Omuwa ta tamaneke Israel
1 Pulakeneni iihokolola, Omuwa sho ta tamaneke Israel. Omuwa, thikama, u popye; oondundu niikulundundu nayi uve shoka to ti.
2 Ne oondundu, ne omakankameno gaaluhe gevi, pulakeneni kiihokolola yOmuwa! Omuwa oku na iihokolola naantu ye. Ota ka tamaneka Israel.
3 Omuwa ota ti: “Yantu yandje, onde mu ningile shike? Onde mu dhigupalele ngiini? Yamukulii ndje. 4 Onde mu tembudha muEgipiti; onde mu mangulula muupika; onda tumu Moses, Aaron naMiriam, ye mu wilike. 5 Yantu yandje, dhimbulukweni sho Balak, omukwaniilwa gwaMoab, e mu dhiladhilile, nonkene Bileam yaBeor e mu yamukula. Dhimbulukweni iinima ya ningwa mondjila okuza kontanda puAkasia sigo oGilgal. Dhimbulukweni shoka nda ningi, opo ndi mu hupithe.”
Shoka Omuwa ta pula
6 Otandi ka fala shike kOmuwa, Kalunga komegulu, uuna tandi ke mu simaneka? Ondi fale oompunya dho ondodhwa oku dhi mu fikila omidhidhindjambo? 7 Omuwa ota ka nyanyukwa, ngele tandi mu faalele oonzi omayuvi, nenge omilonga dhomagadhi gooholivi? Ondi mu yambele omumwandje osheeli, ndi fute omayono gandje? 8 Aawe, Omuwa okwe tu lombwela shoka shu uka. Shoka te tu pula, osho okulonga shoka shu uka, oku mu ulukila ohole yashili nokukala muukumwe nomeifupipiko naKalunga ketu.
9 Osho opala okutila Omuwa. Oti igidhile oshilando ta ti: “Pulakeneni, ne aantu mboka tamu gongala moshilando! 10 Momagumbo gaagoyoki omu na omaliko giifundja. Ohaa longitha iiyelekitho ya puka; osho oshinima ndi shi tonde. 11 Otandi vulu ngiini okudhimina po aantu haa longitha iiviha niiyelekitho ya puka? 12 Aayamba yeni otaa ningilile mo oohepele, nane amuhe aafundja. 13 Onda tameke nokuli oku mu yona po noku mu halakanitha po omolwomayono geni. 14 Otamu ka lya, ihe itamu ka kuta — sho shene otamu ka kala nondjala. Otamu ka ya mwa humbata iinima, ihe itamu ka vula oku yi dhiginina; shaa shoka tamu hupitha otandi ke shi hanagula po miita. 15 Otamu ka kuna iilya, ihe itamu ka teya oondudhi. Otamu ka yenga omagadhi mooholivi, ihe itamu vulu oku ga longitha. Otamu ka kola omaviinu, ihe itamu ga nu nando. 16 Shika otashi ka ningwa, oshoka omwa landula iilonga iiwinayi yomukwaniilwa Omri noyomwana, omukwaniilwa Ahab. Omwa tsikile omikalo dhawo, onkee tandi mu yono po, naayehe otaye mu sheke. Aantu shaa mpoka otaye ke mu tala nondhino.”
© Oshindonga Bible © Bible Society of Namibia, 2008.
