Omusholondondo gwaayambi nAalevi
1 Mpaka otapa landula omusholondondo gwaayambi nAalevi mboka ya galuka muupika pamwe naSerubbabel yaShealtiel nomuyambimukuluntu Josua:
2-7 Aayambi oyo:
Seraia, Jeremia, Esra,
Amaria, Malluk, Hattush,
Shekania, Rehum, Meremot,
Iddo, Ginnetoi, Abia,
Mijamin, Maadia, Bilga,
Shemaia, Joiarib, Jedaia,
Sallu, Amok, Hilkia naJedaia.
Aantu mbaka oya li aawiliki mokati kaayambi ooyakwawo muuyuni waJosua.
8 Aalevi:
Mboka ya li haa wilike oondjimbohambelelo, oyo Jeshua, Binnui, Kadmiel, Sherebia, Juda naMattania.
9 Mboka ya thikama ya taalelathana nayo taa imbi eziminathano, oyo Bakbukia, Unni nAalevi ooyakwawo.
Oluvalo lwaJosua omuyambi omukuluntu
10 Josua okwa li he yaJoiakim, Joiakim ohe yaEliashib, Eliashib ohe yaJoiada, 11 Joiada ohe yaJonatan, naJonatan ohe yaJaddua.
Aakuluntu yomaludhi gaayambi
12-21 Joiakim sho a li omuyambimukuluntu, aayambi aawiliki yomaludhi gaayambi oyo:
Omuyambi OludhiMeraia SeraiaHanania JeremiaMeshullam EsraJehohanan AmariaJonatan MallukJosef ShebaniaAdna HarimHelkai MeraiotSakaria IddoMeshullam GinnetonSikri AbiaPiltai Miniamin na MaadjaShammua BilgaJehonatan ShemaiaMattenai JoiaribUssi JedaiaKallai SallaiEber AmokHashabia HilkiaNetanel JedaiaOndjalulo yomazimo gaayambi nogAalevi
22 Ondjalulo yaakuluntu yomazimo gAalevi noyomazimo gaayambi oya dhigininwa muuyuni waayambi aakuluntu Eliashib, Joiada Jonatan naJaddua. Ondjalulo ndjika oya li ya pu muuyuni waDarius, omupangeli gwaPersia.
23 Ondjalulo yaakuluntu yomazimo gAalevi oya dhigininwa ashike sigo omuuyuni waJonatan omutekulu gwaEliashib.
Egandjo lyiilonga motempeli
24 Mewiliko lyaHashabia, Sherebia, Jeshua, Binnui naKadmiel, Aalevi oya topolwa moongundu. Oongundu mbali molufo lumwe odha li dhi na oshimpwiyu shokutanga nokuhambelela, Kalunga, ngaashi sha li shu uthwa komukwaniilwa David, omuntu gwaKalunga.
25 Aantu mboka ya li taa tonatele omiyelo dhoompungulilo dhotempeli, oyo Mattania, Bakbukia, Obadia, Meshullam, Talmon naAkkub.
26 Aantu mbaka oya li ko muuyuni waJoiakim yaJosua, omutekulu gwaJehosadak, nomuuyuni womunashikandjo Nehemia nopethimbo lyomuyambi nomunongompango Esra.
Nehemia ta yapula edhingililokuma
27 Omadhingililokuma gaJerusalem sho ga li taga yapulwa, Aalevi oye etwa mo ya zi nkoka ya kala, opo ya dhane eyapulo noondjimbohambelelo taa hiki iiyaha, uuharpa nuushandja. 28 Omazimo gaayimbi Aalevi oga gongala ga zi komaha gago nkoka ga kala puushiinda waJerusalem nokomikunda dhopuNetofa, 29 kuBetgilgal, Geba naAsmavet. 30 Aayambi nAalevi oyi iyopaleke opo ya kale ya yogoka, oyo opaleke wo aantu, omiyelo nedhingililokuma lyoshilando pamisindilo.
31 Onda gongaleke aawiliki yaJuda kombanda yekuma e tandi ya tula metonatelo lyoongundu oonene mbali, ya katuke taa dhingoloka oshilando yo taa hambelele Kalunga.
