Kalunga ta pangula iimenka
1 Aawiliki yamwe yaIsrael oye ya kungame, ya pule ehalo lyOmuwa. 2 Nena Omuwa okwa lombwele ndje a ti: 3 “Muna gwomuntu, aantu mbaka oya gandja oomwenyo dhawo kiimenka yi ya fale muulunde. Otaa dhiladhila, ndi ya yamukule?
4 “Ya lombwela shoka ngame, Omuwa Omupangeliawike, tandi ya lombwele: Omuisraeli kehe ngoka i igandjela iimenka noye mu falitha muulunde, ngele ote ya a pule omuhunganeki, ota ka mona eyamukulo lya za kungame — eyamukulo olyo ndyoka iimenka ye ye li ilongele! 5 Iimenka ayihe mbyoka oya pukitha Aaisraeli, ihe keyamukulo lyandje otandi ka sinda einekelo lyawo.
6 “Onkee ano ngashingeyi lombwela Aaisraeli shoka ngame, Omuwa Omupangeliawike, tandi ti: Galukeni nomu ethe iimenka yeni yi nyanyalitha.
7 “Kashi na nee ombudhi, na kale oye Omuisraeli nenge oye omukwiilongo ngoka a kala megongalo lyaIsrael nokwa pilamene ndje e ta simaneke iimenka nota yi a ka pule omuhunganeki, ongame, Omuwa, tandi mu pe eyamukulo! 8 Otandi ke mu kondjitha. Otandi ke mu ninga elondodhitho. Otandi mu kondo megongalo lyaantu yandje, opo mu tseye kutya ongame Omuwa.
9 “Omuhunganeki ngele ota kotokelwa a yamukule eyamukulo lyiifundja, osha ningwa, oshoka ongame mwene, Omuwa, nde mu pukitha. Otandi mu kondo mo mAaisraeli, 10 Ayehe yaali, omuhunganeki naangoka ta pula omayele, otaa geelwa sha faathana. 11 Shika otandi shi ningi, opo ndi keelele Aaisraeli yaa ethe ndje noyi inyatekele muulunde wawo. Oye na okukala aantu yandje, nangame ote kala Kalunga kawo.” Omuwa Omupangeliawike oye a popi.
Noa, Daniel naJob
12 Omuwa okwa lombwele ndje a ti: 13 “Muna gwomuntu, ngele oku na oshilongo tashi yono noitashi inekele ndje, otandi ka taganeka okwooko kwandje nokuhanagula po olunza lwasho lwiikulya. Otandi tumu ondjala, yi lye po aantu niimuna. 14 Nonando mu kale aalumentu mbaka yatatu, Noa, Daniel naJob, uuyuuki wawo otau hupitha oomwenyo dhawo adhike.” Omuwa Omupangeliawike oye a popi.
15 “Nenge ondi na okutuma iilikama, yi lye po aantu, notayi etele oshilongo oshiponga, opo pwaa kale ngoka te shi taakana, 16 nonando mu kale aalumentu mboka yatatu — oshili ngaashi ngame Omuwa Omupangeliawike, Kalunga omunamwenyo — itaa vulu okuhupitha nando oyana. Otaa hupitha ashike oomwenyo dhawo yene, noshilongo otashi ka ninga eputu.
17 “Nenge ondi na okutuma iita moshilongo shoka nokugandja omatati ga dhipage po aantu niimuna, 18 nonando aalumentu mboka yatatu ya kale mo — oshili ngaashi ngame Omuwa Omupangeliawike, Kalunga omunamwenyo — itaa vulu okuhupitha nando oyana, oomwenyo dhawo adhike.
19 “Ngele oshilongo shoka tandi shi tumine elega, nomondjahi yandje te kutha po oomwenyo odhindji, te dhipaga aantu niimuna, 20 nonando mu kale Noa, Daniel naJob — oshili ngaashi ngame Omuwa Omupangeliawike, Kalunga omunamwenyo — itaa vulu okuhupitha nando oyana. Uuyuuki wawo otau hupitha ashike oomwenyo dhawo.”
21 Omuwa Omupangeliawike ota popi ta ti: “Jerusalem otandi shi tumine omageelo gandje gane omadhigulela: iita, ondjala, iilikama nelega, ga hanagwe po aantu niimuna. 22 Ngele oku na ngoka ta hupu ko e ta hupitha oyana, ya koneka sho taa ya kungoye. Tala, nkene oyo aalunde, opo u dhimbulule kutya egeelo ndyoka tandi geele nalyo Jerusalem, olyopauyuuki, 23 noto ka koneka kutya nani ashihe shoka nda longo, osho opala.” Omuwa Omupangeliawike oye a popi.
© Oshindonga Bible © Bible Society of Namibia, 2008.
