Hosea ti igameke kuIsrael
1 Israel, shuna kOmuwa Kalunga koye. Omayono goye oge ku pundukitha. 2 Shuneni kOmuwa meitedhululo, mu mu galikane mu tye: “Dhima po omayono getu agehe, taamba omagalikano getu notatu ke ku hambelela, ngashi tu uvaneke. 3 Assur ita vulu oku tu hupitha nando, nuukambe wiita itau vulu oku tu gamena. Itatu lombwele we iikalunga, tu tye oyo Kalunga ketu. Omuwa, ongoye to sile ohenda mboka taa galukile kungoye.”
Omuwa tu uvanekele Israel okukala okupe
4 Omuwa ota ti:
“Otandi ka galulila aantu yandje kungame.
Otandi kala ndi ya hole nomwenyo gwandje aguhe;
itandi ya geele we.
5 Ote kala noshigwana shaIsrael
ngaashi omvula mevi lyoluteni.
Otaa ka tsapuka ya fa oongala;
otaa ka mena omidhi dha ya muule,
ya fa omiti dhokuLibanon.
6 Otaa ka kala mokukoka okupe,
yo opala ya fa omiti dhooholivi.
Otaa ka taandelitha ezimba ewanawa.
ngaashi omisendeli dhaLibanon.
7 Esiku limwe otaa ka kala ishewe megameno lyandje.
Otaa ko opala ya fa oshikunino
noyu udha iiyimati ya fa oshitsambe shomiviinu.
Otaa ka simana ya fa omaviinu gaLibanon.
8 Oshigwana shaIsrael
itashi kala we shi na sha niimenka;
otandi yamukula omagalikano gawo
e tandi ya sile oshimpwiyu.
Ongomuti gwokwaziza tandi ke ya shiga;
ongame othithiya yomayambeko agehe.”
Ehulitho
9 Mboka ye na oondunge, naa uve shoka sha nyolwa mpaka, opo ye shi taambe komitima. Oondjila dhOmuwa odhu uka, naantu aayuuki otaa kala noku dhi lamba, ihe aalunde otaa pundukile po, oshoka inaa hala oku dhi tseya.
© Oshindonga Bible © Bible Society of Namibia, 2008.
