Oonkundathana oontiyali
(15:1—21:34)Elifas ta popi
1 Elifas Omuteman okwa yamukula ngeyi:
2 Job, omunamayele ota gandja tuu eyamukulo lyaa na oondunge,
nenge otu udhitha ela lye nombepo ompyu yokuuzilo?
3 Ota ningi omaludhi gaa na shilonga,
oohapu dhaa na sho tadhi kwatha?
4 Ihe ongoye to hanagula po etilokalunga
noto dhini okugalikana Kalunga.
5 Oondjo dhoye otadhi holoka moohapu dhoye;
oto landula okupopya kwaaniineya.
6 Okana koye oko take ku pangula, hangame;
omilungu dhoye mwene tadhi ku tompo.
7 Ongoye omuvalwa gwotango mokati kaantu?
Owa valwa, manga oondundu inaadhi holoka?
8 Owa pulakenene oompangela dhaKalunga?
Oto dhiladhila ongoye awike omunandunge?
9 Oshike wa tseya, tse kaatu shi shi?
Omatseho ogeni po u na kaatu ga na?
10 Aakulupe naasamane yoomvi oye li nomokati ketu,
aasamane aakuluntu nokuho.
11 Omahekeleko gaKalunga inage ku gwana,
noohapu oontalala we dhi lombwelwa?
12 Omolwashike omwenyo gwoye tagu ku thigi po,
nomeho goye taga pakuma?
13 Owa geela Kalunga,
sho to pititha mo oohapu dha tya ngawo mokana koye?
14 Omuntu a wape ngiini okukala omuyelele,
omuvalwa komukiintu a ninge omuyuuki?
15 Ngele nomaayapuki ye ini inekela mo nando ogumwe,
negulu lyo lyene inali yela momeho ge,
16 omuntu haye ngoka a nyata nokwa yonuka,
ta nu uulunde ngaashi omeya?
17 Job, pulakena ndje, ndi ku pukulule,
nandi ku lombwele shoka nda mona.
18 Aanamayele oya hokolola
yo inaa holeka shoka ye shi uva koohekulu.
19 Oyo ayeke ya li mo moshilongo;
mokati kawo kamwa li omukwiilongo.
20 Omukeenakalunga oku li muudhigu omasiku agehe;
uuwehame owe mu tegelela.
21 Oonkugo nomahalutho otage ya momakutsi ge;
uuna a fa a fudha po,
omuhanaguli ote mu matukile.
22 Ita vulu okuhunuka mo momilema;
oku uthilwa a se kegongamwele.
23 Ota telagana ta kongo iipalutha
ye ina tseya esiku lyoshiponga li li popepi.
24 Uuwehame nuumbanda otau mu tilitha,
otau mu adha ngaashi ehomono tali akele omukwaniilwa.
25 Okwa ganeke omaako ge, a kondjithe Kalunga,
nokwi inenepekele Omunankondoawike.
26 Otu ukilile Kalunga e na othingo ya taganana
nehuuyanza lya kola.
27 Oshipala she okwe shi gwayeka omagadhi;
omatundji ge oga pama,
28 ihe ota ka kala miilando ya yonuka po
nomomagumbo gaa na aantu;
oga ethiwa ga ningi oondumba dhomamanya.
29 Oye ita yambapala we;
uuyamba we itau kalelele,
nomaliko ge itaga ihana we noshilongo.
30 Ita zi mo we momilema;
omulilo otagu fike iitutuma ye,
nomufudho gwomokana kaKalunga otagu mu tidha po.
31 Inamu mu etha i ifundjaleke netalaleko lyaa na oshilonga,
oshoka ita ka likola sha.
32 Ota ka lemba, manga e li metifa lyokukala kwe;
ota ka ganya ngaashi oshitayi ye ita penduka po we.
33 Ota ka fa omuviinu tagu yagumuka omagongwa,
nokwa fa omuolivi tagu yagumuka oonsheno.
34 Aakaanakalunga kaye na oluvalo,
nomulilo otagu lungunitha po omatsali gaaholi yoombumbo.
35 Otaa kokitha uupyakadhi e taa vala omalwa;
otaa kokitha omakotokelo meni lyawo.
© Oshindonga Bible © Bible Society of Namibia, 2008.
