Elisa ta kwatha omuselekadhi
1 Omuselekadhi gwomuhunganeki gumwe okwa yi kuElisa e ta ti: “Tatekulu, omusamane gwandje okwa si! Okwa li omulumentu omutilikalunga, ngaashi u shi shi. Nena omupulingunga gumwe okwa adha ndje a hala okukutha po aamwandjemati yaali omolwoongunga, ya ninge aapika ye.”
2 Elisa okwa pula a ti: “Hm, otandi ku ningi ngiinyee? Lombwela ndje, oshike u na maandjeni?”
Omukulukadhi okwa yamukula a ti: “Kandi na sha tuu, kakele kokayo ke na uugadhi.”
3 Elisa okwe mu lombwele a ti: “Inda kaashiinda yoye, u ka hehele iiyuma oyindji yaa na sha. 4 Inda ihe naamwoyemati megumbo, edhila omweelo e to tameke okupimpila omagadhi miiyuma. Shoka shu udha, shi itulila mpee.”
5 Omuselekadhi okwa yi megumbo lye pamwe noyanamati nokwe edhile omweelo. Okwa kutha okayo komagadhi e te ga tile miiyuma mbyoka oyanamati taye mu etele. 6 Sho yu udhitha iiyuma ayihe, okwa pula, ngele opu na natango oshiyuma. Gumwe gwomoyanamati okwa ti: “Aawe, shika osho sha li shahugunina.” Omagadhi noga sheka okuvila. 7 Omuselekadhi okwa shuna komuhunganeki Elisa, ngoka a ti kuye: “Landitha po omagadhi e to futu oongunga dhoye adhihe noto ki ihupithila po iimaliwa ye ku gwanena naamwoyemati, mu ipaluthe nayo.”
Elisa nomukiintu omuyamba Omushunem
8 Esiku limwe Elisa okwa yi kuShunem, nkoka kwa li omukiintu omuyamba. Omukiintu okwe mu ithana komwiha, nokuza mpoka shaa ngaa a ka yile kuShunem, oha li megumbo lyaandjawo. 9 Omukiintu okwa lombwele omulume a ti: “Ngame ondi shi shi nawa kutya omulumentu nguka he ya kaandjetu olwindji, oye omuyapuki. 10 Natu mu tungile ela lye kombanda yongulu moka mwa tulwa ombete, oshitaafula, oshipundi nolamba, opo a vule okumenekela putse, uuna te tu talele po.”
11 Esiku limwe Elisa okwa galukile kuShunem e ta londo, a ka vululukwe mondunda ye pombanda. 12 Okwa lombwele omumati gwe Gehasi, a ye a ka ithane omukulukadhi. Sho e ya, 13 okwa ti kuGehasi: “Mu pula kutya okwa hala ndi mu ningile shike, sho e tu kwatha ngeyi moompumbwe dhetu. Pamwe okwa hala ndi ye nando okomukwaniilwa nenge kondjayi yaakwiita, ndi ke mu popile.”
Omukiintu okwa yamukula a ti: “Ondi na ayihe nde yi pumbwa, oshoka ondi li mokati kaantu yaandjetu.”
14 Elisa okwa pula Gehasi a ti: “Ope na tuu sha te vulu oku mu ningila?”
Gehasi okwa yamukula a ti: “Ope na, oshoka ke na munona, nomulume okwa kulupa.”
15 Elisa okwa ti: “Mu ithana, e ye huka.” Omukiintu okwe ya nokwa thikama pomweelo. 16 Elisa okwa ti kuye: “Pethimbo ngaandika omumvo tagu ya oto ka kala wa ukata okanona okamati momaako goye.”
Omukiintu okwi igidha a ti: “Atyetyetye! Tatekulu, ino fundja ndje. Ngoye omuntu gwaKalunga.”
17 Ihe lwopethimbo ngaandyoka lyomumvo gwa landula ko omukiintu okwa vala okanona okamati, ngaashi Elisa a tile.
18 Omimvo dhimwe sho dha piti po, pethimbo lyeteyo, omumati okwa zi megumbo ongula yimwe, a ye kuhe a li mepya pamwe naateyi. 19 Ohaluka okwi igidha he ta ti: “Omutse gwandje tagu pwatuka! Omutse gwandje tagu pwatuka!”
He okwa ti komupiya: “Fala omumati kuyina!” 20 Omupiya okwe mu yambula po e te mu fala kuyina, ngoka e mu kuutumbike komatundji ge sigo omutenya, nopethimbo ndyoka omumati okwa si. 21 Yina okwe mu yambula po e te mu fala mondunda yaElisa. Okwe mu langeke kombete e ta zi po nokwe edhile omweelo. 22 Nena okwi ithana omulume e ta ti kuye: “Tumina ndje omupiya nokasino. Ote pumbwa okuya komuhunganeki Elisa. Otandi galuka mbalambala.”
