Isak ta yambeke Jakob
1 Isak okwa li a kulupa, nomeho ge oga tsika. Okwi ithana osheeli she Esau e ta ti kuye: “Mentu gwandje.” Esau okwa ti: “Tate.”
2 Isak okwa ti: “Ou wete kutya onda kulupa nondi li pokusa. 3 Kutha ano uuta woye niikuti, u ye mokuti u dhipagele ndje oshiyamakuti. 4 Telekela ndje oondya dha dhoga, ndhoka ndi hole, u dhi etele ndje. Shampa nde dhi li, otandi ke ku yambeka, manga inaandi sa.”
5 Isak sho a li ta lombwele Esau, ye Rebekka okwa pulakena. Esau sho a yi kuukongo, 6 Rebekka okwa ti kuJakob: “Ondu uvu naanaa ho sho ta lombwele Esau ta ti: 7 ‘Etela ndje oshiyamakuti, u shi telekele ndje. Shampa nde shi li, otandi ku yambeke montaneho yOmuwa, manga inaandi sa.’ 8 Ano ngashingeyi, mumwandje, pulakena ndje sho te ti. 9 Inda kiimuna, u kuthe uukombwena uyali wo ondoka, opo ndi teleke iikulya yi holike kuho. 10 Oto yi mu faalele e te ke ku yambeka, manga inaa sa.”
11 Ihe Jakob okwa ti kuyina: “Ou shi shi kutya Esau oku na olufufu, manga ngame ndaa lu na. 12 Pamwe tate ota pampadhala ndje e ta dhimbulula kutya otandi mu kotokele. Pamukalo nguka otandi iyetele etulomutima, hayambeko.”
13 Yina okwa yamukula: “Etulomutima lyoye nali ye mungame, mumwandje. Ninga owala shoka tandi ti. Inda, u ka talele ndje uukombwena.” 14 Jakob okwa yi e ke u tale, e te u etele yina, yina nokwe u teleke oondya dha dhoga, ndhoka he e dhi hole. 15 Nena okwa kutha oonguwo dhaEsau oombwanawa, ndhoka e dhi pungula megumbo, e te dhi zaleke Jakob. 16 Okwe mu zaleke uupa wiikombo komaako nomothingo ye yaa na olufufu. 17 Okwe mu pe iikulya ya dhoga pamwe noshikwiila shoka a ninga.
18 Nena Jakob okwa yi kuhe e ta ti: “Tate!”
He okwa yamukula a ti: “Ee. Ongoye lye, mentu gwandje?”
19 Jakob okwa yamukula a ti: “Osheeli shoye Esau. Onda ningi, ngaashi wa lombwele ndje. Penduka, u lye onyama ndjoka nde yi ku etele, opo u yambeke ndje.”
20 Isak okwa ti: “Mentu gwandje, owe endelele ngiini oku shi mona?”
Jakob okwa yamukula a ti: “Omuwa, Kalunga koye, okwa kwatha ndje, ndi shi mone.”
21 Isak okwa ti ku Jakob: “Hedha ko, opo ndi ku pampadhale. Ongoye ngaa shili omumwandje Esau?” 22 Jakob okwa hedha kuhe, ngoka e mu pampadhala e ta ti: “Ewi olyaJakob, ihe iikaha oyaEsau.” 23 Ina dhimbulula Jakob, oshoka omaako ge ga li ge na olufufu ga fa gaEsau. Opo a ale e mu yambeke, 24 ihe okwa pula ishewe a ti: “Ongoye ngaa shili Esau?”
Jakob okwa yamukula a ti: “Ee.”
25 Isak okwa ti: “Etela ndje nduno onyama. Konima nge nde yi li, opo tandi ku yambeke.” Jakob okwe yi mu etele nokwe mu etele nomaviinu wo, a nwe. 26 Nena he okwa ti kuye: “Mentu gwandje, hedha ko, u thipe ndje komilungu.” 27 Sho a hedha ko oku mu thipa komilungu, Isak okwa nika ko ezimba lyoonguwo dhe, onkee okwe mu yambeke. Okwa ti:
“Ezimba ewanawa lyomumwandje
olya fa ezimba lyelundu ndyoka lya yambekwa kOmuwa.
