Oondjambo dheteyo
1 “Ngele wa kwata po evi ndyoka Omuwa Kalunga koye te li ku pe e to tula mo, 2 tula oshipe shiilikolwa yoye ayihe montungwa e to yi nayo kehala lyelongelokalunga. 3 Inda komuyambi ngoka e li miilonga pethimbo ndyoka e to mu lombwele to ti: ‘Ngashingeyi ngame otandi koleke koshipala shOmuwa Kalunga kandje kutya onde ya mevi ndyoka e li uvanekele ootatekulu te li tu pe.’
4 “Omuyambi ota kutha po ontungwa pungoye e te yi tula komeho goshiyambelo shOmuwa Kalunga koye. 5 Tangumuna ihe koshipala shOmuwa Kalunga koye to ti: ‘Tatekulu okwa li Omuaramea ondjendi nokwa yi kuEgipiti negumbo lye a kale ko. Oya li aashona momwaalu, sho ya yi ko, ihe oyi indjipala noya ningi oshigwana oshinankondo. 6 Aayegipiti oye tu ningi onyanya noye tu thiminikile iilonga yuupika. 7 Nena otwa kugile Omuwa Kalunga kootatekulu onkugo. Okwe tu uvu e ta mono uuwehame, uudhigu nuukweyi wetu. 8 Okwe tu tembudha mo muEgipiti noshikaha she shoonkondo nokwooko kwa taganana. Okwa longo iilongandhindhiliko niinyengandunge niitilithilonga ya ningwa. 9 Okwe tu eta huka e te tu pe evi ndika lya tondoka omahini nomagadhi goonyushi. 10 Onkee ngashingeyi onde etele Omuwa oshipe shiilikolwa yevi e li pe ndje.’
“Tula ihe ontungwa koshipala shOmuwa e to galikana. 11 Nyanyukilwa iinima ayihe iiwanawa Omuwa Kalunga koye e yi ku pe negumbo lyoye; nyanyudha wo Aalevi naakwiilongo mboka ye li pungoye.”
12 “Omumvo omutitatu kehe ogwo omumvo gwoshitimulongo. Gandja oshitimulongo shiilya yoye ayihe kAalevi, kaakwiilongo, koothigwa nokaaselekadhi yomiilando yoye, opo ya mone iipalutha noya kute. Ngele wa ningi ngeyi, 13 tya kOmuwa Kalunga koye: ‘Onda kutha megumbo lyandje oshitimulongo ashihe oshiyapuki nonde shi pa Aalevi, aakwiilongo, oothigwa naaselekadhi, ngaashi wa pa ndje oshipango ndi shi ninge. Kombinga yoshitimulongo inandi yona kiipango yoye nenge ndi yi dhimbwe. 14 Ine lya sha shomusho, sho nda li moluhodhi; ine kutha mo sha maandjetu, sho nda li nda nika oshidhila; noinandi gandja mo sha shi ninge ondjambo yoonakusa. Onda vulika kungoye, Omuwa; onda gwanitha ashihe wa popi kombinga yoshitimulongo. 15 Tu taalela megulu, monkalelo yoye ondjapuki, u yambeke aantu yoye Aaisraeli; yambeka wo evi ndika lya tondoka omahini nomagadhi goonyushi, ndyoka we li tu pe, ngaashi u uvanekele ootatekulu.’
Aantu yOmuwa mwene
16 “Nena ndjika Omuwa Kalunga koye ote ku lombwele, u vulike koompango dhe adhihe; dhi dhiginina ano komutima gwoye aguhe nokomwenyo gwoye aguhe. 17 Nena ndjika owa koleke kutya Omuwa oye Kalunga koye; owu uvaneke okuvulika kuye, okudhiginina oompango dhe adhihe nokuninga ashihe ta popi. 18 Nena ndjika Omuwa okwa koleke kutya ongoye oshigwana she mwene, ngaashi e ku uvanekele; nokwe ku lombwele, u dhiginine oompango dhe adhihe. 19 Ote ku nenepeke u vule iigwana ayihe yilwe mbyoka e yi shiti, noto ka etela edhina lye ehambelelo, esimano nepandulo. Oto ka ninga oshigwana she mwene, ngaashi u uvaneke.”
© Oshindonga Bible © Bible Society of Namibia, 2008.
