Oshivu shiimuna
1 Omuwa okwa lombwele Moses a ti: “Inda u ka lombwele omukwaniilwa kutya Omuwa, Kalunga kAahebeli, ota ti: ‘Laleka aantu yandje, opo ya ka simaneke ndje. 2 Ngele oto tindi ishewe oku ya laleka, 3 otandi ke ku tumina oshivu oshidhigu miimuna yoye ayihe: uukambe, uusino, oongamelo, oongombe, oonzi niikombo. 4 Otandi ka yoolola pokati kiimuna yAaisraeli naambyoka yAayegipiti; kape na oshimuna shAaisraeli shimwe tashi ka sa. 5 Ngame Omuwa ondu utha, ndi shi tsakanithe ongula yanakwasha moshilongo shika.’ ”
6 Esiku lya landula Omuwa okwa ningi, ngaashi a tile. Iimuna ayihe yAayegipiti oya si, ihe kape na nando oshimuna shOmuisraeli shimwe sha sa. 7 Omukwaniilwa okwa tumu okutala iimuna yAaisraeli, ihe inaku sa nando oshimwe. Ihe omwenyo gwomukwaniilwa ogwa li gwa kukuta, noina laleka oshigwana shi ye.
Iitumbuka
8 Nena Omuwa okwa lombwele Moses naAaron a ti: “Kutheni omutoko peziko gu udha omake geni; Moses ne gu gundile mombepo koshipala shomukwaniilwa. 9 Otagu ka gunduka gwa fa ontsi naEgipiti alihe, noshaa mpoka otagu tukula po iitumbuka mbyoka tayi ningi iilalo tayi ehameke aantu niimuna.” 10 Oya kutha omutoko e taa yi koshipala shomukwaniilwa. Moses okwe gu gundile mombepo, nogwe eta iitumbuka e tayi ningi iilalo kaantu nokiimuna. 11 Oompulile inadhi holoka ko we koshipala shaMoses, oshoka odha li dha kakata iitumbuka dha fa Aayegipiti ooyakwawo. 12 Ihe Omuwa okwa kukutike omwenyo gwomukwaniilwa, naanaa ngaashi a tile, nomukwaniilwa ina pulakena we Moses naAaron.
Oompawe
13 Omuwa okwa lombwele Moses a ti: “Meneka ongula onene, u ka tsakaneke omukwaniilwa u mu lombwele kutya Omuwa, Kalunga kAahebeli, ota ti: ‘Laleka aantu yandje, opo ya ka simaneke ndje. 14 Ngashingeyi otandi ke ku tumina omageelo gandje agehe, ge ku hepeke ngoye mwene, omalenga goye naantu yoye, opo u ke shi tseye kutya kaku na ngu a fa ndje muuyuni auhe. 15 Ando nde ku dhenge pamwe naantu yoye noshivu, ando wa kombwa po nale kombanda yevi. 16 Ihe opo ndi ku ulukile oonkondo dhandje, onde ku kaleke ko u na omwenyo, opo esimano lyandje li taandele nuuyuni auhe. 17 Ihe natango owa tangalala nowa tindi okulaleka aantu yandje ya ye. 18 Ongula pethimbo ngaandika otandi ka tukula oshikungulu shoompawe oshidhigu shoka inaashi tseyika nale muEgipiti okuza ketameko ndongo onena. 19 Ngashingeyi lombwela ayehe naayihe u yi na, yi kale megumbo meni. Oompawe otadhi ka lokela kaantu nokiimuna ayihe tayi adhika pondje notayi si.’ ” 20 Omalenga gamwe gomukwaniilwa ngoka ga li ga tila oohapu dhOmuwa, oga fala aapika yawo niimuna yawo, yi ondame meni megameno. 21 Gamwe inaga pupa ko kelondodho lyOmuwa noye ethele aapika yawo niimuna yawo pondje.
22 Omuwa okwa lombwele Moses a ti: “Yeluthila okwooko kwoye kegulu, noompawe otadhi ka loka mevi alihe lyaEgipiti kaantu, kiimuna nokiimeno ayihe yokelundu.” 23 Moses sho a yeluthile ondhimbo ye kegulu, Omuwa okwa zigike iikogo nomindundumo noompawe, nolwaadhi olwa tsu mevi. Omuwa okwa tumu 24 oshikungulu oshidhigu shoompawe, noombadhi odha li tadhi shelagana. Osha li oshikungulu oshitilithi inaashi tseyika kuEgipiti hela a za. 25 Oompawe odha nyanyagula muEgipiti alihe ashihe sha li pondje, aantu niimuna ayihe. Osha thepagula iimeno ayihe momapya nokuteyagula po omiti adhihe. 26 Omukuma gwaGoshen, moka mwa kala Aaisraeli, omo amuke kaamwa li nando ompawe yimwe.
27 Omukwaniilwa okwi ithana Moses naAaron e ta ti: “Nena onda yono. Omuwa oku li mondjila, tse naantu yandje otwa puka. 28 Galikaneni Omuwa! Omindundumo noompawe odha lunda pombanda! Otandi uvaneke oku mu laleka, itamu kala mo we muka olule.”
29 Moses okwa ti kuye: “Mbalambala sho tandi zi mo moshilando, otandi ka yelutha omaako gandje megalikano kOmuwa. Omindundumo otadhi ka mwena noitaku ka kala we oompawe, opo u tseye kutya evi olyOmuwa. 30 Ihe ondi shi shi kutya ne nomalenga goye natango ihamu tila Omuwa Kalunga.”
31 Iigwanga yoliina niishokelya oya li ya thepagulwa po, oshoka iishokelya oya li ya vala, niigwanga yoliina oya li ya sheneka oongala. 32 Ihe omaludhi gosiima inaga yonwa po, oshoka ogo ga hugunina okutiligana.
33 Moses okwa zi pomukwaniilwa e ta piti mo moshilando e ta yelutha omaako ge megalikano kOmuwa. Omindundumo, oompawe nomvula oya sheka. 34 Ihe omukwaniilwa sho a mono kutya omvula, omindundumo noompawe odha mwena, okwa yono ishewe. Oye nomalenga ge oya kukutike oomwenyo dhawo, 35 Ngaashi Omuwa e shi lombwelele Moses. Omukwaniilwa ina laleka Aaisraeli ya ye.
© Oshindonga Bible © Bible Society of Namibia, 2008.