28 Kalunga ne ku pe oomume dhomegulu nevi lyo ondoka!
Ne ku pe eloolo lyiilya nolyomaviinu.
29 Iigwana nayi ku longele,
naantu naye ku inyongamene.
Pangela mokati kaanezimo lyoye,
oluvalo lwanyoko nalu ku inyongamene.
Oomboka taye ku tula omutima, naa tulwe omutima;
naamboka taye ku laleke nuuyamba, naa lalekwe nuuyamba.”
Esau ta pula eyambeko
30 Isak opo tuu a mana okuyambeka Jakob, naJakob a zi po puye, omumwayina Esau okwa galuka kuukongo. 31 Naye wo okwa teleke oondya dha dhoga e te dhi fala kuhe. Okwa ti: “Tate, penduka, u lye onyama ndjoka nde yi ku etele, opo u yambeke ndje.”
32 Isak okwa pula a ti: “Ongoye lye?”
Esau okwa yamukula: “Ngame osheeli shoye Esau.”
33 Isak okwa tameke okukakama noonkondo e ta pula ta ti: “Olye ano ngwiyaka a dhipaga oshiyamakuti nokwe shi eta kungame? Opo nde shi li, manga inoo ya. Onde mu yambeka nosha pwa tuu ngaaka.”
34 Esau sho e shi uvu, okwa takuma mokule e ta ti: “Tate, yambeka ndje wo!”
35 Isak okwa yamukula: “Omumwanyoko okwi ile nokwa kotokele ndje. Okwa kutha po eyambeko lyoye.”
36 Esau okwa ti: “Nduka olutiyali, sho a kotokele ndje. Itashi kumitha, sho a lukwa Jakob. Okwa kutha ndje uuthemba wandje wuusheeli, nena a kutha po ishewe eyambeko lyandje. Ino thigila ndje po nando eyambeko?”
37 Isak okwa yamukula a ti: “Onde mu ningi nokuli omupangeli gwoye, naakwawo ayehe onde ya ningi aapiya ye. Onde mu pa eloolo lyiilya nolyomaviinu. Mentu gwandje, kape na we sho te vulu oku ku ningila.”
38 Esau okwa tsikile okuhehela he e ta ti: “Tate, ndele nando eyambeko limwelimwe olyo ngaa kuu na? Yambeka ndje wo, tate!” Ye ota tameke okulila nokuli.
39 Nena Isak okwa ti kuye:
“Oto kala kokule nevi lyo ondoka
nokokule noomume dhokegulu.
40 Oto hupithwa kegongamwele lyoye.
Oto ningi omupiya gwomumwanyoko.
Ihe ngele oto pwidhuka, oto ki inaga ondjoko ye.”
41 Esau okwa tondo Jakob, molwashoka he a yambeke Jakob. Okwa dhiladhila: “Omasiku gokulila oosa dhatate oga thikana. Konima otii ka dhipaga omumwameme Jakob.”
42 Rebekka sho u uvu edhiladhilo lyaEsau, okwi ithana Jakob e ta ti: “Omumwanyoko Esau okwi iyuvanene, e ku dhipage. 43 Ngashingeyi, mumwandje, ninga shoka tandi ti. Inda ontuku kaandjamumwameme Laban kuHaran, 44 u kale puye manga, sigo ondjahi yomumwanyoko tayi loto 45 e ta dhimbwa shoka we shi mu ningile. Otandi ke ku tumina elaka, u galukile kegumbo. Omolwashike ndi mu kanithe amuhe yaali esiku limwe?”
Isak ta tumu Jakob kaandjaLaban
46 Rebekka okwa lombwele Isak a ti: “Omwenyo gwandje ogwa vulithwa kaakiintu mbaka yaEsau aakwiilongo. Jakob ngele ota ka hokana ishewe aakadhona mbaka Aaheti, otandi si owala.”
© Oshindonga Bible © Bible Society of Namibia, 2008.
