Emoniko lyomatembakwiita gane
1 Onda mono emoniko ekwawo. Pethimbo ndika onda mono mo omatembakwiita gane tage ya taga zi pokati koondundu mbali dhoshikushu. 2 Etembakwiita lyotango olya li tali hilwa kuukambe uutiligane, etiyali okuukambe uuluudhe, 3 etitatu okuukambe uutokele netine okuukambe uukanga. 4 Nena onda pula omuyengeli. “Tatekulu, omatembakwiita ngaka otaga holola shike?”
5 Okwa yamukula: “Ogo oombepo ne; odha zi koshipala shOmuwa gwevi alihe.”
6 Etembakwiita tali hilwa kuukambe uuluudhe, olya li tali yi kuBabilon, uukambe uutokele owa li wu uka kuuninginino nuukambe uukanga owa li wu uka koshilongo shokuumbugantu. 7 Uukambe uukanga sho wa zi mo, owa li we endelela, u ka ndaadhe evi. Omuyengeli okwa ti: “Indeni, mu ka ndaadhe evi!” Owo nowe shi ningi,, 8 Nena omuyengeli okwi igidha ndje. “Uukambe mboka wa yi koshilongo shokuumbangalantu, owa loteke ondjahi yOmuwa.”
Josua ta zalekwa oshishani
9 Omuwa okwa pe ndje elaka ndika 10 a ti: “Kutha omagano ngoka ge etwa kaapongekwa Heldai, Tobia naJedaia e to yi kaandjaJosia yaSefani. Aalumentu mbaka ayehe oya zi muupika muBabilon. 11 Hambula oshishani shoshisiliveli noshingoli shoka ye shi eta e to shi zaleke komutse gwomuyambi omukuluntu Josua yaJehosadak. 12 Mu lombwela kutya Omuwa Omunankondoawike ota ti: ‘Omulumentu ngoka taku tiwa Shitutuma, ota ka tsapuka e ta ka tungulula otempeli yOmuwa. 13 Oye mwene te ke yi tungulula nota taamba esimano lyuukwaniilwa, nota ka lela aantu ye. Omuyambi ota ka thikama poshipangelapundi she, oyo notaa ka longela kumwe mombili nomeuvathano.’ 14 Oshishani otashi ka kala endhindhiliko motempeli yOmuwa okudhimbulukwa Heldai, Tobia, Jedaia naJosia.”
15 Aantu mboka ye li kokule, otaa ke ya e taa kwatha metungululo lyotempeli yOmuwa. Nongele ya tungwa, otamu ka tseya kutya Omuwa Omunankondoawike okwa tumu ndje kune. Ayihe mbika otayi ka ningwa, ngele tamu vulika shili kiipango yOmuwa Kalunga keni.
© Oshindonga Bible © Bible Society of Namibia, 2008.