23 Omulume okwe mu pula a ti: “Omolwashike u na okuya nena? Kali shi esiku lyEsabati nenge oshituthi shomwedhi omupe.”
Omukiintu okwa yamukula a ti: “Kape na mbudhi.” 24 Nena okwa kutilitha okasino e ta lombwele omupiya ta ti: “Tidha okasino, ke endelele; ino fudha, manga inaandi ku lombwela!” 25 Osho a zi mo e ta yi kondundu Karmel, nkoka kwa li Elisa.
Elisa okwe mu mono te ya kuye, manga a li kokule e ta ti komumati gwe Gehasi: “Tala, omukulukadhi gwokuShunem! 26 Endelela, u ke mu pule, ngele ye mwene, omulume nomwanamati oye li tuu nawa.”
Omukulukadhi okwa lombwele Gehasi kutya oye li nawa, 27 ihe sho e ya kuElisa, okwe mu inyongamene e te mu kwata koompadhi. Gehasi okwa li a hala e mu undule po, ihe Elisa okwa ti: “Mu etha; ku wete kutya okwa nika oluhodhi olunene? NOmuwa ine shi lombwela ndje.”
28 Omukulukadhi okwa ti kuye: “Tatekulu, onde ku pulile omunona? Kanda li nda tya, ino fundja ndje?”
29 Elisa okwa shuna kuGehasi e ta ti: “Endelela! Kutha ondhimbo yandje e to yi. Ino thikama, u kunde ngo te ku tsakaneke, nongele ku na ngoka te ku kundu, ino mana po ethimbo noku mu yamukula. Ukilila kegumbo nou yeluthile ondhimbo yandje komumati.”
30 Omukulukadhi okwa ti kuElisa: “Otandi gana kOmuwa omunamwenyo nokungoye kutya itandi ku thigi po!” Osho ngaaka Elisa okwa yi pamwe naye. 31 Gehasi okwe ya tetekelele e ta yeluthile omumati ondhimbo yaElisa, ihe muye kamwa li omufudho nenge endhindhiliko lyomwenyo. Onkee a shuna, a ka tsakaneke Elisa e ta ti: “Omumati ina penduka nande.”
32 Elisa sho a thiki, okwa yi mondunda oye awike e ta mono omumati a lala mombete a sa. 33 Okwe edhile omweelo nokwa galikana Omuwa. 34 Nena okwa lala pomumati a tula okana ke pokana komumati, omeho ge pomeho gomumati niikaha ye piikaha yomumati. Sho a lala a laminina omumati, olutu lwomumati olwa tameke okupupyala. 35 Elisa okwa penduka po, e endagula nondunda nokwa shuna ishewe e ta lala komumati. Omumati okwa shemita luheyali, nopo ihe a tonata. 36 Elisa okwi ithana Gehasi e te mu lombwele, i ithane yina yomumati. Yina sho e ya mo, Elisa okwa ti kuye: “Omumwoye oye nguka.” 37 Nena yina okwi inyongamene koompadhi dhaElisa a tsa oshipala pevi; opo ihe okwa toola po omwana e ta yi.
Iinyengandunge iyali iinene
38 Esiku limwe oshilongo ashihe sho sha li shi na ondjala, Elisa okwa galukile kuGilgal. Manga a li ta nongeke ongundu yaahunganeki, okwa lombwele omupiya gwe, a tule po ombiga onene peziko, e ya telekele iikulya. 39 Gumwe gwomuyo okwa yi melundu, a ka tale iikwamboga. Okwi itsu okatanga kamuthithi e ta kutha ko uutanga, ngaashi ta vulu oku u humbata monguwo ye. Okwe u eta e te u pambulile mombiga, oshoka ine u tseya. 40 Iikulya oya hukulilwa aantu ya lye, ihe sho ye yi makele, oyi igidha Elisa taa ti: “Eso mombiga!” — noinaa vula oku yi lya. 41 Elisa okwa pula, e etelwe uusila, e te u zikile mombiga e ta ti: “Yi hukululileni ishewe aantu.” Nena kapwa li we oshiponga shasha.
42 Esiku limwe omulumentu gumwe okwa zi kuBaal Shalisha e etela Elisa iikwiila omilongo mbali yiilya iipe yomumvo ngoka nomaha omayihu. Elisa okwa lombwele omupiya gwe, a paluthe nayo ongundu yaahunganeki, 43 ihe omupiya okwa yamukula a ti: “Oto dhiladhila kutya otayi gwanene aalumentu ethele?”
Elisa okwa yamukula a ti: “Yi ya pa, ya lye, oshoka Omuwa ota ti, otaa ka lya e taa hupitha ko.” 44 Omumati okwa tula iikulya puyo, nongaashi Omuwa a popi, ayehe oya lya nokwa hupu sha natango.
© Oshindonga Bible © Bible Society of Namibia, 2008.
