Omukwaniilwa gwaJuda Jotam
(2 Aak. 15:32-38)1 Jotam okwa ningi omukwaniilwa mepipi lyomimvo omilongo mbali nantano, nokwa lele muJerusalem omimvo omulongo nahamano. Yina oJerusha yaSadok. 2 Okwa longo shoka sho opalela Omuwa, ngashika naanaa he a ningile; ihe ina yona a fa he, a fike ando iitsinino motempeli, ihe oshigwana osha tsikile ngaa muulunde.
3 Jotam okwa tungu Osheelo shuumbangalantu wotempeli. Okwa tungu wo ombinga onene yedhingililokuma lyomuOfel muJerusalem. 4 Okwa tungitha iilando moondundu dhaJuda, nomomakuti okwa tungitha mo omapopilongulu nooshungo. 5 Okwa kondjitha omukwaniilwa gwaAmmon netangakwiita lye e te ya sindi. Nena okwa thiminike Aayammoni, ye mu fute omumvo kehe omimvo ndatu oshisiliveli shookilograma 3400, osiima yoolata 1000 niishokelya yoolata 1000. 6 Jotam okwa ningi omunankondo, oshoka okwa vulika lela kOmuwa, Kalunga ke. 7 Iiningwanima yilwe mepangelo lyaJotam, iita ye nomulandupangelo gwe oya nyolelwa membo lyondjokonona yaakwaniilwa yaIsrael naJuda. 8 Jotam okwa li e na omimvo omilongo mbali nantano, sho a ningi omukwaniilwa, nokwa lele muJerusalem omimvo omulongo nahamano. 9 Okwa si e ta fumvikwa moshilando shaDavid, nomwana Ahas okwe mu landula muukwaniilwa.
© Oshindonga Bible © Bible Society of Namibia, 2008.
