Ondjimbo yaDebora naBarak
1 Esiku ndyoka Debora naBarak yaAbinoam oyi imbi eimbilo ndika taa ti:
2 Hambeleleni Omuwa!
Aaisraeli oya li yu uthilwa okukondja;
aantu oya zimine nenyanyu.
3 Pulakeneni, ne aakwaniilwa!
Pakalekeni omakutsi, ne aapangeli!
Ngame otandi imbi, otandi hiki okahumba
tandi shi ningile Omuwa, Kalunga kaIsrael.
4 Omuwa, sho wa zi koondundu dhaSeir,
sho wa zi komikuma dhaEdom,
evi olya kakama, nomvula oya puuka ya zi mealelo.
Eeno, omeya oga pooka ga zi miikogo.
5 Oondundu dha kakama koshipala shOmuwa gwaSinai,
okoshipala shOmuwa, Kalunga kaIsrael.
6 Muuyuni waShamgar yaAnat, momasiku gaJael,
iiyendo yoongamelo inayi taakana we evi,
naayendanandjila oye ende moondjila dha kunkula.
7 Debora, iilando yaIsrael ya thikama ye ethiwa;
oya kulumana yi li omupulungundju, sigo we ya,
sigo wa uluka ko ngaashi yina yaIsrael.
8 Mevi omwa kala nduno iita, sho Israel a hogolola iikalunga.
Ihe momayuvi omilongo ne gaalumentu
muIsrael inamu monika ngoka e na oshikandekitho nenge egonga.
9 Omutima gwandje gwa gama kaakwatelikomeho yaIsrael,
gwa pamba kaantu mboka ya zimine nenyanyu.
Hambeleleni Omuwa!
10 Shi hokololeni, ne mboka mwa londa kuusino uutokele,
one mboka mwa kuutumba piithala,
nane mboka tamu lyanga akuhe.
11 Pulakeneni! Ewi lyombuyagano tali ziilile komadhiya,
ndjoka tayi hokolola omasindano gOmuwa,
omasindano gaantu ye Aaisraeli!
Nena aantu yOmuwa otaa katuka taa zi miilando yawo.
12 Wilika, Debora! Kwata komeho! Wilika!
Imba eimbilo! Wilika!
Thikama, Barak yaAbinoam,
kwatela komeho oonkwatwa dhoye!
13 Nena aainekelwa oye ya kaawiliki yawo;
aantu yOmuwa oye ya kuye yi ilongekidha okukondja.
14 Oya zi kuEfraim yu uka molusilu,
handiyaka yaBenjamin naantu ye.
Aawiliki oya zi kuMakir,
oondjayi odha koloka kuSebulon.
15 Aawiliki yaIssaskar oye ya pamwe naDebora;
eeno, Issaskar okwe ya ndele naBarak wo,
noye mu landulile molusilu.
Ihe ezimo lyaReuben olya li lya limbililwa;
inaa vula okutokola, ngele otaye ya.
16 Omolwashike ya kala handiyaka pamwe noonzi,
taa pulakene aasita taa ithana iigunda yoonzi?
Eeno, ezimo lyaReuben olya li lya limbililwa;
inaa vula okutokola, ngele otaye ya.
17 Ezimo lyaGad olya kala kuuzilo waJordan,
nezimo lyaDan olya thigala petulilo lyoosikepa.
Ezimo lyaAser olya kala komunkulo,
olya thigala pooha dhefuta.
18 Ihe aantu yaSebulon noyaNaftali
oya hupula oomwenyo dhawo melundu lyolugodhi.
19 PuTaanak, pomulonga gwaMegiddo,
aawa oye ya, opo ya kondje,
aawa yaKaanan oya kondjo, ihe inaa hakana nando oshisiliveli.
20 Oonyothi odha kondjo okuza kealelo,
nkene dha taakana egulu,
odha kondjitha Sisera.
21 Efundja lyomuKishon olye ya kungulula po —
epomboloko lyomulonga Kishon.
Otii ka katuka, te katuka ndi na omatha!
22 Nena uukambe otau ya tau lapata
tau lyata evi nomakondo gawo.
23 Omuyengeli gwOmuwa okwa ti: “Thingeni Meros,
aantu yaahoka naa thingwe, naa thingwe.
Yo inaye ya okukwatha Omuwa,
okukondjela Omuwa mengathithi lye.”
24 Omukiintu omunelagwelela oJael,
omukadhaHeber Omukeni —
omukiintu omunelagwelela oye ngoka e li mootenda.
25 Sisera okwe mu indile omeya,
ihe okwe mu pe omahini;
okwe mu etele omoosi mombago yuuzeko.
26 Moshikaha shimwe oku na omboha yotenda
nomoshikwawo ohamala;
okwa mokola Sisera e ta tatula olukwe lwe;
oku ulula omutse gwe.
27 Sisera okwa ongotele pevi,
okwa gu e ta kangawala a tya thilu poompadhi dhaJael.
Eeno, opoompadhi dhe a ongotele e ta gu;
a gwile pevi a sa thilu.
28 Yina yaSisera okwa talele mekende
a kwidhidhikwa kiitenda ya tatakana.
“Omolwashike etemba lye lya tokelwa ngeyi?” osho a pula.
“Omolwashike uukambe we itaau endelele okugaluka?”
29 Ookanee ke aanandunge oye mu yamukula,
nokwe endulula oohapu dhawo a ti:
30 “Otaa kwata owala omakumbu nokwiitopolela,
omukwiita kehe ota yi nomukadhona gumwe nenge yaali,
iihakanwa yiiyata yuuzeko oyaSisera,
iisaali ya nyonyombwa oyomothingo yomunyekadhi.”
31 Omuwa, aatondi yoye ayehe naa se ngaaka,
ihe aaholike yoye naa yele ongetango tali piti.
Moshilongo nomwa li ombili ethimbo lyoomvula omilongo ne.
© Oshindonga Bible © Bible Society of Namibia, 2008.
