Eshunitho lyoshikethahangano
1 Oshikethahangano shOmuwa sho sha kala mevi lyAafilisti oomwedhi heyali, 2 aantu oyi ithana aayambi noonganga noye ya pula ya ti: “Oshikethahangano shOmuwa otatu shi ningi ngiini? Ngele tatu shi shunitha nkoka sha li, otatu shi tumu nashike?”
3 Oya yamukula ya ti: “Ngele otamu shunitha oshikethahangano shaKalunga kaIsrael, omu na oku mu faalela omagano, mu futile ondjo yeni. Oshikethahangano kashi na okushuna shaa na magano. Opo ihe otamu ka aluka notamu ka dhimbulula kutya omolwashike e mu geele.”
4 Aantu oya pula ya ti: “Otatu mu tumine omagano gashike?” Oya yamukula ya ti: “Iiyelekela yoshingoli itano yiitumbuka noombuku ntano dhoshingoli, ano omwaalu ngoka gu thike pamwe nomwaalu gwaakwaniilwa yAafilisti. Egeelo ndika olye mu adha ne amuhe naakwaniilwa yeni yatano. 5 Hambuleni ano iiyelekela yiitumbuka noyoombuku ndhoka dha hepeke oshilongo sheni, ne mu simaneke Kalunga kaIsrael. Pamwe ta mweneke ondjahi ye yoku mu geela, one niikalunga yeni noshilongo sheni. 6 Omolwashike tamu ikukutike, ngaashi omukwaniilwa gwaEgipiti nAayegipiti ya ningi? Inamu dhimbwa, nkene Kalunga e ya posipaleke, sigo ye etha Aaisraeli, ya tembuke muEgipiti. 7 Pangeleni ano etemba epe ne mu kuthe oonzinzi mbali oonyali ndhoka inaadhi humbata nale ondjoko; dhi kutileni ketemba, ihe uutana wadho u tuleni koshigunda, 8 Kutheni oshikethahangano shOmuwa, mu shi tule metemba ne mu tule mo ontega nasho okaketha ke na iiyelekela yoshingoli mbyoka tamu tumine Kalunga kaIsrael omagano gokufuta oondjo dheni. Ukitheni etemba moshitauwa ne mu li ethe, li ye nondjila yalyo. 9 Li undjeni; ngele otali yi lyu uka koshilando Bet Shemesh, shika otashi ti kutya Kalunga kaIsrael oye a tumu egeelo ndika. Ihe ngele hasho, nena otatu tseya kutya nani haye a tumu uuvu mbuka, osha li pamwe oshiponga shi iyeta.”
10 Oya ningi, ngaashi ya lombwelwa: oya kutha oonzinzi mbali oonyali e taye dhi kutile ketemba, ihe uutana oye u edhilile moshigunda. 11 Oya tula oshikethahangano metemba pamwe nokaketha ke na iiyelekela yoombuku noyiitumbuka. 12 Oonzinzi odha yi dhu ukilila ondjila yokuBet Shemesh, inadhi penga mo mondjila nando. Odhe ende tadhi lili. Aakwaniilwa yAafilisti yatano oye dhi landula sigo okongamba yaBetShemesh.
13 Aantu yokuBet Shemesh oya li taa teya osiima molusilu, nohaluka sho ya ligamene ko, oya mono oshikethahangano noya nyanyukilwa oku shi mona. 14 Etemba olya thiki pepya lyomulumentu gwomuBet Shemesh edhina lye Josua e tali thikama popepi nemanya enene. Aantu oya tyaya po etemba noya dhipaga oonzinzi e taye dhi yambele Omuwa efikilondjambo. 15 Aalevi oya toola po oshikethahangano nokaketha kiiyelekela yoshingoli e taye yi tula pemanya enene. Nena aantu yaBet Shemesh oya yambele Omuwa omafikilondjambo noondjambo oonkwawo. 16 Aakwaniilwa yatano yAafilisti oya li taye ya undju, sho taa longo ngeyi, noya shuna kuEkron esiku tuu ndyoka.
17 Aafilisti oya tumu omagano giitumbuka itano yoshingoli kOmuwa okufuta oondjo dhawo; moshilando kehe omwa zi shimwe: Ashdod, Gaza, Ashkelon, Gat naEkron. 18 Oya tumu wo oombuku dhiingoli; moshilando kehe shaambyoka itano omwa zi yimwe, nayi kale iilandohote nenge omikunda dha kala pontundulu. Emanya enene mepya lyaJosua kuBet Shemesh, moka ya tula oshikethahangano shOmuwa, oko li li sigo onena onzapo yaashoka sha ningilwe ko.
19 Omuwa okwa dhipaga aalumentu omilongo heyali yokuBet Shemesh, oshoka oya tala moshikethahangano. Aantu noya lili oosa, oshoka Omuwa okwe ya geele ngaaka.
Oshikethahangano muKiriat Jearim
20 Aalumentu yokuBet Shemesh oya ti: “Olye ta vulu okukala koshipala shOmuwa, Kalunga omuyapuki? Omuwa otatu mu fala peni, a ze mokati ketu?” 21 Oya tumu aatumwa kaantu yokuKiriat-Jearim taa ti: “Aafilisti oya galula oshikethahangano shOmuwa. Ileni, mu shi kuthe po.”
© Oshindonga Bible © Bible Society of Namibia, 2008.
