1 Omuwa Omunankondoawike ota ti: “Uuna esiku ndyoka nali ya, oluthithiya otalu ka thituluka okuyoga oluvalo lwaDavid naantu yaJerusalem koonyata dhawo dhuulunde nokiimenka yawo haye yi simaneke. 2 Pethimbo ndyoka otandi ka dhima po omadhina giimenka moshilongo, nokaku na we ngoka te ke ga dhimbulukwa. Otandi ka tidha mo shaa ngoka ti iti omuhunganeki notii ka kutha po ondjuulukwe yokusimaneka iimenka. 3 Nena shaa ngoka ta dhiginine natango okuhunganeka, he nayina otaa ka tya kutya na dhipagwe, oshoka ota ti kutya ota popi oohapu dhOmuwa, ihe ota fundju. Uuna ta hunganeke ngeyi, he nayina otaye ke mu dhipaga. 4 Uuna ethimbo ndyoka tali ya, kape na omuhunganeki te ki itangela omamoniko ge, nenge ta kala a fa omuhunganeki, nenge ta zala omizalo dhiifufu ongomuhunganeki, opo a fundjaleke aantu. 5 Peha lyasho ota ka tya: ‘Ngame kandi shi omuhunganeki, ngame omunepya — ngame onda longo omapya nonda litha iimuna mokukala kwandje akuhe.’ 6 Nena ngele gumwe te mu pula ta ti: ‘Iilalo mbyoka yi li molupati lwoye, oyashike?’ Ota ka yamukula ta ti: ‘Onde yi monene maandjakuume kandje.’ ”
Elombwelo lyokudhipaga po omusita
7 Omuwa Omunankondoawike ota ti: “Gongamwele, yeluka, u ukilile omusita ngoka ta longele ndje! Mu dhipaga, nena oonzi otadhi ka halakana. Otii ka matukila aantu yandje, 8 nomoshilongo ashihe iititatu iyali otayi ka sa. 9 Notandi ke ya yelitha, ngaashi oshisiliveli tashi yelithwa komulilo. Otandi ke ya yelitha, ngaashi oshingoli hashi yelithwa. Nena otaa ka galikana ndje, ngame notandi ya yamukula. Otandi ke ya lombwela kutya oyo aantu yandje, notaa ka zimina kutya ongame Kalunga kawo.”
© Oshindonga Bible © Bible Society of Namibia, 2008.
