa, tse tu ka tale, nkene ye li po.”
37 Barnabas okwa li a hala okukutha Johannes Markus, ya ye pamwe naye. 38 Ihe Paulus okwa dhiladhila kutya inashi opala okuya naye, oshoka okwa li e ya iteka muPamfilia e ta shuna kegumbo kuJerusalem. 39 Oyo oya kuthathana po e taa topoka. Barnabas okwa kutha Markus, e taa yi nosikepa kuKipro. 40 Paulus okwa hogolola Silas, ye ende pamwe naye. 41 Ano ooitaali sho ye ya gandja miikaha yesilohenda lyaKalunga, oya yi kuSiria nokuKilikia e taa kumike omagongalo.
© Oshindonga Bible © Bible Society of Namibia, 2008.
