Nehemia ta hangenwa
1 Sanballat, Tobia, Geshem naatondi yetu yalwe oyu uvu kutya twa hulitha etungo lyedhingililokuma lyo kali na we nando okambululu, nando otwa li inaatu tula mo manga omiyelo miikulo. 2 Sanballat naGeshem oya tumine ndje elaka taa indile ndje, tu tsakanene nayo muKefirim molushandja lwaOno. Shika osha li omwigo ye gu lukilila ndje, gu yule ndje. 3 Onda tumu kuyo elaka tali ti: “Ondi na iilonga ya simana, ite vulu okuza po. Itandi vulu okuzimbula iilonga, ndi ye kune.”
4 Oya tumine ndje elaka olyo tuu ndyoka lune, nonde ya tumine aluhe eyamukulo lya faathana.
5 Opo ihe Sanballat okwa tumu omupiya gwe gumwe kungame e na elaka etitano li li montumwafo yomontaneho. 6 Otali ti: “Geshem okwa lombwele ndje kutya omufofotolo ogu li miigwana yopuushiinda kutya ne Aajuda omwa hala okutukula oshipotha. Omolwashoka tamu tungulula edhingililokuma. Okwa ti ishewe, oto dhiladhila u ininge omukwaniilwa 7 nowa longekidha aahunganeki yamwe ya kugilile muJerusalem kutya ngoye omukwaniilwa gwaJuda. Iinima mbika otayi uvika komukwaniilwa, onkee nda dhiladhila, tse nangoye tu tsakanene, opo tu kundathane po nawa.”
8 Onde mu tumine eyamukulo tali ti: “Wa fundju, shoka to popi kashi shi shoshili.”
9 Oya kambadhala oku tu tilitha, ya kankameke iilonga. Onda galikana nda ti: “Ngashingeyi, Kalunga, nkondopaleka ndje.”
10 Esiku limwe onda ka talela po Shemaia yaDelaja, omutekulu gwaMehetabel, ngoka a li itaa vulu okuza maandjawo. Okwa ti kungame: “Natu ye, tu ka holame mela enene lyotempeli, tse tu pate omiyelo, molwaashoka otaye ya, ye ku dhipage. Uusiku wontumba otaye ya, ye ku dhipage.”
11 Onda yamukula nda ti: “Ngame, hatse yokufadhuka po nokuholama. Oto dhiladhila, omuntu ngangame ndi hupithe omwenyo gwandje nokuholama motempeli? Itandi shi ningi.”
12 Sho nda dhimbulula kutya Kalunga ina lombwela Shemaia, ndele oSanballat naTobia, mboka ye mu pe oombumbo, opo a londodhe ndje. 13 Oye mu futu, opo ya haluthe ndje, ndi yone yo ya vule okunyateka edhina lyandje noya fupipike ndje.
14 Onda galikana nda ti: “Kalunga, dhimbulukwa shoka Tobia naSanballat ya longo, ngoye u ya geele. Dhimbulukwa omuhunganeki omukulukadhi Noadia naahunganeki ooyakwawo ya kambadhala okutilitha ndje.”
Ehulitho lyiilonga
15 Sho pwa piti omasiku omilongo ntano nagaali, edhingililokuma alihe olya pu mesiku etimilongombali nagatano gomwedhi Elul. 16 Aatondi yetu miigwana ye tu kunduka sho ye shi uvu, oya haluka, oshoka oya li yu uvite kutya oshilonga shika osha longwa kekwatho lyaKalunga ketu.
17 Methimbo alihe aawiliki yaJuda oya li haa nyolelathana naTobia. 18 Aantu oyendji muJuda oya li ya gama kuye molwahemweno Omujuda, edhina lye Shekania yaArah. Niishewe, omwanamati Jehohanan okwa li a hokana omuna gwaMeshullam yaBerekia. 19 Oya hokololele ndje iilonga yaTobia iiwanawa noye mu hokololele ashihe shoka nda ti. Okwa li ha nyolele ndje oontumwafo ta tilitha ndje.
© Oshindonga Bible © Bible Society of Namibia, 2008.
