Uulunde waJerusalem
1 Omuwa okwa lombwele ndje a ti: 2 “Muna gwomuntu, owi ilongekidha okupangula oshilando shoka shu udha aadhipagi? Shi yelithila iinima ayihe iinyanyalithi mbyoka sha ningi. 3 Lombwela oshilando shoka ngame, Omuwa Omupangeliawike, tandi ti: Molwashoka wa dhipaga aantu yoye oyendji nowi inyateke mokusimaneka iimenka, ethimbo lyoye olya thikana. 4 Ou na uutoni wedhipago nowa nyatekwa kiimenka mbyoka wa ningi, onkee ethimbo lyoye lya thiki, lya pu po! Omolwashoka nda zimine, iigwana yi ku ningile iihelele, niilongo ayihe otayi ku sheke. 5 Iilongo yopopepi naambyoka yokokule otayi ku sheke, ngoye oshilando sha nyata noshaa na elandulathano. 6 Aawiliki yaIsrael ayehe oyi itula oonkondo dhawo yene notaa dhipaga. 7 Moshilando kamu na ngoka ta simaneke he nayina. Otamu kotokele aakwiilongo e tamu yugu aaselekadhi noothigwa. 8 Itamu simaneke omahala omayapuki noitamu yapula Esabati. 9 Yamwe yomune otaa fundju ooyakwawo, opo ye ya dhipage po. Yamwe yomune otaa li oohula dha saagelelwa iimenka. Yamwe otaa kutitha uuhalu wawo. 10 Yamwe yomune otaa lala naakulukadhi yoohe. Yamwe otaa thiminike aakiintu ye li komwedhi, ya lale nayo. 11 Yamwe otaa hondele notaa pukitha iitenya yawo iikiintu nenge aamwahe aakiintu. 12 Yamwe otaa pula Aaisraeli ooyakwawo ontanitho kongunga notaa likola moku ya yuga. Oya dhimbwa ndje.” Ongame Omuwa Omupangeliawike, nda popi.
13 “Otandi dhenge omake gandje kumwe omolwomayugo nomadhipago muJerusalem. 14 Oto dhiladhila kutya oto kala u na omukumo nenge oonkondo u yeluthe omaako goye, uuna nda mana oku ku ningila shoka tandi ningi? Ongame, Omuwa, nda popi notandi dhiginine oohapu dhandje. 15 Otandi ka halakanitha aantu yoye niilongo ayihe nomiigwana ayihe e tandi ka hulitha po iilonga yoye iiwinayi. 16 Iigwana yilwe otayi ke ku dhina, ihe oto ka tseya kutya ongame Omuwa.”
Ezikoyelitho lyaKalunga
17 Omuwa okwa lombwele ndje a ti: 18 “Muna gwomuntu, Aaisraeli oya shunduka. Oya ningi omange; oyo oshikushu, otina, oshiyela oshiluudhe noshumbu sha thigala meziko lyomupepo, oshisiliveli sho sha yelithwa. 19 Onkee ngashingeyi ngame, Omuwa Omupangeliawike, otandi ya tseyithile kutya oya fa omange, kaye na we oshilonga. Otandi ke ya gongela ayehe muJerusalem, 20 ngaashi oshisiliveli, oshikushu, oshiyela oshiluudhe, oshumbu notina tayi tulwa meziko lyeyelitho. Ondjahi yandje nuupyundjahi otau ke ya hemukitha, ngaashi eziko tali hemuna uutale. 21 Eeno, otandi ke ya gongela muJerusalem e tandi ya temene omulilo notandi ya hemuna nondjahi yandje. 22 Otaa ka hemuninwa muJerusalem, naanaa ngaashi oshisiliveli tashi hemunwa meziko, oyo notaa ka tseya kutya Omuwa okwe ya poolele ondjahi ye.”
Uulunde waawiliki yaIsrael
23 Omuwa okwa lombwele ndje ishewe a ti: 24 “Muna gwomuntu, lombwela Aaisraeli kutya evi lyawo inali yela, onkee tandi ke li geela mondjahi yandje. 25 Aawiliki oya fa oonime tadhi gonene onyama yiiyamakuti dhe yi dhipaga. Otaa dhipaga aantu, taa yugu po iimaliwa ayihe neliko alihe taa mono, notaa indjipalekele mo aaselekadhi. 26 Aayambi otaa taaguluka ompango yandje noitaa simaneke uuyapuki. Itaa yoolola pokati koshinima oshiyapuki naashoka shaa shi oshiyapuki. Itaa nongele eyooloko pokati kiinima ya yogoka naambyoka ya nyata, nokaye na ko nasha nEsabati. Molwaashika Aaisraeli itaa simaneke ndje we. 27 Omalenga oga fa omambungu taga hwagununa po iimuna mbyoka ge yi dhipaga. Otaga dhipaga, opo ga ninge omayamba. 28 Aahunganeki oya holeke uulunde mbuka ya fa aantu taa kolonga ekuma nokaalaka. Otaa mono omamoniko giifundja e taa hunganeke dhanakalindi. Otaa uvitha oohapu dhOmuwa Omupangeliawike, ihe ngame, Omuwa, inandi dhi ya lombwela. 29 Aantu yoshilongo shika ohaa hepeke yo taa yugu. Otaa hepeke oohepele notaa kutha ombambyona kaakwiilongo. 30 Onda lengalenga, ndi konge muyo ngoka ta vulu okutunga omakuma, a thikame peha mpoka omakuma ga mwahuka, ye a popile oshilongo, uuna ondjahi yandje ya hala oku shi yona po, ihe inandi mona nando ogumwe. 31 Onkee ano otandi ya tilile ondjahi yandje ya hwama ya fa omulilo, otandi ya hanagulile po iilonga mbyoka ye yi ningi.” Omuwa Omupangeliawike a popi.
© Oshindonga Bible © Bible Society of Namibia, 2008.
