1 Okombete yandje uusiku
nda kongo omuholike gwomwenyo gwandje.
Onde mu kongo, ihe inandi mu mona.
2 Onda hala okuthikama, ndi ka shilile noshilando,
momapandaanda nopomahalandjandja
tandi kongo omuholike gwomwenyo gwandje,
ihe inandi mu mona.
3 Aalangeli mboka taa endaenda noshilando, oya adha ndje.
“Inamu mona omuholike gwomwenyo gwandje?”
4 Opo sho nde ya pitilile po,
onda mono omuholike gwomwenyo gwandje.
Onde mu papatele noinandi mu etha,
manga inaandi mu fala mokagumbo kameme,
meni lyondjugo yaangoka a pulumutha ndje.
5 Ne aafuko Aajerusalem,
otandi mu ganitha poomenye nopoompalala dhokomalundu:
inamu pendutha ohole nenge mu yi kudhile,
manga inaayi shi hokwa.
Ondjimbo ontintatu
Omufuko:
6 Olye ngoka te ya ta zi kombuga a fa olwithi lwokuungululu,
a nika ezimba lyomira, nolyiitsinino yiigwanga yi ili noyi ili yomupindiki?
7 Tala! Osho oshiindopundi shaSalomo
sha kundukwa kaakwiita omilongo hamano,
omapenda gaIsrael.
8 Ayehe oya homata omagongamwele,
ya pyokokela iita;
shaa ngoka oku na egongamwele ponto ye,
ye shi ningila omalondokelo uusiku.
9 Omukwaniilwa Salomo okwi ihongithile oshiindopundi,
osha ningwa miipilangi yokuLibanon.
10 Oongudhi dhasho okwe dhi ningitha oshisiliveli,
neegameno dhasho olyoshingoli.
Omutumba ogwa siikilwa noshiyata oshitiliganembwilili;
meni omwo opalekwa nawa nohole kaakadhona Aajerusalem.
11 Aakadhona yaSion, pitii mo,
ne mu ligamene omukwaniilwa Salomo.
Okwa zala oshishani shoka yina e mu shanipike nasho
esiku ndyoka a fukike,
esiku ndyoka omwenyo gwe gwa li gwa nyanyukwa.
Mbushiki:
© Oshindonga Bible © Bible Society of Namibia, 2008.
