1 “Muna gwomuntu, lya po ondhinga yembo ndjika, opo u ye u ka hunganekele Aaisraeli.”
2 Onda makula okana kandje, nokwa pe ndje ondhinga yembo, ndi yi lye po. 3 Okwa ti: “Muna gwomuntu, lya po ondhinga yembo ndjika tandi yi ku pe, kutitha nayo ela lyoye.” Onde yi li po, noya li yi na omulyo gwa fa omagadhi goonyushi.
4 Kalunga okwa ti: “Muna gwomuntu, inda kAaisraeli, u ya lombwele shoka tandi shi ku lombwele. 5 Itandi ku tumu koshigwana shoka hashi popi elaka lyaatakumi, ihe okAaisraeli. 6 Ngele otandi ku tumu kiigwana mbyoka hayi popi elaka waa li uvite ko, otaye ke ku pulakena. 7 Ihe kape na nando ogumwe gwomAaisraeli ta ka hala a pulakene; nokuli itaa ka pulakena ndje nando. Ayehe oyo aatangalali ye na omanganga. 8 Ngashingeyi otandi ku ningi omukukutu wa kindja we ya fa. 9 Otandi ke ku ninga omukukutu wa fa emanya nongaashi ondiamande; ino tila aatangalali mboka.”
10 Kalunga okwa tsikile a ti: “Muna gwomuntu, taamba oohapu dhandje adhihe tandi dhi ku lombwele. Dhi dhimbulukwa nawa. 11 Inda ihe kaapongekwa aakweni, u ya lombwele shoka ngame, Omuwa Omupangeliawike, tandi ya lombwele, ngele otaye ku pulakene nenge aawe.”
12 Ombepo yaKalunga oya yambula ndje po, nondu uvu konima yandje ewi enene tali ndunduma tali ti: “Hambeleleni esimano lyOmuwa megulu pombanda!” 13 Ondu uvu oshihomo shomawawa giinamwenyo, sho tagi idhenge kumwe mewangandjo, nekolokoto lyomagulu lya fa epupo lyekakamo lyevi. 14 Oonkondo dhOmuwa odha kwata ndje, nOmbepo ye oye enditha ndje, nonda adhika koshinyenu nda geya. 15 Onde ya kuTel Abib pomulonga Kebar, nkoka kwa kala aapongekwa, nonda kala ko omasiku gaheyali nda kwatwa kushoka nda monene nonde shi uvile.
Omuwa ta langeke Hesekiel a ninge omulangeli
16 Omasiku gaheyali sho ga piti po, Omuwa okwa lombwele ndje a ti: 17 “Muna gwomuntu, otandi ku ningi omulangeli gwoshigwana Israel. Ou na oku ya londodha nomalondodho tandi ge ku lombwele. 18 Ngele otandi tomona kutya omulunde ota ka sa, ihe ngoye ito mu londodha, i itedhulule nokweetha oondjila dhe oombwinayi, ota ka sila muulunde we, ihe ombinzi ye otandi yi ku pula. 19 Ngele oto londodha omulunde, a ethe uulunde we, ihe ye ite shi ningi, nena ota ka sila muulunde we, ihe ngoye owa hupitha omwenyo gwoye.
20 “Omuyuuki ngele ote etha uuyuuki we nokuyona, notandi mu tula moshiponga, ota ka sa, ngele ino mu londodha. Ota sile muulunde we, nuuyuuki we itau dhimbulukiwa we, ihe ombinzi ye otandi yi ku pula. 21 Ngele oto londodha omuyuuki, opo kaa yone, oye note ku pulakene noita yono, ota kala e na omwenyo, nangoye wa hupitha omwenyo gwoye.”
Hesekiel ta nyengwa okupopya
22 Oshikaha shOmuwa osha li kombanda yandje, oye nokwa lombwele ndje a ti: “Thikama, u ye molusilu. Omo tandi ka popya nangoye.”
23 Onda yi ihe molusilu, nonda mono eadhimo lyaKalunga, naanaa ngaashi nde li mwene pomulonga Kebar. Onda tsu oshipala shandje mevi, 24 ihe Ombepo yaKalunga oya lambele ndje e tayi thikameke ndje. Omuwa okwa lombwele ndje a ti: “Inda megumbo, u ki iyedhilile mo. 25 Muna gwomuntu, otaye ke ku manga noongodhi, opo kuu pite mo u ye mokati kaantu. 26 Otandi ka lemaneka elaka lyoye, opo waa vule okulondodha aantu mbaka aapandala. 27 Ngele tandi ke ku popitha ishewe notandi ka makula okana koye, nena oto ke ya lombwela shoka ngame, Omuwa Omupangeliawike, tandi ti. Yamwe yomuyo otaa ka pulakena, ihe yamwe itaye ke ku pulakena, oshoka oyo aantu ye na iityani.”
© Oshindonga Bible © Bible Society of Namibia, 2008.
