1 Oohapu ndhika Omuwa okwe dhi lombwele Sefania pethimbo lyaJosia yaAmmon, omukwaniilwa gwaJuda. (Sefania oyaKushi kwaGedalia yaAmaria gaHiskia.)
Esiku lyepangulo lyOmuwa
2 Omuwa okwa ti: “Otandi ka hanagula po shaa shoka kombanda yevi, 3 aantu ayehe niinamwenyo noohi. Otandi ka komba po aakolokoshi ayehe. Otandi ka yonagula po aantu ayehe noitaku hupu nando ogumwe. Ongame Omuwa nde dhi popi.
4 “Otandi ka geela aantu ayehe yaJerusalem noyaJuda. Otandi ka hanagula po omathegela gesimaneko lyaBaal, nokaku na we ngoka ta ka dhimbulukwa aasaageli mboka ya li ya longele Baal. 5 Otandi ka hanagula po shaa ngoka ta londo koshihoko nota simaneke etango, omwedhi noonyothi. Otandi ka hanagula po wo mboka taa longele ndje nuudhiginini, ihe otaa gana medhina lyoshikalunga Molek. 6 Otandi ka hanagula po mboka ya shuna monima noitaa landula ndje we, mboka itaa ya we kungame nenge itaa galikana ndje, opo ndi ya endithe.”
7 Mweneni thilu koshipala shOmuwa. Oshoka esiku lyOmuwa oli li popepi, esiku uuna Kalunga ta ka ninga po sha Omuwa okwi ilongekidha okudhipaga aantu ye ngaashi iimuna. 8 Omuwa ota ti: “Esiku lyetselo otandi geele aambala, aana yokombanda aamati naayehe mboka taa holele aakwiilongo. 9 Otandi geele ayehe mboka haa tutula uudhano woshipagani naamboka haa yaka nohaa dhipaga, opo ya yambapaleke egumbo lyoshikalunga shawo.”
10 Omuwa ota ti: “Esiku ndyoka otamu ku uva omawi taga kugagana pOsheelo shoohi muJerusalem. Otamu ku uva etakumo moshitopolwa oshipe shoshilando nekolokoto enene koondundu. 11 Kugeni e tamu lili, ne mbo mu li molusilu lwoshilando, uuna tamu shi uvu, oshoka aapindiki ayehe otaa ka sa.
12 “Pethimbo mpoka otandi kutha olamba e tandi shilile Jerusalem. Otandi geele aantu mboka taa imbilipaleke noyi inekela yo yene notayi ipopile taa ti: ‘Omuwa ita tompola sha, shika nenge shiyaka.’ 13 Uuyamba wawo otau ka yugwa po nomagumbo gawo taga ka hanagulwa po. Itaa ka kala momagumbo ngoka taye ga tungu nenge okunwa omaviinu gomiitsambe mbyoka taye yi tsike.”
14 Esiku enene lyOmuwa oli li popepi — popepilela notali ya tali endelele. Otali ka kala esiku elulululu, oshoka aakwiita oofulelela otaa ka lila kuudhigu! 15 Otali ka kala esiku lyondjahi, esiku lyuuwehame nolyuudhigu, esiku lyeyonuko nolyehanagulo, esiku lyomilema nolyondhimeya, esiku lyiikogo nolyomuzimbi, 16 esiku lyelilo lyoombenda dhiita noonkalu dhaakwiita taa ponokele iilandohote nooshungo oondeendeka.
17 Omuwa ota ti: “Otandi ka tumina aantu uudhigu tau ya pampadhalitha ya fa aaposi. Oya yono kungame, nongashingeyi ombinzi yawo otayi ka tilwahi ya fa omeya, nomidhimba dhawo otadhi ka lala dho olela pevi.”
18 Mesiku ndjoka Omuwa ota ka holola ondjahi ye, onkee oshisiliveli noshingoli shawo itashi vulu oku ya hupitha. Evi alihe otali ka hanagulwa po komulilo gwondjahi ye. Ota ka hulitha po mbala ayehe mboka ya kala kombanda yevi.
© Oshindonga Bible © Bible Society of Namibia, 2008.
