Elelo lyaJuda
1 Omutse gwandje andola gwa li omuthima gwomeya,
nomeho gandje othithiya yomahodhi,
ando te lili uusiku nomutenya
omolwaantu yandje mboka ya dhipagwa po.
2 Ando onda li ndi na ehala mombuga,
moka te vulu okukala kokule naantu yandje.
Oyo ayehe aahasha, ongundu yaakengeleli.
3 Aluhe oyi ilongekidha okufundja;
oshili ihayi pangele moshilongo.
Omuwa ota popi ta ti:
“Aantu yandje otaa ningi nayi aluhe, yo inaa tseya ndje.”
4 Shaa ngoka ni iyageke kuume ke,
nokape na ngoka ti inekele mumwayina.
Oshoka omumwayina kehe omunamakoto a fa Jakob,
nokehe ngoka ota lundile ookuume ke.
5 Kuume ta kotokele kuume,
nokaku na ngoka ta popi oshili.
Oya longo omalaka gawo okufundja;
ohaa ivulitha muulunde.
6 Oye li mokati komakoto;
momakoto gawo otaa tindi okutseya ndje.
7 Molwaashika Omuwa Omunankondoawike ota ti:
“Otandi ka yelitha aantu yandje ngashika iiwengendje
notandi ke ya yeleka.
Aantu yandje ya ningi nayi —
otandi ya ningi ishewe shike?
8 Omalaka gawo ogo iikuti hayi lyana;
aluhe taa fundju.
Shaa ngoka ota popi oohapu oontalala komushiinda gwe,
ihe ote mu tegele etavu.
9 Itandi ke ya geelela andola iihuna mbika?
Itandi ka galulila andola oshigwana uuwinayi wa fa mbuka?
Ongame Omuwa nda popi.”
10 “Otandi lilile oondundu
notandi takumine omaunapelo.
Oshoka oga kukuta po,
nokape na ngoka te ende mokati kago.
Ekololoko lyoongombe itali uvika we;
oondhila niithitukuti oya yi ontuku.
11 “Jerusalem otandi shi ningi ondumba yomakulukuma,
otandi shi ningi ehala lyokukala oombandje;
iilando yomuJuda otayi ka mbugala,
ehala itaali kalwa nando okulye.”
12 Onda pula nda ti: “Omuwa, omolwashike oshilongo sha hanagulwa po nosha kukuta sha fa ombuga, nokaku na nando oongoka te yi tokola? Olye e na oondunge e shi uve ko? Owe shi fatululile lye, opo a vule okulombwela yalwe?”
13 Omuwa okwa yamukula a ti: “Osha ningwa, oshoka aantu yandje oye etha elongo ndyoka nde li ya pele. Inaa vulika kungame nenge ya ninge, ngaashi nde ya lombwele. 14 Oya kala ya tangalala noya longele iimenka yaBaal, ngaashi ya longwa koohekulu, ye shi ninge. 15 Onkee ano pulakeneni shoka ngame, Omuwa Omunankondoawike, Kalunga kaIsrael, tandi ti: Otandi ka pa aantu yandje oshigwanga oshilulu ya lye, notandi ya nwetha omeya guuzigo. 16 Otandi ke ya halakanithila mokati kiigwana mbyoka noohekulu nayo wo inaaye yi kundana nale, notandi ka tuma iita yi ya kondjithe, sigo nde ya yono po naanaa.”
Aajerusalem taa kugile ekwatho
17 Omuwa Omunankondoawike ota ti:
“Shi kuthii mo nduno!
Hiyeni aakiintu ye shi kulila,
tumeni koonkulungu dhokulila oosa.”
18 Oshigwana osha ti:
“Ya lombweleni, ya matuke ye tu lilile ko oosa,
sigo omeho getu taga udha omahodhi,
noombafu dhetu dha hipa kokulila.”
19 Oshihomo shoondila otashi uvika muSion:
“Otwa hanagulwa po ngiini!
Ohoni yetu onene ngiini!
Otatu thigi po oshilongo shetu,
oshoka omagumbo getu oga kumunwa po.”
20 Onda ti:
“Ne aakiintu, pulakeneni oohapu dhOmuwa,
mu ndhindhilike shoka ta popi.
Longeni aana yeni aakadhona okulila,
nookuume keni uunkulungu wokulila oosa.
21 Eso olye ya lya pitile momakende getu
nolya ningine moombala dhetu.
Momapandaanda olya kanyata aanona,
naagundjuka opomahala guundingosho.
22 Omidhimba odha langathana akuhe,
odha fa oondumba dhuuhoho momapya,
odha fa iilya ya teywa ya thigwa po kaateyi,
iilya mbyoka itaayi gongelwa.
Shika osho shoka Omuwa a lombwele ndje, ndi shi popye.”
23 Omuwa ota ti:
“Omunandunge ke na okwiitangela uunongo we,
omunankondo iti itangele oonkondo dhe,
nomuyamba iti itangele uuyamba we.
24 Ngoka ti itanga,
ni itangele okuuva ko nokutseya ndje,
oshoka ohole yandje kayi na ondjele,
nohandi longo shoka oshiwanawa noshu uka.
Iinima mbika otayi opalele ndje.
Ongame Omuwa nda popi.”
25-26 Omuwa ota ti: “Esiku otali ya, uuna tandi ka pangula Aayegipiti, Aajuda, Aaedom, Aayammoni, Aamoabi naantu yomombuga mboka haa ikulula omapalu. Aantu mbaka ayehe oya pita etanda, ihe inaa dhiginina ehangano; oye na owala endhindhiliko lyalyo. Kaku na nando ogumwe gwomaantu mbaka nomAaisraeli a dhiginina ehangano lyandje.”
© Oshindonga Bible © Bible Society of Namibia, 2008.
