HESEKIEL 23 - Oshindonga Bible (ONDB)

Jerusalem naSamaria taa hondele naapagani

1 Omuwa okwa lombwele ndje a ti: 2 “Muna gwomuntu, okwa li ku na aakiintu yaali aamwayinathana. 3 Sho ya li aakadhona, oya li muEgipiti, oya miti e taa ningi oohonda. 4 Edhina lyosheeli oOhola (tashi ti Samaria) nonkelo oOholiba (tashi ti Jerusalem). Onde ya hokana ayehe noya valele ndje aanona. 5 Ohola nando okwa li omukiintu gwandje, okwa kala moluhondelo nokwa lalwa naye kaaholi Aayassur. 6 Oya li aakwiita ya zala oonguwo oombwilili, oya li aanenentu nomalenga oondjayi; ayehe oya li aanashihako aagundjuka ya shitika aakayili yuukambe. 7 Okwa li omukiintu gwomalenga agehe gaAssur, nuuhalu we owe mu fala meinyateko lyokusimaneka iimenka yAayassur. 8 Okwa tsikile moluhondelo lwe ndoka a tamekele muEgipiti, moka a mitile. Okuza kuukadhona we oha lala naalumentu noye mu hondele. 9 Onkee onde mu gandja kaaholi ye Aayassur mboka e ya hole unene. 10 Oye mu hula iiteta e taa kwata po oyana aamati naakadhona e taye mu dhipaga po negongamwele. Okwa ningi elondodho kaakiintu yalwe, mboka ye mu pangula moohapu dhawo.

11 “Omumwayina Oholiba nando e shi mono, okwa ningi owala ombwanda, ohonda e vule Ohola. 12 Naye wo okwa li a halelela aanenentu naanashihako Aayassur — aakwiita ya zala yo opala — naakayili yuukambe, aamati ayehe ya shitika. 13 Onde shi mono kutya okwa mwamwelwa thilu, ayehe yaali oya faathana.

14-15 “Okwa ningine muuleeleka wuuhalu we. Okwa hilwa komathano gaanashihako aanenentu yaBabilonia ya fanekelwa kekuma nondomo ontiligane ye na omakwamo moombunda nomatsilu go opala komitse dhawo. 16 Sho a mono omathano gawo, mbalambala okwe ya haluka e ta tumu aatumwa kuyo muBabilonia. 17 Aababilonia oye ya, ya lale naye. Oye mu nyateke noluhondelo, sigo e ya nyanyala. 18 Okwi isuukulula montaneho, noshaa ngoka okwa tseya kutya ye omuniihulo. Onde mu nyanyala, ngaashi nda nyanyalele omumwayina. 19 Okwa pwile moluhondelo, ta lalwa naye, ngaashi a li he shi ningi kuukadhona, sho a li ohonda muEgipiti. 20 Okwa li a halelela aalumentu yuulumentu wuusino nomasita ga fa guukambe uutsezi.” 21 (Oholiba, owa halele iipala yokuukadhona woye, sho wa li muEgipiti, moka ye ku papatele montulo e taa pampadhala omagundji goye, nowa kanitha uukadhona woye.)

Kalunga ta pangula omukadhona onkelo

22 “Oholiba, ngame, Omuwa Omupangeliawike, otandi ku lombwele te ti: Owa kunyukwa oohonda dhoye, ihe ngame otandi ke dhi sikumudha, dhi ku geele, notadhi ku homona koombinga adhihe. 23 Otandi ka eta Aababilonia ayehe nAakaldea, aantu yokuPekod, Shoa naKoa, nAayassur ayehe. Otandi gongele aalumentu mboka ayehe aagundjuka aanenentu naanashihako, omalenga agehe ga simana naakayilinkambe ayehe oondjayi. 24 Otaye ke ku ponokela taa zi kuumbangalantu taa etelele etangakwiita enene ye na omatembakwiita nomatemba gu udha taa gamenwa komahuuyanza nomagala giiyela. Otaye ku kunduka. Otandi ke ku gandja miikaha yawo, notaye ku pangula pampango yawo. 25 Molwaashoka onde ku geela, otandi ya etha ye ku geele. Otaa ka teta eyulu lyoye nomakutsi goye notaa dhipaga aamwoye aamati naakadhona. Eeno, otaa ka kwata po aamwoye aamati naakadhona e taye ya fike po ye na omwenyo. 26 Otaa togonyona oonguwo dhoye e taa kutha po iipako yoye. 27 Uuhalu woye otandi u hulitha po nokuhola aalumentu kwoye hoka wa li u hole muEgipiti. Ito ka simaneka we nando oshimenka shimwe nenge u dhiladhile we Egipiti.”