Ongundu yotango oya yi lwokolulyo kombanda yekuma yu ukilila kOsheelo shuuhoho. 32 Hoshaia okwa katuka konima yaaimbi, a landulwa ketata lyaawiliki yaJuda 33-35 nokaayambi mboka taa hiki omankuma: Azaria, Esra, Meshullam, Juda, Benjamin, Shemaia naJeremia. Oya landulwa kuSakaria yaJonatan, omutekulu gwaShemaia. (Moohekulu omwa li wo Mattania, Mikaia naSakkur gwoludhi lwaAsaf.) 36 Sakaria okwa landulwa kaantu yalwe yoludhi lwe — Shemaia, Asarel, Milalai, Gilalai, Maai, Netanel, Juda naHanani — ayehe mboka oya li ya humbata iihikomwa yomaludhi gokuhikwa komukwaniilwa David, omuntu gwaKalunga. Omunongompango Esra okwa wilike ongundu ndjika mosheendo. 37 POsheelo shopoluthithiya oya londo pombanda piikolo yu uka koshilando shaDavid, oya pitilile uuwa waDavid e taa galukile kekuma pOsheelo shomeya kuuzilo woshilando.
38 Ongundu onkwawo yaahambeleli oyu uka kolumoho ya lambalala ekuma pombanda, nangame onda landula ko nongundu ya hupu ko. Otwa katuka tatu pitilile Oshungo yomaziko, twe ya pEkuma lya mbwalangandja, 39 twa pitilile Osheelo shaEfraim, Osheelo oshikulu, Osheelo shoohi, oshungo Hananel, oshungo Hammea nOsheelo shoonzi. Otwa hulile popepi nosheelo shotempeli.
40 Oongundu adhihe mbali ndhoka dha li tadhi hambelele Kalunga, odha adha ehala lyotempeli. Kakele kaawiliki mboka ya li pungame, 41 mongundu yandje omwa li aayambi mboka taa hiki omankuma: Eliakim, Maaseia, Miniamin, Mikaia, Elioenai, Sakaria naHanania; 42 noya landulwa kuMaaseia, Shemaia, Eleasar, Ussi, Jehohanan, Malkija, Elam naEzer. Aayimbi mewiliko lyaJezrahia oya imbi nomawi gomuule.
43 Esiku ndyoka aantu oya yamba omafikilondjambo ogendji noya li ya nyanyukwa pombanda, oshoka Kalunga okwe ya nyanyudha. Aakulukadhi naanona oyi itula wo moshiindingili, onkee omawi goondigolo oga uvika kokule naJerusalem.
Iigandjwa iiyapuki
44 Pethimbo ndyoka aantu oya langekwa metonatelo lyoompungulilo moka iigandjwa yotempeli tayi pungulwa, mwa kwatelelwa iitimulongo noshipe shiilya noshiiyimati yomumvo kehe. Aantu mboka oya li ye na oshimpwiyu shokugongela pampango iitaambwa yaayambi nAalevi mbyoka ya zi komapya ge li puushiinda wiilando yi ili noyi ili. Aajuda ayehe oya li ye na ombili naayambi nAalevi, 45 oshoka oya gwanitha omayakulo agehe nomisindilo dhomaitheto ndhoka Kalunga e ya lombwele. Aayimbi yomotempeli naalangeli yotempeli nayo wo oya gwanitha iilonga yawo pamalombwelo ga gandjelelwe komukwaniilwa David nomwana Salomo. 46 Okuza nale, muuyuni womukwaniilwa David nomwiimbithi Asaf, aayimbithi oya kala haa wilike omaimbilo gokutanga nokuhambelela Kalunga. 47 Muuyuni waSerubbabel, osho wo muuyuni waNehemia, Aaisraeli ayehe oya gandja omagano esiku kehe, opo ya gwanithe oompumbwe dhaaimbi yomotempeli nodhaalangeli yotempeli. Aantu oya gandja omayambo omayapuki kAalevi, nAalevi oya gandja oshitopolwa kaayambi.
© Oshindonga Bible © Bible Society of Namibia, 2008.
