Hosea tu uvitha okugeelwa kwaIsrael
1 Shigwana shaIsrael, hulithii po iituthi yeni ya fa yaapagani. One mwa pilamene Kalunga keni noinamu mu inekela. Moshilongo ashihe omwi ilanditha po koshikalunga Baal ngaashi oohonda nomu hole iilya mbyoka tamu ti, okwe yi mu futile! 2 Ihe mbala ito ka kala niilya ya gwana nomagadhi nosho wo omaviinu. 3 Oshigwana shaIsrael itashi ka kala we mevi lyOmuwa, ihe otashi ka shuna kuEgipiti e tashi kala tashi li muAssur iikulya yi indikwa.
4 Momavi omakwiilongo itashi ka vula okuyambela Omuwa omayambo gomaviinu nenge oku mu etela oondjambo. Iikulya yasho otayi nyateke shaa ngoka te yi li ya fa iikulya tayi lilwa pomawendo. Otayi ka liwa ashike oku ya kutitha; itamu kuthwa nando osha, shi yambelwe motempeli yOmuwa. 5 Nuuna ethimbo tali ya lyokudhana iituthi yokusimaneka Omuwa, otaa ka ninga shike? 6 Uuna oshiponga tashi ya, naantu taa halakanithwa, Aayegipiti otaa ke ya gongela — taye ya gongelele efumviko puMemfis! Uuyamba wawo woshisiliveli nomahala mpoka omagumbo gawo ga li ga dhikilwa po, otaga ka kala ga sa omwiidhi nomano.
7 Ethimbo lyepangulo olya thikana, uuna aantu taa pewa shoka yi ilongela. Uuna tashi ningwa, Israel ote shi tseya. Otamu ti: “Omuhunganeki nguka omugoya. Omukwambepo nguka ota alukwa.” Ne aantu otamu tondo ndje unene, oshoka oondjo dheni odhindji unene. 8 Ngame omuhunganeki nda tumwa kuKalunga okulondodha oshigwana shaIsrael. Ihe aluhe shaa mpoka tandi yi, otamu tegele ndje omwigo ngaashi ondhila. Aantu oya ningi aatondi yomuhunganeki mevi lyaKalunga mwene. 9 Oyo aawinayi noonkondo miilonga yawo, naanaa ngaashi ya li puGibea. Kalunga ota dhimbulukwa oondjo dhawo e te dhi ya geelele.
Uulunde waIsrael niilanduliko
10 Omuwa ota ti: “Israel onde mu adhele a fa omandjembele ga kokela mombuga. Oohokulu oya li ya fa oonkwiyu dhoondhiye. Ihe sho ye ya kondundu Peor, oya tameke okulongela Baal, mbalambala oya ningi iikungitha ngaashi iikalunga mbyoka ye yi hole. 11 Esimano lyaIsrael otali ka tuka po lya fa ondhila, noitaa ka valelwa we aanona, kape na mukiintu ta ka ninga omusimba, kape na we mukiintu ta ka ya metegelelo. 12 Ihe nando naa vale aanona, otandi ke ya kutha po noite thigi po nando ogumwe e na omwenyo. Uuna tandi etha aantu mbano, otaa ka adhika kiihuna.”
13 Memoniko ondi wete oyana taa tidhwa notaa dhipagwa. 14 Omuwa, otandi ku indile shike, u shi ningile aantu mbaka? Ninga aakiintu yawo kaaya vale! Nomagundji gawo ga thipuka kage shi kuyamutha we uunona.
Epangulo lyOmuwa kuIsrael
15 Omuwa ota ti: “Iilonga yawo ayihe iiwinayi oya tameke muGilgal. Oko nkoka nda tameke oku ya tonda. Nomoluuwinayi mboka ye u ningi, otandi ke ya tidha mo mevi lyandje. Itandi ka kala we ndi ya hole; aawiliki yawo oya tsa ondumbo nangame. 16 Oshigwana shaIsrael osha fa oshimeno shi na omidhi dha kukuta noitashi imi we iiyimati. Itaa ka kala we ye na aanona, ihe nando ya kale nayo, otandi ka dhipaga po aanona yawo ye ya hole.”
Omuhunganeki ta popitha Israel
17 Kalunga nguka he longele, ote ke ekelahi aantu ye, oshoka inaye mu pulakena. Otaa ka kala aatembauki mokati kiigwana.
© Oshindonga Bible © Bible Society of Namibia, 2008.