28 Omuwa Omupangeliawike ota ti: “Otandi ke ku gandja miikaha yaantu u ya tonde noku ya nyanyala. 29 Molwaashoka ye ku tonde, otaa ka yuga po ashihe shoka wa longele notaye ku thigi olutu lwowala, owa yanunwa wa fa ohonda. Uuhalu woye nokuhondelwa kwoye 30 okwo kwe ku etele mbika. Owa li ohonda yiigwana nowi inyateke niimenka yayo. 31 Owa landula oshinkoti shomumwanyoko, notandi ke ku pa oshitenga she shegeelo, u nwe mo.”

32 Omuwa Omupangeliawike ota ti:

“Oto ka nwa mo moshitenga shomumwanyoko,

osho oshinene shi na omutima.

Shaa ngoka ote ke ku nyonkela noku ku dhina,

oshitenga oshu udha.

33 Otashi ke ku kolitha

noto ka udha oluhodhi.

Osho oshitenga shuumbanda noshokuyona,

oshitenga shomumwanyoko Samaria.

34 Oto ke shi nwa noku shi dhindolola,

niitandu yasho oto nkwanuna omagundji goye.

Ongame, Omuwa Omupangeliawike, nda popi.”

35 Ngashingeyi Omuwa Omupangeliawike ota popi ta ti: “Molwaashoka wa dhimbwa ndje nowa pilamene ndje, oto ka tala omalwa omoluuhalu nokuhola iipala kwoye.”

Kalunga ta pangula aamwayinathana ayehe yaali

36 Omuwa okwa lombwele ndje a ti: “Muna gwomuntu, owi ilongekidha tuu okupangula Ohola naOholiba? Ya tamaneka molwiinima iinyanyalithi ye yi ningi. 37 Oya hondele noya dhipaga — ya hondele niimenka noya dhipaga po aamati mboka ye ya valele ndje. Aamwandje oye ya yambele iimenka. 38 Inaa ninga shika ashike. Oya nyateke otempeli yandje e taa yono Esabati, ndyoka nda tula po. 39 Esiku tuu ndyoka ya dhipaga po aamwandje e taye ya yambele iimenka, oye ya kotempeli yandje e taye yi nyateke.

40 “Oya tumu nokutumununa aahiyi, ya ka hiye aantu ye ye taa zi kokule, noye ya. Aakiintu oyi iyogo noya gwayeke iikulugumbo yawo e taa zala iipako yawo. 41 Oya kuutumba koombete dho opala, komeho gawo oku na oshitaafula sha tulwa iitsinino nomagadhi gooholivi ngoka nde ya pe. 42 Ombuyagano yongundu yaalumentu ya shambukwa otayi uvika. Mokati kaalumentu yaamakaha omwa li wo aanwi ya zi kombuga. Oya zaleke aakiintu uugondo komaako niikayiwa yuulenga komitse. 43 Onda popi nda ti: ‘Oh, otaa hondele nomukiintu a kulupila moluhondelo!’ 44 Oya li haa shuna koohonda ndhika ishewe niishewe. Oya galukile kuOhola naOholiba, aakiintu mboka ye hole aalumentu. 45 Aalumentu aayuuki otaye ke ya pangula molwoluhondelo nedhipago, oshoka otaa hondele, niikaha yawo oya nika ombinzi.”

46 Omuwa Omupangeliawike ota popi ta ti: “Ya hiyileni ongundu, yi ya haluthe yo yi ya yuge. 47 Ongundu nayi ya dhenge nomamanya noyi ya ponokele nomagongamwele. Nayi dhipage oyana aamati naakadhona nokufika po omagumbo gawo. 48 Moshilongo ashihe otandi ka hulitha mo oluhondelo, shi ninge elondodho komukiintu kehe, kaa hondele we, ngaashi mbeyaka yaali ya ningi. 49 Ne aamwayinathana, otandi mu geelele oluhondelo lweni nuulunde weni wokusimaneka iimenka. Notamu ka tseya kutya ongame Omuwa Omupangeliawike.”