Emoniko lyontungwa yiiyimati
1 Onda mono emoniko ekwawo lya zi kOmuwa Omupangeliawike. Mulyo onda mono ontungwa yiiyimati. 2 Omuwa okwa pula: “Amos, owa tala shike?”
Onda yamukula: “Ontungwa yiiyimati.”
Omuwa okwa ti kungame: “Ehulilo lyoshigwana shandje Israel, olya hedha ko. Itandi ke ya sila we ohenda. 3 Esiku ndyoka omaimbilo gomuuwa otaga ka shituka oosa. Omidhimba otadhi ka kala akuhe. Otadhi ke ekelwahi pwa tya tuu thilu.”
Epangulo lyaIsrael
4 Pulakeneni shika, ne mboka hamu lyatagula oohepele notamu kambadhala okuhutula aafupi moshilongo. 5 Otamu lombwelathana ne yene tamu ti: “Oshituthi shomwedhi omupe otashi hulu po uunake, tu matule iigandhi, opo tu landithe po iilya yetu? Esabati otali hulu po uunake, opo tu tameke okulanditha ishewe? Nena otatu vulu okushonopeka iiyelekitho, okuyelutha oondando nokukengelela niiviha yomakoto. 6 Otatu vulu okulanditha iilya yomako nondando yopombanda. Otatu ka mona ohepele ngoka ta ka nyengwa okufuta oongunga dhe, ta nyengwa okufuta nokuli epando lyoongaku, nena otatu mu landa po, a ninge omupika.”
7 Omuwa, Kalunga kaIsrael okwa gana a ti: “Kandi na mpoka ne dhimbwa iilonga yawo iiwinayi. 8 Omolwashoka evi otali ka kakama, naantu ayehe moshilongo otaa ka yemata. Oshilongo ashihe otashi ka ndjingandjingwa; otashi ki itumba nokuthootela sha fa omulonga Niili. 9 Esiku otali ya, uuna tandi ka ninginitha etango moshanga shomutenya, nuusiku tau kwidhidhike evi, manga omutenya. Ongame, Omuwa Omupangeliawike, nda popi. 10 Iituthi yeni otandi ke yi shitukitha oosa nomaimbilo geni okulila oosa. Otandi ke mu ikululitha omitse dheni noku mu izalekitha omahahi, notamu ka fa aavali taa lili omwanamati epona. Esiku ndyoka otali ka ninga elulu, sigo opehulilo.
11 “Esiku otali ya, uuna tandi ka tumina oshilongo ondjala. Aantu otaa ka sa ondjala, ihe hayoshikwiila; otaa ka sa enota, ihe halyomeya. Otaa ka sa ondjala nenota lyohapu yOmuwa. Ongame, Omuwa Omupangeliawike, nda popi. 12 Aantu otaa ka matuka okuza kuumbangalantu sigo okuumbugantu nokuza kuuzilo sigo okuuninginino. Otaa ka konga shaa mpoka ohapu yOmuwa, ihe itaye yi mono. 13 Pomasiku ngoka aakadhona aawawawawa, naamatyelela oondjolowele ayehe otaa ki ihunya mumwe kenota. 14 Ayehe mboka haa gana kuAshima, oshikalungakiintu shaSamaria, mboka taa ti: ‘Oshikalunga shokuDan’ nenge: ‘Oshikalunga shokuBeersheba’ — aantu mboka ayehe otaa ka pundukila po yo itaa ka yambuka po we.”
© Oshindonga Bible © Bible Society of Namibia, 2008.
