1 Ndika olyo elaka ndyoka Omuwa e li hololele omuhunganeki Habakuk.
Habakuk ta nyenyetele uukolokoshi
2 Omuwa, sigo uunake ndi na oku ku kugila ekwatho ngoye itoo pulakene, ngoye itoo tu hupitha mo momathiminiko? 3 Omolwashike to talitha ndje omalwa? Sigo uunake to idhidhimikile iilonga yuukolokoshi? Eyonuko nomathiminiko oga kunduka ndje, naapehe ope na omalugodhi noontamanana. 4 Ompango kayi na oonkondo, nuuyuuki itau gwanithwa nando. Aakolokoshi oye li hwepo ye vule aayuuki, nuuyuuki otau goyokithwa.
Eyamukulo lyOmuwa
5 Nena Omuwa okwa ti kaantu ye: “Taleni kiigwana ye mu kunduka notamu ka kuminwa iinima mbyoka tamu yi mono. Otandi ka ninga po sha shoka itaamu shi itaale nuupu, nge tamu shi uvu. 6 Otandi gandja oonkondo kAababilonia, mboka ye li po oshigwana oshidhudhu noshipwidhi. Otaa ka taakana uuyuni nokulala omavi giigwana yilwe. 7 Otaa taandelitha uumbanda netilo, nomuuntsa wawo yene oyi ipa uuthemba nomuthika gwopombanda.
8 “Uukambe wawo ou na ondapo u vule omatotono, ou na uupwidhi u vule omambungu ga sa ondjala. Aakayilinkambe yawo otaa zi komakule; uukambe wawo otau tatagula evi. Otau koloka tau gwililile po wa fa omakodhi taga hakana oshihakanwa shago.
9 “Omatangakwiita gawo otaga tsikile methiminiko okusindana; ayehe otaa kakama, sho taga hedha ko. Oonkwatwa dhawo odhindji dha fa omawe gopehekevi. 10 Ohaa sheke aakwaniilwa nohaa yolo aambala aanene. Kape na ohote tayi ya keelele — otaye yi palele omituni e taye yi kwata po. 11 Nena oyo taa pitilile po ya fa ombepo tayi piti po, oshoka oonkondo dhawo odho kalunga kawo.”
Habakuk ta nyenyetele ishewe Omuwa
12 Omuwa, ongoye Kalunga okuza konale. Ongoye Kalunga kandje, omuyapuki nomukwaaluhe. Omuwa Kalunga kandje nomugameni gwandje, ongoye wa hogolola Aababilonia nowe ya pe oonkondo, ye tu geele. 13 Ihe oto vulu ngiini okwiidhidhimikila aanamakoto mbaka aawinayi? Omeho goye omayapuki unene okutala uuwinayi, noito vulu nando okwiidhidhimikila okutala aantu taa eta eyonuko. Omolwashike wa mwena, manga yo taa hanagula po aantu aayuuki?
14 Aantu yandje oto ya ningi ya fa oohi nenge eimbagano lyuupapuka waa na ngoka te u wilike. 15 Aababilonia otaa yulu aantu noondjolo ya fa oohi. Otaye ya kookololele moonete notaa ligola ya nyanyukwa, sho ye ya kwata! 16 Oyo haa simaneke oonete dhawo notaye dhi yambele oondjambo, oshoka oonete dhawo ohadhi ya kwatele iinima ayihe iiwanawa.
17 Otaa pitikwa okudhipaga nomagongamwele gawo sigo aluhe nokutsikila okuyona po iigwana pwaa na henda?
© Oshindonga Bible © Bible Society of Namibia, 2008.
