Ehunganeko: Omugwayekwa gwOmuwa
1 Omuwa okwa hogolola Kores a ninge omukwaniilwa!
Okwa mu gwayeke a sinde iigwana;
ote mu tumu, a kuthe aakwaniilwa kiipundi yawo.
Omuwa ote ke mu egululila iiyelo yiilando.
Omuwa ota lombwele Kores ta ti:
2 “Ongame mwenemwene tandi ku palele ondjila,
tandi yelekanitha oondundu niikulundundu.
Otandi ka teya po omiyelo dhiiyela iikushu
tandi tatula iiyedhilitho yadho yiiyela.
3 Otandi ke ku pa omaliko gomomilema
nuuyamba womomahala gomeholamo.
Oto ka tseya kutya ongame Omuwa, Kalunga kaIsrael
ngoka nde ku ithana edhina lyoye.
4 Otandi ku langeke po, u kwathe oshigwana shandje Israel,
oluvalo lwaJakob ndoka nda hogolola.
Onde ku pe esimano enene,
nando owa li inoo tseya ndje.
5 “Ongame Omuwa; kaku na kalunga gulwe.
Otandi ke ku pa oonkondo ndhoka to pumbwa,
nando ngoye ino tseya ndje.
6 Otandi shi ningi,
opo shaa ngoka kooha dhuuyuni sigo okooha oonkwawo
a kale e shi shi kutya ongame Omuwa
nokaku na we kalunga gulwe.
7 Otandi shiti uuyelele nomilema;
ohandi eta eyambeko nethingano.
Ongame, Omuwa, tandi ningi ayihe mbika.
8 Otandi ka gandja esindano tali zi kegulu ngomvula;
evi otali ke li taamba
notali ka tsapuka emanguluko nuuyuuki.
Ongame, Omuwa, tandi ka ningitha mbika.”
Omuwa oku na oonkondo adhihe
9 Oshuma sheloya otashi vulu tuu shi tamanane nomuhongi gwasho,
oshuma sho inaashi fa iikwawo ayihe?
Eloya otali pula tuu omuhongi gwiiyuma shoka ta ningi?
Oshiyuma otashi tamanana tuu kutya omuhongi gwasho ke na uunkulungu?
10 Ope na tuu ngoka ta vulu okulombwela he kutya owa valela ndje shike?
Nenge a tye kuyina, owa pulumuthile ndje shike?
11 Omuwa omuyapuki, Kalunga kaIsrael omushiti gwe,
oye tuu ngoka tu utha onakuyiwa.
Ota ti: “Kamu na uuthemba, mu pule ndje aana yandje
nenge mu lombwele ndje shoka ndi na okuninga!
12 Ongame awike ngoka nda shiti evi
nonda shitile ko aantu ya kale ko.
Koonkondo dhandje onda alele egulu;
otandi enditha etango, omwedhi noonyothi.
13 Ongame mwene nda pendutha Kores
a gwanithe elalakano lyandje,
a longe uuyuuki.
Otandi ukitha ondjila kehe te ende nayo.
Ota ka tungulula oshilando shandje Jerusalem
nota mangulula aantu yandje aapongekwa.
Kape na ngoka e mu futu sha
nenge e mu pe oombumbo ando, opo e shi ninge.”
Omuwa Omunankondoawike oye e shi popi.
Aapagani taa ka gongala pOmuwa
14 Omuwa ota popi ta ti:
“Uuyamba waEgipiti neliko lyaEtiopia otali ningi lyoye.
Aalumentu aaleeleka yokuSeba otaa ka ninga aapika yoye;
otaye ke ku landula taye ende ye li momalyenge.
Otaye ku inyongamene yo taa hempulula taa ti: Kalunga oku li shili nangoye,
oye awike, nokaku na we kalunga gulwe.
15 Kalunga kaIsrael, ngoka a kulile aantu ye,
oye Kalunga ngoka hi iholeke.
16 Oomboka tayi iningile iimenka, otaa ka sithwa ohoni;
ayehe yomuyo otaa ka gugwa.
17 Ihe Israel ota hupithwa kOmuwa,
nesimano lye otali ka kala sigo aluhe;
aantu ye itaa ka sithwa ohoni nando.”
Ehokololo lyiilonga yOmuwa
18 Okwa shiti egulu
oye awike Kalunga!
Oye a tholoma evi e te li umbu,
okwe li pameke noku li kalitha ko.
Ine li shita li mbugale,
ihe ehala lyokukala aantu.
Oye tuu nguka ta ti: “Ongame Omuwa,
nokaku na kalunga gulwe.
19 Inandi popya meholamo
nenge ndi holeke elalakano lyandje.
Inandi lombwela oluvalo lwaJakob:
‘Kongii ndje powalawala.’
Ongame Omuwa te popi oshili;
tandi holola uuyuuki.”
Omuwa gwaayehe niimenka yaBabilon
20 Omuwa ota popi ta ti:
“Gongaleni, ileni, hedheni pamwe,
aahupiko yomiigwana;
holokeni koompangu!
Aantu mboka kaaye shi sha,
otayi iholola niimenka yawo yiiti
notaa galikana ookalunga mboka itaa vulu oku ya hupitha.
21 Ileni, mu tule iihokolola yeni moompangu;
etheni aapopili ya pulathane omayele.
Olye a hunganekele nale shoka tashi ka ningwa?
Hangame Omuwa, Kalunga ngoka ta kulile aantu ye?
Kaku na kalunga gulwe.
22 Galukileni kungame ngashingeyi mu hupithwe,
ne aantu yomuuyuni auhe!
Ongame awike Kalunga, kaku na gulwe.
23 Omauvaneko gandje ogoshili,
noitaga ka lunduluka nando.
Otandi uvaneke nokugana pungame mwene
kutya shaa ngoka ote ke ya noti inyongamene koshipala shandje
nokusimaneka ndje.
24 “Otaa ka hempulula kutya esindano noonkondo
otadhi monika mungame awike;
ihe ayehe mboka ye tonde ndje,
otaa ka sa ohoni.
25 Ongame Omuwa tandi ka mangulula oluvalo aluhe lwaJakob,
oyo notaa ka hambelela ndje.”
© Oshindonga Bible © Bible Society of Namibia, 2008.
