Emoniko lyoshihukikwanyeka
1 Omuyengeli ngoka a li ta popi nangame, okwe ya ishewe nokwa pendutha ndje ongaangoka nda li nda kotha, 2 e ta pula: “Owu wete shike?” Onda yamukula:
“Oshihukikwanyeka shoshingoli nokomutse gwasho oku na oshikwatelo shomahooli. Koshihukikwanyeka oku na oolamba heyali, kehe yimwe yi na omahala gomitemo heyali. 3 Oku na omiti mbali dhooholivi ontega noshihukikwanyeka, omuti gumwe kombinga kehe.” 4 Nena onda pula omuyengeli nda ti: “Shika otashi holola shike, tatekulu?”
5 Okwa pula ndje a ti: “Ku shi shi?”
Onda yamukula: “Aawe, tatekulu.”
10b Omuyengeli okwa ti kungame: “Oolamba heyali odho omeho gaheyali gOmuwa, ngoka ga mono ombanda yevi alihe.”
11 Nena onde mu pula: “Omiti mbali dhooholivi koombinga adhihe mbali dhoshihukikwanyeka otadhi holola shike? 12 Niitutuma iyali yooholivi yi li pooha dhomiligu mbali dhoshingoli dhokweenda omahooli, otayi holola shike?”
13 Okwa pula ndje: “Ku shi shi?”
Onda yamukula: “Aawe, tatekulu.”
14 Nena okwa ti: “Mbaka oyo aalumentu yaali mboka Kalunga a hogolola nokwe ya gwayeka, ye mu longele, Omuwa gwevi alihe.”
Omauvaneko gOmuwa kuSerubbabel
6 Omuwa okwa lombwele ndje, ndi pe Serubbabel elaka ndika lya zi kuye tali ti: “Oto ke shi vula, ihe hakoonkondo dhuukwiita nenge komatha goye mwene, aawe, okombepo yandje. 7 Omikundu ominenenene dhi thike poondundu otadhi ka kana po komeho goye. Oto ka tungulula otempeli, nongele wa tula ondhopi yahugunina peha lyayo, oshigwana otashi ka kugilila tashi ti: ‘Osho opala sho opalelela!’ ” 8 Elaka ekwawo olye ya lya zi kOmuwa 9 tali ti: “Serubbabel okwa tameka omukanka gwotempeli noye te ke yi mana okutunga. Shika sho sha ningwa, nena aantu yandje otaa ka tseya kutya ongame nde ku tumu kuyo. 10a Oya nika oluhodhi, oshoka opwa ningwa ehumokomeho eshona lyowala. Ihe otaa ka mona Serubbabel ta tsikile okutunga otempeli notaa ka nyanyukwa.”
© Oshindonga Bible © Bible Society of Namibia, 2008.
