1 Shigwana shaIsrael, ne mboka Omuwa e mu tembudha muEgipiti, pulakeneni kelaka ndika te li mu lombwele: 2 “Miigwana ayihe yokombanda yevi one amuke nda tseya nonde mu sile oshimpwiyu. Omolwashoka uulunde weni owo uunene, notandi ke mu geela.”
Oshilonga shomuhunganeki
3 Aalumentu yaali otaye ende ngaa pamwe inaaye shi uvathana?
4 Onkoshi otayi pumbu ngaa mokuti inaayi mona oshihakanwa?
Okankoshona otaka gonene ngaa mekololo lyako inaaka kwata sha?
5 Ondhila otayi yi tuu momwigo, ngele inagu tegwa naasho hayi shi li?
Omwigo otagu fatuka tuu, ngele inagu komonwa?
6 Enkuma otali hikwa tuu moshilando kaakwiita, ndele itali halutha aantu?
Oshiponga otashi kolokele tuu oshilando, Omuwa ngele ine shi tuma?
7 Omuwa Omupangeliawike iha longo sha, manga inaa hololela aapiya ye aahunganeki shoka ta ka ninga.
8 Ngele onkoshi tayi pumbu, olye ta vulu okukala inaa tila?
Ngele Omuwa Omupangeliawike ta popi, olye ta vulu okukala itaa hunganeke?
Epangulo lyaSamaria
9 Uvithileni mboka ya kala muuwa waAshdod nomuuwa waEgipiti mu tye: “Gongaleni pamwe koondundu dha dhingilila oshilando Samaria, mu tale epiyagano enene musho niihuna mbyoka tayi pangele mo.”
10 Omuwa ota ti: “Aayamba otaa udhitha omagumbo gawo niinima ya yugwa ya za miikolokosha. Inaa tseya nokuli kutya okukala muuyuuki oshike. 11 Omolwashoka omutondi ota ka kondeka evi lyawo, ota hanagula po omapopilongulu gawo e ta yugu omagumbo gawo uuyamba.”
12 Omuwa ota ti: “Ngaashi omusita gwoonzi ngele ta yugulula iilama iyali konime, nenge oshintoko shokutsi, osho mAaisraeli muSamaria tamu ka hupa aashona ayeke mwaamboka taye egamene kiipundi yuuyamba. 13 Ngashingeyi pulakeneni ne mu londodhe oluvalo lwaJakob,” Omuwa Omupangeliawike nOmunankondoawike osho ta ti. 14 “Mesiku ndyoka tandi geele Aaisraeli omolwomayono gawo, omo tandi ka hanagula po iiyambelo yokuBetel. Omakuvu goshiyambelo kehe otaga ka kumunwa po notaga gwile pevi. 15 Otandi ka hanagula po omagumbo gopokufu naangoka gopothinge. Omagumbo ga tulwa uulenga womasipa goondjamba, otaga ka ninga omakulukuma; egumbo enene kehe otali ka hanagulwa po.”
© Oshindonga Bible © Bible Society of Namibia, 2008.
