1 Ontumwafo ndjika oya zi kuJudas, omumati gwaJesus Kristus, noye omumwayina gwaJakob.
Oya nyolelwa mboka yi ithanwa kuKalunga, oomboka ye li kohi yohole yaKalunga Tate nomegameno lyaJesus Kristus.
2 Esilohenda, ombili nohole nayi mu indjipalele.
Aalongi aafundja
3 Ookuume kandje aaholike, sho shene onda li nda hala oku mu nyolela kombinga yehupitho lyetweni atuheni, sho nda dhimbulula ompumbwe yoku mu nyolela, opo ndi mu tse omukumo, mu vule okukondjela eitaalo ndyoka Kalunga e li pe aantu ye polumwe aluke. 4 Oshoka mokati keni omwi iyakela aakeenakonashanakalunga yamwe mboka taa goyokitha elaka lyesilohenda lyaKalunga ketu nokwaaneidhiliko kwawo. Otaa dhini Jesus Kristus, Omulongi omunene nOmuwa awike gwetu. Omanyolo oga hunganeke nale nokuli egeelo ndyoka ya pewa.
5 Nonando omwa tseya iinima mbika ayihe, onda hala oku mu dhimbulutha, Omuwa nkene a hupitha Aaisraeli noku ya tembudha muEgipiti, ihe konima okwa ka yona po mboka ya tindi okwiitaala. 6 Dhiladhileni aayengeli mbeyaka ya kondo omautho ngoka ye ga pewa e taa thigi po ehala lyawo yene; oye li momalyenge gaaluhe momilema dhomuule. Omo moka Kalunga e ya edhilile sigo omesiku enene moka taa ka pangulwa. 7 Dhiladhileni Sodom naGomorra niilando yopuushiinda wayo. Aantu yamo oya yono ngaashi aayengeli mbeyaka noya hondele e taa lundulula omikalo dhopantu. Onkee ano oya geelwa nomulilo gwaaluhe, shi ninge elondodho kaantu ayehe!
8 Osho wo aayagumi mbaka ohaa yaguma oondjodhi ndhoka tadhi ya fala okunyateka omalutu gawo. Ohaa dhini oonkondo nepangelo lyaKalunga nohaa sheke iikwayadhimo yomegulu. 9 Nomuyengelimukuluntu Mikael ine shi ninga. Molugodhi lwawo naSatana sho ya li taa ludhikithathana kutya olye e na okukutha po omudhimba gwaMoses, Mikael ina pangula nando Satana nenge e mu sheke, ihe okwe mu lombwele owala a ti: “Omuwa ne ku geele!” 10 Ihe aantu ya tya ngeyi otaa sheke iinima yaa yi shi naambyoka ye yi shi paunshitwe ngaashi iiyamakuti, oyo mbyoka tayi ya yono po. 11 Egeelo lyawo otali ka kala edhigu. Oyo oya landula ondjila yaKain. Omolwiimaliwa oyi iyethele mepuko lyaBileam. Oya ningi onakwaavulika ngaashi Kora noya yonwa po ngaashi ye. 12 Oyo oya fa iifakufaku piililo yeni yuukumwe yo ihaa si ohoni okugongalela iikolitha. Aantu ya tya ngeyi ihaa sile yakwawo oshimpwiyu. Oyo oya fa iikogo tayi matukithwa kombepo noitayi eta omvula. Oya fa omiti dhopokufu, ihaadhi imi iiyimati, ongomiti dha vudhwa mo nomidhi dhadho e tadhi si. 13 Oyo oya fa omakuthikuthi ga pindjala gomefuta. Iilonga yawo yohoni otayi itumbu pombanda ya fa ondutu. Oyo oya fa oonyothi hadhi telauka. Kalunga okwe ya pungulila ehala lyaaluhe momilema dhomuule.
14 Enok, omutiheyali gwoluvalo lwaAdam, okwa hunganeke nalenale kombinga yaantu ya tya ngeyi: “Tala! Omuwa ote ke ya pamwe naayengeli ye aayapuki yomayuvi ogendji 15 okupangula ayehe nokugeela aakeenakonashanakalunga ayehe omolwiilonga yawo ayihe yokudhina Kalunga, sho haa popi oohapu dhomatukano dha tsa ondumbo naKalunga.”
16 Aantu ya tya ngeyi ohaa kala aluhe nokungungutula nokupa yakwawo uusama. Oyo ohaa landula uuhalu wawo; ohaa popi oohapu dhuuntsa nohaa fundjaleke aantu, opo ye ya likole.
Omakumagidho nomapukululo
17 Ookuume kandje, dhimbulukweni oohapu ndhoka mwe dhi lombwelwa nale kaayapostoli yOmuwa gwetu Jesus Kristus. 18 Oyo oye mu lombwelele ya ti: “Pomasiku gahugunina otaku ke ya aakeenakonashanakalunga haa landula uuhalu wawo yene e taye mu sheke.” 19 Oyo oonakweeta omatopoko, haa pangelwa kuuhalu wawo wopanshitwe yo kaye na Ombepo Ondjapuki. 20 Ihe ne, ookuume kandje, itungileni kekankameno lyeitaalo lyeni eyapuki. Galikaneni moonkondo dhOmbepo Ondjapuki, 21 ne mwi ikaleke mohole yaKalunga mokutegelela kweni, Omuwa gwetu Jesus Kristus pasilohenda lye e mu pe omwenyo gwaaluhe.
22 Kwatheni nohenda mboka ya limbililwa; ya hupitheni, mu ya nakule momulilo. 23 Kwatheni wo yalwe nokutila, ihe nyanyaleni oonguwo dhawo dhokohi ndhoka dha nyatekwa kuuhalu wawo.
Egalikano lyehambelelo
24 Kalunga nguka ta vulu oku mu gamena, mwaa punduke, noku mu kaleka mwaa na oshipo, mu udha enyanyu montaneho yeadhimo lye, 25 oye awike Kalunga nOmuhupithi gwetu molwaJesus Kristus, Omuwa gwetu. Oye e na eadhimo, uunenesimano, oonkondo nepangelo okuza komathimbo gonale nongashingeyi nosigo aluhe. Amen.
© Oshindonga Bible © Bible Society of Namibia, 2008.
