Okwaavulika kwaIsrael
1 “Pulakena, Israel! Ngashingeyi oto ka taaguluka Jordan nokulala evi lyiigwana iinene niinankondo yi ku vule. Iilando yawo iinene yi na omankolokuma ga tsa mombanda. 2 Aantu yo yene oyo Aayanaki aaleeleka naanankondo, mboka wu uva taku tiwa: ‘Kaku na ngoka te yi itakeke.’ 3 Ihe ngashingeyi oto ki italela ko ngoye mwene kutya Omuwa Kalunga koye ote ku tetekele a fa omulilo hagu lyana. Ote ke ya sinda; ote ye ku tidhile mo. Ngoye oto ke ya tidha mo noku ya hanagula po mbala, ngaashi Omuwa u uvaneke.
4 “Omuwa Kalunga koye ngele te ye ku tidhile mo, ino dhiladhila u tye: ‘Okwe eta ndje mo, ndi likole evi ndika moluuyuuki wandje.’ Aawe, Omuwa ote ke ku tidhila po iigwana mbika moluukolokoshi wayo. 5 Hamolwashoka ngoye omwaanawa ando noho ningi shoka shu uka, Omuwa ando te ku pitikile okulala evi lyawo. Ote ke ya tidha mo, oshoka oyo aakolokoshi nomolwashoka ta lalakanene okugwanitha euvaneko ndyoka e li uvanekele oohokulu Abraham, Isak naJakob. 6 Kala tuu u shi shi kutya Omuwa ite ku pe evi ndika ewanawa omolwuuyuuki woye, oshoka ongoye oshigwana oshitangalali.
7 “Ino dhimbwa nando okuli, nkene wa geyitha Omuwa mombuga. Okuza uuna wa tembuka mo muEgipiti sigo uuna wa thiki mpaka, owa tsu ondumbo nOmuwa. 8 Nokuli pondundu Sinai owa geyitha Omuwa ondjahi ya gwana oku ku hanagulitha po. 9 Onda londo kondundu, ndi ka taambe iipelende yomamanya, moka mwa li mwa nyolelwa ehangano ndyoka Omuwa a hangana nangoye. Onda kala ko omasiku omilongo ne, uusiku nomutenya, inandi lya sha ngaye ine nwa sha. 10 Omuwa nokwa pe ndje iipelende yomamanya, moka a nyolela shoka ye mwene e ku lombwele e li momulilo esiku ndiyaka wa li pondundu. 11 Eeno, konima yomasiku ngoka omilongo ne, uusiku nomutenya, Omuwa okwa pe ndje iipelende iyali yomamanya, moka a li a nyolela ehangano noshikaha she mwene.
12 “Omuwa okwa lombwele ndje a ti: ‘Londoloka u ye pevi u ze kondundu mbala, oshoka aantu yoye mboka we ya tembudha mo muEgipiti, oya ningi esithahoni. Oya gamuka nokuli mondjila ndjoka nde yi ya lombwele ya kale mo noyi iningile oshimenka.’
13 “Omuwa okwa lombwele ndje ishewe a ti: ‘Aantu mbaka ondi ya shi kutya oyo aatangalali. 14 Ino mweneka ndje we. Onda hala ndi ya hanagule po nokudhima po edhina lyawo kombanda yevi. Ihe ngoye otandi ke ku ninga he yoshigwana oshinene noshinankondo shi ya vule.’
15 “Ngame nonda galuka ihe kondundu nda humbata iipelende iyali yomamanya, moka mwa nyolelwa ehangano. Ondundu oya li tayi lilima omalaka gomulilo. 16 Onda mono kutya ne omwa yono kOmuwa Kalunga keni: omwi ihambulile oshimenka shoshingoli molupe lwontana; omwa zi mbala mondjila ndjoka Omuwa e mu lombwele mu ende nayo. 17 Opo mpoka nda hata pevi iipelende ayihe iyali ya li miikaha yandje, e tandi yi tatula montaneho yeni. 18 Lumwe natango ondi isizimike pevi koshipala shOmuwa omasiku omilongo ne, uusiku nomutenya, ngame inandi lya sha noine nwa sha. Onde shi ningi, oshoka omwa yono kOmuwa nomwe mu geyitha. 19 Onda li nda tila uupyu wondjahi yOmuwa, oshoka okwa li a geya noonkondo e mu hanagule po thilu, ihe Omuwa okwa pulakene ndje natango. 20 Omuwa okwa li a geele wo Aaron noonkondo a hala oku mu dhipaga, nopethimbo tuu ndyoka onda galikanene wo Aaron. 21 Onda kutha oshiningomwa sheni shuulunde, ontana ndjoka yoshingoli, nonde yi umbile meziko. Onde yi nyanyagula nde yi ningi omutoko e tandi gu gundu momeya ngoka taga tondoka taga zi mondundu.
22 “Ne omwa geyitha Omuwa ishewe, sho mwa li puTabera, Massa naKibrot Taava. 23 MuKadesh Barnea Omuwa sho e mu tumu a ti: ‘Indeni mu ka lale evi ndyoka tandi li mu pe,’ omwa tsu ondumbo nelombwelo lyOmuwa; ne inamu mu itaala nokuvulika kuye. 24 Ondi shi shi kutya ne otamu thengalalele Omuwa.
25 “Ondi isizimike pevi koshipala shOmuwa omasiku omilongo ne, omutenya nuusiku, molwashoka Omuwa okwa ti, ote mu hanagula po. 26 Onda galikana nda ti: Omuwa Omupangeliawike, ino hanagula po aantu yoye, oshigwana shoka we shi mangulula noku shi tembudha mo muEgipiti noshikaha shoye shoonkondo. 27 Dhimbulukwa aapiya yoye Abraham, Isak naJakob noino pupa ko kuutangalali, kuukolokoshi nokuulunde woshigwana shika. 28 Aayegipiti otaa ningi ya tye: ‘Omuwa okwa nyengwa okufala aantu ye kevi ndyoka e ya uvanekele. Okwa kutha mo ashike aantu ye, e ke ya dhipagele mombuga, oshoka okwa li e ya tonde.’ 29 Aantu mbaka oyoye, oshigwana shoye shoka we shi tembudha mo muEgipiti noshikaha shoye shoonkondo nokwooko kwa taganana.”
© Oshindonga Bible © Bible Society of Namibia, 2008.
