Omuwa ta pangula eidhiliko lyiifundja
1 Momumvo omutine gwaDarius sho a li omukwaniilwa, mesiku etine lyomwedhi omutimugoyi (omwedhi Kislev) Omuwa okwa pe ndje elaka. 2 Aantu yokuBetel oya tumu Sharezer naRegemmelek naantu yawo kotempeli yOmuwa Omunankondoawike, ya galikane nokwiindila eyambeko lyOmuwa 3 noya pule aayambi naahunganeki epulo ndika: “Otu na okutsikila okulila molwekumukopo lyotempeli nokwiidhilika iikulya momwedhi omutitano, ngaashi hatu shi ningi momimvo odhindji dha pita?”
4 Omuwa okwa pe ndje elaka ndika 5 a ti: “Lombwela aantu yomoshilongo naayambi kutya sho ya li yi idhilika iikulya nokulila momwedhi omutitano nomutiheyali methimbo lyoomvula omilongo heyali, kasha li nando omolwokusimaneka ndje. 6 Nuuna ya li noya nu, osha li owala okwiinyanyudha yo yene.”
7 Kamu shi oohapu ndhoka Omuwa a lombwele aahunganeki yonale, manga Jerusalem sha li oshilando shi na elago noshi na aantu oyendji, ngaashi wo iilando momudhingoloko gwasho, oshitopolwa shokuumbugantu niikulundundu yoponyonga yoondundu dhokuuninginino?
Okwaavulika okwo kwa falitha aantu muupika
8 Omuwa okwa lombwele Sakaria: 9 “Nalenale onda lombwelele aantu yandje: ‘Tsakanitheni uuyuuki ne mu ulukilathane uukuume nesilohenda. 10 Aaselekadhi, oothigwa, aakwiilongo noohepele inamu ya hepeka. Inamu dhiladhila okweehamekathana.’
11 “Ihe aantu yandje oya tindi okupulakena. Oya pata omadhiladhilo gawo 12 noya kukutike omitima dhawo ongemanya. Onkee onda geyele noonkondo, oshoka oya li inaa hala okupulakena omalongo ngoka nde ya pe maahunganeki. 13 Molwaashoka oya li inaa pulakena oohapu dhandje, inandi ya yamukula, sho ya galikana. 14 Onde ya thekeke po ngaashi oshikungulu hashi ningi noya kala muundjendi. Oshilongo shika oshiwanawa osha thigwa po sha mbugala, shaa na omuntu.”
© Oshindonga Bible © Bible Society of Namibia, 2008.
